Robe de Ciòsa

I zoghi de i bambini de 'na volta...

Adesso i fiòi fa altri zoghi...

I zoghi de i bambini (ciosòti) de 'na volta no gera serto i zoghi de i bambini de ancùo. Tutta 'n'altra roba!... Gnanca un confronto! Gera mègio i primi o ze mègio i secondi? Domanda da un milion de dòlari!...
Scomissiémo a parlare de i zoghi de le bambine o, mègio, per dirla a la ciosòta, de le fantoline. Femo un salto indrìo de tanti ani, a l'Otosènto. Se tratava prima de tuto de zoghi "ingenui", se podaria dire "da bambini bambini", no da "bambini grandi", fati co "mezi propri", roba usà, riciclà, smessa... Parlemo de i fantolini de le famégie pi poverete, perché quele pi riche podèva permétarse de regalare ai fiòi i zogàtoli, naturalmente costruìi in legno, come el cavalo, el tamburin, le pècora o la casa de campagna.
Un zogo molto in voga a quel tempo tra le bambine gera quelo del sércio: bastava un sércio fato de cana (serte volte se usava el sercion che le mame alora usava per slargarse le còtole...) opure un vènco (=giunco) e le bambine, corendo, i lo fèva rodolare dàndoghe de i colpeti co un bastonsin.
Un altro passatempo de le femenéte gera le pùpole (= bambole) autoconfessionàe co strasse o tòchi de stofa conservà da le mame per cuzire i taconi: le aveva viso, man e pie a rilievo colorà.
Altro zogo da bambine gera quelo de la "Maria orba" (=mosca cieca) o quelo del "Mi ò el cuchéto, lo tegno streto, l'ò anca mi", che a consisteva nel scoprire quale de le fie in zogo tegniva fra le man el cuchéto, che passava rapidamente da 'na man a l'altra.

Zogo de la "Maria Orba"(= mosca cieca). (disegno de Guido Sfriso)

Anche el girotondo gera un zogo praticà, e l'aveva perfina un canto d'acompagnamento, che fèva press'a poco cossì: "Tóndolo beróndolo / col campanil de Brondolo / col campanil de tera / tuti col culo per tera". 'Na "variante" al girotondo gera quela de 'na fia al centro, che doveva fare tuto quelo che le altre - giràndoghe atorno - cantava: "Dona Giulia, indove sestu stà? / Alsa i oci al çielo, / trai un salto, / tràghene un altro, / fa' la giravolta, / fala 'n'altra volta, / càvite el capelin, / fai la riverènsa, / fai la penitènsa, / daghe un baso a chi ti vuò!"
No parlémo po' del zogo de la corda, che do bambine girava cantando filastroche che cambiava da paese a paese, mentre un'altra la saltava.
El zogo de la "pièra scónta" gera fato da un grupo de bambine: una, a sorte, doveva scóndare in "posti secreti" la pieréta, fin che la gera scovà da una de lore e po' dopo el zogo continuava e ghe tocheva a altre fie.
E, per finire, un zogo in dove se pòle capire tuta la semplicità de le fie del popolo de chél tempo: a dó a dó le se tocheva el polso de la man contro quelo de le compagne de zogo, disendo: "Nespi, nenespi, nespi, nespi tu" opure "Luca, laluca, luca, luca tu", parole incomprensibili; cossì cantando le faseva tanti de quei giri fin a stancarse. El campo del zogo? La cale, naturalmente.
Ma quando che le fie arivava ai dódese ani, per lore el tempo de i zoghi gera finìo. Le doveva deventare done de casa, scomissiando a giutare le mame a fare i lavori de casa: tèndare i fantolini pi pìcoli, imparare le fassende domestiche, lavare, sèrte volte anche per ore fora in cale, su la tòla da lavare o sul mastèlo, i pani, sensa però pèrdare d'ocio i fradeléti pi pìcoli, che, beati lori!, i ghe girava liberamente intorno.

[torna sopra]