Da Verona

"Ci vol védar so mama..."

Se ga da inciodarlo ne la memoria e de fàrghene continua testimoniansa a le nóve generassioni che, ne l'orór de la shoah, è stà sterminado da l'odio nassista, tra i altri, un milion e meso de butini par la sola colpa de èssar nati ebrei!
A vinti di 'sti qua 'na professoressa veronese, Maria Pia Bernicchia, con la pietà e l'amor de mama, sgonfo de 'na poesia che esalta e comove, dopo longhe e fadigose ricerche, l'è riussida a darghe un nome, ricostruéndoghene anca el terìbile calvario. Du i era francesi, du i era olandesi, uno de la ex Jugoslavia, quatòrdese i era polachi e uno l'era italian, Sergio De Simone, nato a Napoli el 29 novenbre 1937. I nomi: Georges-Andrè, Jaqueline, W..., Roman, Lelka, Edo, Marek, Eduard, Bluma, Surcis, Ruchla, Alexander, Sergio, H..., Lea, Riwka, Roman, Marek, Eleonora, Mania.
L'è el 27 novembre 1944.
Auschwitz Birkenau: ne la baraca n. 11, ocupada da buteleti rastreladi ne i gheti de tuta l'Europa invasa da le trupe de Hitler, se presenta su la porta co' un soriso da Giuda, acativante, el dotor Mèngele autorisado a doparar, de quei campi imbugà de gente destinà a la "solussion finale", tuto el material umano che ghe serviva par i so mati esperimenti... Rivolto a quele pore creature, sbregà da i brassi de so mama, sradisà da la so tera, da la so casa... afamadi, impauridi e ransignadi dal fredo, el ghe dise: "Ci vol védar so mama, el fassa un passo avanti..." A quele parole, ne i coresini desperadi rinasse la speransa. Cusì, verso quela luce falsa se 'ncaminava 20 de quei butini; diese fémene e diesi mas-ceti de età compresa da i 5 ai 12 ani, che, caricadi su un camion da Birkenau i è stà scaricà a la stassion de Auschwitz dove a spetarli inveçe de i basi caldi de la mama i à catà quel ingiassà de la morte.
La tragica storia de i vinti martiri la rapresenta una tra le più terìbili manifestassioni de la politica nassista decisa a l'eliminassion del popolo ebreo; un genocidio, forsi el più grande a memoria de omo! Dificile par ci no' ga el pél de fil de fero su l'anima... imaginarse i longhi mesi de soferense, febri, abandoni, operassioni chirurgiche inutili a le ghiandole linfatiche e ci sa che altro!
Da l'otobre 1943 a l'autuno 1944 i è stà sotoposti ai esperimenti più sbaladi. Trasportadi po' a Neuengamme, un lager viçin a Amburgo dove 'n altro dotor, tal Heissmeyer el l'à pura infetà co' i bacili tubercolotici vivi, faséndoli tuti malar par po' studiar l'evòlvarse de la malatia. El scopo, l'èra quel de scoprìrghene el vacino. L'esperimento però l'è andà mal e alora, deluso, anca 'sto qua l'à 'bandonà le creature inocenti.
El 20 de aprìl del 1945 ne la scola amburghese de Bullenhuser Damm, i 20 pìcoli martiri, testimoni de 'n'altra cadena de terìbili deliti, poco prima de l'arivo de i soldati inglesi i è stà picadi, dopo èssar stà drogadi, su l'órdine vegnù da Berlino... "Picadi come quadri tacà al muro", secondo la spiegassion, al processo, de uno de i boia a la domanda: "Come ei stà eliminadi?" Insieme con altri giustissiadi la matina drio i è stà portadi ai forni crematori e le so ceneri po' i è stà spampanade par i campi. Quando i inglesi i è entrà in quela tragica cantina de i vinti angeli no' era restà che qualche bambola... qualche umile zugàtolo.
A racontar 'sta storia che siga vendeta al cospeto de Dio, l'è stada la professoressa Maria-Pia Bernicchia nel so libro "I 20 butini de Bullenhuser Damm", un libro stampà nel 2004, recentemente andà in ristampa col titolo: "Ci vol védar la mama... el fassa un passo avanti". El 5 marso de st'ano ne l'aula de tecnologia de l'I.C. 10 Borgo Roma Est, è stà verta 'na mostra de le taole fotografiche e de i documenti storici in argomento. L'autrice, in 'sta ocasion, l'à incontrà docenti e genitori parché 'sto libro, al qual l'à dedicado tanto del so tempo, le so energie e el so amor, el gabia da èssar un valido strumento de insegnamento par le nostre scole. Ogni ano çentenara de persone e soratuto, tanti buteleti, i ricorda i "nostri" butini vedendo el giardin de rose bianche de via Guastalla, a Milan e in altre çità italiane. El primo giardin de rose bianche l'è stado verto e intitolado ai 20 martiri davanti a la scola del massacro, a Bullenhuser Damm a Amburgo.

Ai butini una caressa
par tute le infansie robade
par i afeti sbregadi, par i fiori spicadi,
par i viagi sensa ritorno,
par tuti i progeti-omo mai realisadi
par tute le feride de l 'abandono.
par tuto el fredo, par tuta la paura
par tuto l'odio, par tuta la fame,
par tuto el non amore...

Personalmente, a nome de tute le mame, voi serar 'sto ricordo con un grassie riconossente a Maria-Pia che, gratis... par motivi soltanto etici, con passiente, certosin impegno l'à ricomposto tuti i brandèi de ste vite distrute e su quei pòri corpi despersi l'à fato la promessa de andarli a saludar, i so butini ogni ano par... passar qualche ora con lori, e caminando longo el sentier de la baraca 4-a a Neuengamme, catar-sù un sasso da quel posto tremendo, desmentegà da Dio e portarlo a Amburgo, ne la cantina, sgonfa de terìbili memorie, de la scola de Bullenhuser Damm... là, dove parfin el silensio l'è deventado pólvar.

[torna sopra]