Ciàcoe Visentine

I "Santi" de Quinto Visentin
La Beata Eurosia Fabris, ciamà Mamma Rosa, e don Ottorino Zanon, che ga fondà l'Istituto San Gaetan, xe nati o i ga vissùo in sto paese vissin Vicensa

La Beata Eurosia Fabris, pi conossùa co la menda de Mamma Rosa.

Rente a la nostra Cesa catòlica xe mensonà santo chi che se lassa guernare da 'l Spìrito Santo, dasendo senpre na man ai altri e contribuendo a far conòssare Dio al mondo. La santità se fa védare in ogni età, condission sociale e logo. Ma ghe xe loghi che xe destinài a èssare pi fortunai de altri: xe el caso de Quinto Vicentino, un Comune a 8 km da Vicensa, de cui chì se parla 'nte le pàgine sentrali, 'ndove che xe nata el 27 setenbre 1866 la Beata Eurosia Fabris, qua pi conossùa co la menda de Mamma Rosa, e 'ndove che ga abità par alcuni ani don Ottorino Zanon, el fondatore de l'Istituto San Gaetan.
EUROSIA FABRIS, (1866-1932), sposa de Carlo Barban, xe stà mare de trèdese fioli, de cui sète partorìi da ela. Mamma Rosa xe entrà 'ntel Terso òrdene Francescan, vivendo in pien el spìrito de povertà e de alegressa. Dona de fede e carità grande senpre e dopo 'ncora, la ga iutà i poareti, la ga curà i malài, la ga tegnùa inpissà la luse del Vangelo in fameja e 'nte la parochia de Marola, 'ndove la se xe trasferìa co i so genitori Luigi e Maria Fabris 'ntel 1870 e 'ndove che la xe morta 'ntel 1932.
Cressùa 'ntel clìma cristian de la fameja, Rosa Fabris la xe rivà ai so disnove ani, cò xe sucessa na disgrassia granda 'nte la casa de i so vissini: na sposa zòvane xe morta de un bruto male, lassando védovo Carlo Barban de 26 ani co do putelete, el popà ansian e un fradèo da sposare. Na situassion tragica che ga inpressionà la nostra Rosina, tanto che la xe 'ndà in sta casa prima a servir e po' sposa del védovo, fasendo sùito da mama par le orfanele.
Rosina gaveva capìo el valore de la povertà; e po', se gera par queo, anca Gesù gera stà poareto, anca se 'l gera el paron del mondo. La gaveva caro che la casa fusse neta e in òrdine, la sua la gera na povertà dignitosa; i gera ani de na forte crisi econòmica e sociale, ma Eurosia ga senpre confidà 'nte l'aiuto del Signore. Intanto la so fameja aumentava: la ga 'vùo sète fioli propi, come la Madona ghe gaveva dito aparéndoghe 'ntel Santuario de Monte Berico; a luri se xe zontà 'ntel 1917 altri tre òrfani de na so nipote morta fin che el marìo gera soldà 'nte la Prima Guera Mondiale.

Don Ottorino Zanon, el fondatore de l'Istituto San Gaetan.

Rosa gera na persona bona e generosa, la faseva spesso da baja a puteli, ghe daseva ai pi poareti late, ovi, minestra, che portava personalmente de scondon, se pole dire che, sti magnari, se li cavava via da la boca par dàrgheli. De la so numarosa fameja, tra fioli sui e 'dotài, do xe morti da pìcoli, altri do, don Giuseppe e don Secondo Barban, xe deventà preti, un altro, Angelo Matteo, xe stà francescan co 'l nome de padre Bernardino Barban; Chiara Angela, la prima adotà, xe 'ndà Suora de la Misericordia a Verona; un altro xe morto seminarista, 'n altro 'ncora xe stà francescan co 'l nome de frate Giorgio; i altri sie de i conplessivi trèdese fioli, se xe sposà; a tuti Mamma Rosa ga insegnà a sercare, sensa fermarse gnanca na s-cianta, la volontà de Dio, se i voleva salvarse l'ànima.
Mamma Rosa xe morta l'8 genaro 1932. El 3 febraro 1972 xe inissià 'nte la Curia Vescovile de Padova el processo informativo par la so beatificassion, che se xe concluso el 23 aprile 1977. El 22 giugno 2004 la conpetente Congregassion Vaticana, davanti a papa Giovanni Paolo II, ga riconossùo la validità de un miràcolo otegnùo par mèrito de la so intercession. La xe stà beatificà el 6 novenbre 2005 a Vicensa soto l'atuale pontificato de Benedetto XVI. Da 'lora la diòcesi de Vicenza la ricorda el 9 de genaro.
In mèrito a don OTTORINO ZANON (1915-1972), trasferìo co la so fameja da la natìa Anconetta a Quinto 'ntel 1921, bisogna dire che 'l ga oparà par far conòssare e far amare el Cristo in tuto el mondo, scomissiando la so mission salvificante 'ntel 1940 cò 'l gera capelan 'nte la parochia de Araceli, a l'època in periferia de Vicensa. Za 'lora el gaveva visto co gran preocupassion la miseria in cui le viveva le fameje de le barache da drio a 'l Cimitero Magiore. La mission sielta 'lora da don Ottorino xe stà quea de racòliere i tosati de chel quartiere de periferìa de Vicensa, par educarli al laoro e darghe na oportunità de riscato e de liberassion da la tràpola de la miseria. El 28 marso 1951, dopo ani de fadighe e de sforsi, xe stà ereta l'Associassion Relijosa Maschile Istituto San Gaetano co sede a Vicensa.

[torna sopra]