|
Proverbi comentài in venessian
Có no se fa la seconda...
"Có no se fa la seconda se mor in carega"; la seconda xe la saca che contien ’l liquido amiotico e, se la puerpera no la façeva, la moriva d’infession.
Mi go sentìo mia nona tante volte dir de ’na sposa che la gera morta de parto, parché la gaveva fato ’na seticemia. La morte partorindo ’na volta gera frequente, parché no ghe gera cognission né igene.
La Serenissima gaveva sempre ’vùo un ocio de rigurdo par la salute de la gente e la saveva ’l fato suo, basta pensar ai Lazareti e a le quarantene contro la peste, ma i tenpi gera quei che i gera.
Par çercar de contegnir le morti da parto, e regolamentar le tante traficone che s’inprovisava comare, fin dal 1689 ’na Parte stabiliva che le levatrici gavesse da saver lèser e scrìver parché, par èsser autorizàe al mestier, le done doveva sostegnir un esame dopo ’ver studià ’l tratato Della comare.
Prima d’èsser amesse a l’esame le doveva frequentar par do ani le session anatomiche de la so arte a la scuola de canpo San Giacomo e po’ le gera interogàe da un protomedico e do comari "patentate", in presensa de i Priori del Colegio de i Medici. Gera za calcossa ma no bastava de sicuro.
Lèser ancùo come che i cristiani se "curava" ne l’Otoçento xe da méterse le man ne i cavéi e da domandarse come mai ghe fusse tanta zente che deventava vecia.
Bisogna propio dir che i:
"gera nati co la camisa",
modo de dir che sconde ’na superstission, una de le tante. Nàsser co la camisa, cioè la membrana amiotica, gera un strighesso che ghe infondeva poteri sopranaturali ai fortunài. Più de qualche comare o de qualche mare, che conservava la "seconda", xe finìe soto le sgrinfie del Santo Ufiçio, acusàe d’eresia. No parlemo po’ de chele mare che scondeva la so menbrana su l’altar parché ’l prete, sensa saverlo, la benedisesse par farla deventar più potente e protèger mègio so fio, par esenpio se ’l gera in guera. No so’ drio inventar gnente, ghe xe i ati de i processi che parla ciaro.
Anca le partorienti ’na volta passava un "esame": la comare meteva ’na rosa de legno in un vaso de aqua santa davanti a ’na pitura de la Madona. Se la rosa se versiva gera tuto a posto, sinò la pareciava i feri parché ’l parto sarìa stà difìçile. Se fin che la dona partoriva la rosa se serava man man che ’l ’ndava ’vanti, tuto ’ndava ben, sinò...
La "sala parto" gera fata da ’na carega, portada da la comare, e bisognava tignir la testa de la partoriente fracada verso ’l basso par no farghe vignir fora ’l colo grosso o ’l gosso, come le furlane che partoriva de zenocion.
Quando che ’l parto se prolungava massa se ghe façeva béver aqua co l’ogio e semi de cedro o camamila sbrovente.
Anca se tuto ’ndava ben, i perìcoli no gera miga terminài: bisognava difènder la dona e ’l putelo da un spirito malvagio: La Pagana che, se gnente gnente podeva, li sofegava tuti do.
E po’ guai a desmentegarse de méter sora ’l leto do cortèi in crose e inpissar el lumin!
Parò tante done no moriva solo fin che le partoriva, ma anca in quarantena par quele che dopo sarà ciamàe frévi puerperali.
Anca par ’ste tragedie i veci gaveva ’l so modo de dir:
"par quaranta giorni la dona da parto ga ’l caileto sula porta".
El caileto gera ’l strumento che serviva par el trasporto de le bare. (1)
(1) .Bernoni, cit. , pag.21.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale de Mario Klein
Bastarìa on grazie
Se ga perso quasi conpletamente la bona usanza de ringraziare e de mostrare gratitudine verso chi te ga dà la vita, te dà na parola, on aiuto, on gesto o te fa on piazere
de Mario Klein
|
