Da Maran Lagunare (UD)

Giovanin de Grào

"Parché Quatrooci?" ghe go risposto al gresan ’pena che’l me ga dito de ciamasse de cognome Quattrocchi.
"Par via de me pare sicilian" el ga dito, e: "El ga fato un grumo de ani Finansa a Porto Buso, fin che cognossùa me mare che la biteva con la fameja qua in Anfora, in tel ’39 la ga maridada."
Che xe stranba che xe la vita. Adesso no xe più le Finanze a Porto Buso ma co vevo scuminsiò lavorà con Taverna tel ’59, che portevo su e zò i operai e el material a Sant’Andrea col Cherso le gera, e le veva durò ancora par un bel tòco a Porto Buso.
Ricordo ancora la matina de quel luni che sul pontìl in Aussa Corno gera montài a bordo i do fiòi gresani, Aldo e Marieto insieme i operai. I me veva dito che i biteva in Anfora de Porto Buso e se par piassèr podevo portali de oltra che i veva de ndà a scola.
Siben che son de Maran no gero mai stò in Anfora, co passevo el porto col Cherso pa ’ndà in mar fevo fadiga vede la scola, de cussì pìcola che la gera. Metùa in ponta del brasso là che co riveva i sirocài le onde le ’ndèva sbate insima, ma i gera drio finì la scola niova, metùa più a la bonassa in meso le case, anca se romai...
Qualchi ano prima sì che gereva bisogno de scola niova; i gera squasi in trenta! Riveva là in Anfora duti quìi che gera sparnissiài par i casuni del palùo, ma ’pena finìa la scola gera restài sol Aldo, Marieto, le sorele Silva e Pierina e altri do tre fiòi, co romai no la serviva più.
Co Ulderica Da Pozzo la me ga telefonò che la veva caro ’ndà fin a Porto Buso par fa un lavor fotografico, gero curioso de tornà là dopo tanti ani. Ulderica la xe brava. La ne veva invitò mi e la Elda a la so mostra fotografica in Vila Manin, là gera tanti cani grossi de la Regiòn e de la Provincia co la veva presentò la mostra in quela doménega.
Xe passài squasi sinquant’ani de quela volta che vevo portò a scola Aldo e Marieto. ’Desso le casete del Duce là che i biteva le xe metùe a posto e le ga dute i cessi. Conpagno che ga fato i maranisi con i casuni, anca i gresani in Anfora le usa par fa magnàe, passà zurni de ferie d’istàe.
Ulderica la gera senpre che la schisseva fotografie: cessi ruvinài, batele drite e ribaltàe in seco, anca la scola vecia la ga volesto fotografà, che par trovala, ne ga tochesto caminà, sbisigà in meso i sterpi.
La caserma coverta de albri e de spini siben la fussi un bel tòco più granda, ’mo bassilò istesso un bel tòco par trovala.
Qualchi pescaòr el steva metendo posto la rete in batela, anca là de la scola mai doprada un pescaòr el gera drio netà la passelera. Sporca de erba e de gransi, de quele bele niove, pusada su i ciodi, la steva in tiro sul muro de la scola.
Ulderica con un bel fà la ga scuminsiò faghe domande. Giovanni Quattrocchi ’l ga dito de ciamasse el gresan pescaòr in pensiòn nato tel Quaranta de pare finansa, sicilian, e... "No xe gnanca un pesse in palùo" el se gera lamentò: "Se vévomo na volta sta rete, massima in sta stajòn... (ultimi zurni de novenbre co le passere grasse e piene de vuvi le scuminsia portasse in mar, ’ndà in Golfo de Trieste parché a Nadal le ga de butà i vuvi sul fundi) varìssimo ciapò barche de pesse." El gera contento parché ghe vevo do rasòn.
"Me nuni Clama i steva ben de fameja e luri i biteva proprio là" el veva dito pontando el déo verso na casa arente la scola. "Ghe vansèva senpre qualcossa par jutà quìi altri. Me pupà el gera finansa qua a Porto Buso e dopo maridada me mare i lo ga trasferìo indruman a Venessia. Romai vevo fato i amighi là, e co me pare el veva dito che ne tocheva tornà in Anfora, no volevo, e sol me mare la gera contenta de tornà là de i nuni. Sete ani ’mo fato a Porto Buso e co i veva sganbiò de posto, mandò a Grào me pare vevo quìndese ani."
"Alora te cugnussi Marieto, Aldo e so sorele: i gereva anca luri in Anfora in quìi ani che te ga mensonò?"
"Madona che li cognosso! Aldo e Mario i ga ciolto el ‘Diamante’, la me barca. Son qualchi ano più grando ma ricordo che dopo i veva fato anca luri le scole qua."
Gereva mesozorno, Giovanni el ne veva invitò a casa sua e ’pena verta la porta un bonodòr me veva ciapò el naso e inpignindo duta l’aria: "Me fio el xe cuoco" el ga dito Giovanni. "Eco parché naso prufumo de bon" vevo dito saludando al zòvene che ’l gera drio vardà la tecia.
Mensonando robe vece de fameja, Giovanni el veva pontò el déo verso el muro: pusada steva la fotografia de so mare e do sorele, con soto scrito "Pititele" 1976, la nomenansa de fameja.
Come Maran e in altre bande, almoto anca a Grào useva doprà le nomenanse.
Saludò Giovanni, montài sul scafo mi e Ulderica vemo lassò l’Anfora, scapolò el porto in palùo el gera calmo come l’ojo e de untan, intanto che ’l ne vigniva incontro e Ulderica la ghe schisseva fotografie: vedevo el sol petaghe insima: scaldà la tore milenaria, i visinài... la pescarìa vecja de Maran.

[torna sopra]