|
Le storie de Nando
Doreta de Ponte
 |
| Gente de Pontelongo in via Roma, in te na foto de i ani ’20. |
Doreta, ani quatòrdese, la stava a Teranova, a do passi da la cesa de S. Geminian, ma essendo stà assunta a la fabrica de sùcaro, dita de i Montesi (ani prima la xera de na dita belga) tuti i dì a l'alba, la se incrosava so l'altra strada de Coressola e, fato on sentenaro de metri, la rivava a le casete dite "poarete" dove la spetava la siora Marisa co so fiola, e coà, ciapà ’l stradon de Vila del Bosco, co on vecio birocio, dopo sincoe minuti, le xera a Pontelongo .
Doreta, la xera stà messa al reparto manco fadigoso, cioè coelo de controlare i sachi de juta pi magagnà e scartarli, passàndoli a ’n’altro reparto, dove ghe laorava Remigio, on toso che stava a poca distansa da la casa de Doreta, e che a fine laoro i se ’ncrosava a dirse do ciàcoe, e dopo zo a casa, che altri laori spetava i so brassi. Co ’l passare de ’l tenpo, Doreta la se gavéa fato na tosa bela e sinpàtica, e no mancava i tosi che par strada i ghe sigava:
"Bionda! Xe stà to mama a farte cussì de slanguore?"
Doreta la ridéa de gusto e a la sera la ghe contava tuto a Remigio, co ’l toso che se ’ncanava de bruto, e alora Doreta, la lo strucava forte al core, diséndoghe pian:
"Remigio, toso mio, solo a ti afiderò ’l me core, par tuta la vita!"
Xera passà on bel tòco de tenpo, co la storia de Remigio e Doreta che, so promessa de so mama, Idelma, ’l toso gavéa sentenzià che la gavarìa portà a l’altare apena mucià na s-cianta de schei; ma, de fato, Remigio, ’l laoro no ghe piaséa e pi de coalche volta ’l se gavéa butà malà, fintanto ’l xe stà visto a Dolfina, na pìcola frassion de Martinele, scoasi a le porte de Cavarsare. La verità xera che ’l toso el gavéa trovà on sbandà, sensa casa né fameja, e de bruto sto coà, lo gavea ’nzucà co laori non del tuto ciari, ma reditissi, e par farse crédare, ’l ghe gavéa mostrà on ròdolo de schei, fruto de l’ùltima bravada .
Cussì, Remigio, do dì l’andava a laorare, altri ’l se dava malà o ’l tirava fora altre scuse, fintanto la diression de ’l sucarificio ghe ga dà ’l benservìo, cussì, có Doreta xe vegnù a saverlo, la ghe ga fato na pantomina, al punto che co le lagreme ai oci, tuto de on fià la ghe ga dito:
"Mi, go bisogno de na man salda, no de on marìo sensa arte né parte!"
Anca ne la fabrica le robe no le ’ndava puìto parché, essendo ne ’l 1914, se gavéa ’nciodà ’l perìcolo de na guera e i servissi i xera carenti, come xera fiapa la dimanda de le conpravendite, tanto che la stessa diression de ’l sucarificio se ga legitimà de lassare so la strada na quarantina de operài.
Remigio, dopo la scoasi barufa co Doreta, no ’l se gavéa pi fato védare, tanto che so mama la ghe brontolava drio:
"Daghe on tajo, tosa mia! La vita la xe dura cussì, figurémose co on pelandron!"
Ma Doreta, la xera ’ngnocà de Remigio, no par gninte pi de na so amiga lo tirava in balo, faséndoghe ’l rabeghin in core suo; cussì, de scondon la se trovava dopo le funsion in te la cesa de Coressola, e pi volte, no sensa ciaparse on scufioto da so mama, Doreta, diséndoghe de ’ndare a le funsion co le amighe, la se faséa a pié la strada che da Coressola la portava a Brenta d'Abà, e tacà al cason sbandonà, la se desperava co Remigio; la lo suplicava de métarse so la bona via, la se ’nsenociava in làgreme spacàndose ’l core de tormenti, e col toso che ghe prometeva mari e monti.
Pareva davero che Remigio ’l gavesse fato tesoro de le parole de Doreta, parché ’l se gavéa trovà a fare ’l stalon a Dolfina, da on sioroto, che tra l'altro, ’l ghe gavéa anticipà on fià de schei, ma la verità xera che Remigio, co coel laoro, ’l scondéa de le malafate, tanto xe vero che ne i paesi tacà, da on tòco la zente denunciava ai carbinieri furti in continuassion.
El dì de l'Assunta, dopo la granda procession so le stradele e fin so la passerela so ’l Bachilion, Doreta e Remigio, no sensa sentire a le spale i brontolamenti de la Imelda, i se ga slongà drio l'àrsare de porto Peroco, e dopo, vanti ’ncora fin a pèrdarse ne i canpi dove xera alto ’l formenton.
De drio on covon de paja, Doreta e Remigio butà par tera, i vardava ’l celo, co seleghete e rondinoti che lo tajava con svoli a uso de ricamo, e na bavesela de vento faséa sbassare pian le trece de on sàlise.
Doreta la ’nsistéa che Remigio ghe contasse del so laoro, e el toso se sbotonava a contarghe che ’l so paron ’l xera contento de lu, e che a fine setimana el ghe slongava na mancia; e cussì disendo, Remigio ’l ga tirà fora da la scarsela on mucio de schei... Alora, la tosa lo basava e strucava, mentre Remigio se dava na aria de vero paronsin che sa cossa fare e come ’nbonire ben le tose ’ngenue!
A Cantarana, Conca d'Albero e altri paeseti tacà, i contadini gavéa ’l so bel dafare a denunciare a i carbinieri furti de vedèi e altro, e sti coà savéa che i xera de na banda specializà, ma anca in ganba, tanto che no i riussiva a trovarghe ’l cao, anca se secondo el so ragionamento, la banda dovéa avere on magasin ben sconto ne le vissinanse. Verso sera, dopo basi e caresse, Remigio, in zenocio davanti a Doreta, ghe ga fato la promessa de sposarla apena possìbile, e la tosa par la contentessa, lo ga lavà de basi, tornando a casa cantando de gusto.
Na doménega, ’l pàroco de la cesa de Pontelongo, don Celio, sensa fare nomi el ga contà ai fedeli che a Codevigo ghe xera stà na sparatoria tra banditi e carbinieri dopo on tentativo de robare del bestiame, e che ne sto scontro de sicuro xera resta ferìo on bandito e che ’desso i lo sercava ne i dintorni. Verso sera, senpre ne la stessa doménega, Doreta, dopo disnà la ga vossùo fare na passegiata portàndose verso on posto, dito "el bosco" in coanto ghe xera racoanti àlbari, na canaleta, siepi de more e trosi che portava so i canpi, e coà, la se ga sentìo ciamare: na vosse che la ga subito riconossùa: coela de Remigio. Soto on plàtano, Remigio xera in te na posission cofà on gato có pìsola, e se lamentava, tanto che Doreta, ga tentà de farlo alsare, ma ’l toso ga tirà on sigo. Alora, Doreta, se ga ’ncorto che ’l perdéa sangue da on fianco, che ’l so toso no gavéa fià de parlare, ma che sforsàndose ’l ghe ga dito:
"Tosa mia, la xe finìa! La rapina xe ’ndà male e ’desso so drio morire; ma prima lassa che te diga che te amarò par senpre." Cussì disendo, ’l ga sarà i oci, soridendo...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale de Mario Klein
Bastarìa on grazie
Se ga perso quasi conpletamente la bona usanza de ringraziare e de mostrare gratitudine verso chi te ga dà la vita, te dà na parola, on aiuto, on gesto o te fa on piazere
de Mario Klein
|
