|
Editoriale
El bosco ga perso la so "vose"
La montagna veneta no sarà pi la stessa. Ai boschi de l’Altopiano ghe mancarà la quinta stajon, quela che ghe regalava el "Grande Vecchio", senpre lì a vigilare e a difèndare la natura e le so creature
 |
| Mario Rigoni Stern, morto a 86 ani el 16 giugno, sepelìo el 17 nel cimitero de Asiago, in forma stretamente privata. |
Par la sconparsa del nostro grande scritore, MARIO RIGONI STERN, l’ànima de l’Altopiano de Asiago, el testimone de un discutibile e discusso Novecento, noaltri de Quatro Ciàcoe no ghemo bandiere da métare a mez’asta o da listare a luto, no ghemo òrgani aministrativi da farghe fare un minuto de silenzio, ghemo soltanto sta parola scrita par fissare un pensiero poareto, un ricordo da pìcoli schincapene che pur cata el corajo de dirghe: "Grazie, Maestro!"
E che Maestro! Un contastorie de lusso, non romanziere ma naratore, un omo speciale col dono de saver racontare la storia, la vita, la vita dura del popolo de la montagna. Un omo in guera contro ogni guera, un conbatente in difesa de la natura e de l’anbiente.
La so profonda umanità, la so poesia soteranea, el calore umano che senpre conpagnava i so gesti e i so passi leterari ne rende ’ncora pi doloroso el distaco. No sentiremo la so parola concreta, inteligente, persuasiva e sapiente.
No lo incontraremo pi davanti casa, drio scoltare el sbacio matutin de i fagari, drio vardare la careza de i osèi ai làrici del bosco o el dano de qualche birbo capriolo rivà zo a magnarghe le coste te l’orto. No lo vedaremo pi parlarghe ai zóvani, insegnarghe a dire de nò a tute le robe che xe contrarie a la so cossienza e a recuperare el senso de Dio che ’l xe drento de noaltri, el senso de Patria, che ghe n’emo senpre pi bisogno. No lo gavaremo pi davanti par farghe domande su la so taja de scritore e lu a rispóndarne che: "a scola i me ga insegnà l’analisi logica e l’analidi gramaticale e po’ un amico me ga spiegà che chi scrive difìssile tante volte no i ga gnente da dire, parché chi ga calcossa da dire el sa scrìvare le robe difìssili in maniera sènplice. Come ne la scultura, scrìvare vol dire tirare via parole inutili, lassando l’essenziale: l’emozion!"
Ma, se per lege de natura, no podaremo avere sto Mario Rigoni Stern qua, resta la so nobile storia, a disposizion de tuti quei che ga cuore puro, amore par l’omo e rispeto per la natura.
Xe qua l’istà, ’ndaremo al mare e ai monti, faremo el pieno de sole e de verde, ne conpagnarà el ricordo de sto "poeta universale", la "voce del bosco".
Forse sarà el caso, come el ne ga senpre racomandà Rigoni Stern, de spetare l’alba in riva al mare o sora un prà de montagna, almanco na volta ne la vita, e de fermarse ai bordi del bosco par inparare a "osservare, ricordare e raccontare" la poesia del creato, el silenzio de la natura, la voce de la speranza.
Questo xe e sarà el nostro modesto tributo de afeto per il "sergente della pace" che tanto se ga batù anca per le tradizion e pa ’l dialeto.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El bosco ga perso la so "vose"
La montagna veneta no sarà pi la stessa. Ai boschi de l’Altopiano ghe mancarà la quinta stajon, quela che ghe regalava el "Grande Vecchio", senpre lì a vigilare e a difèndare la natura e le so creature
de Mario Klein
Da Verona
Quando le done le faséa "spesa"
de Wanda Girardi Castellani
|
