|
Da i Coli Euganei
La Fiera de San Lorenzo
 |
| Eco la piassa el dì de la Fiera, col monumento a San Giusto e i tenduni de le giostre. (foto Danilo Bellotto) |
Par i nostri sogni tusiti, la parola "Fiera de San Lorenzo" la sonava cussì inportante da farne fare i salti de contentessa. E cussì se spetava tuto el tenpo de l’ano chel dì, sercando de èssare pi boni par meritarse el gelato, la granatina o la feta de anguria. "Se no te stè bon, varda che no te conpro miga el gelato el dì de San Lorenzo" ronzava in te le rece la ose de la mama. Magari adesso sirà fadiga crédare, che par magnare el gelato se spetasse el dì de la sagra o queo de la Fiera famosa de San Lorenzo, ma la verità la gera proprio questa. Me vedo ancora adesso, co i oci de la mente, col vestitin celeste fato a busi de ave, el coletin bianco e on fioco de nastro rosa sora la testa, arente ai me fradeiti. E se partiva a piè, par man de la mama che la faseva fadiga a strénzare le nostre manine parché se gera in tri e alora se faseva el turno. "Va avanti ti, che te si la pi vecia" me diseva la mama, "senò te me inbalsi e te pesto i piè!" Ma la man de ’a mama gera la me sicuressa.
Na volta pi grandeta eco che a la Fiera se ’ndava co le zie o, mèjo ancora, col nono Giacomo. De la Fiera, insieme co la mama, me xe restà inpresso "l’omo de i gelati". El rivava in bicicreta, spenzendo la so barachina che, secondo noantri tusiti, la scondéa lì drento na specie de tesoro, che se spetava de védar vegner fora a oci spalancà. L’omo de i gelati el gavéa na jacheta bianca co i botuni dorati e in testa on baretin bianco col frontin blu da farlo somejare a on marinaro. El ne vardava co du oci celesti come el celo e la vose gera come na caressa quando el ne domandava: "Che gelato voto? Fragola o limone?" El gusto de chel gelato gera on qualcossa de cussì bon da ricordàrselo ancora.
Subito dopo come inportansa, eco che vegnéa la "giostra a cavaini". Ogni toseto, a chel tenpo, sentà sora el cavain bianco, co i oci fissi a quei de so mama che lo seguìa lì in parte par darghe corajo, el se sentìa on re. Ma la mente me regala adesso i rumori che se sentìa in te la note prima de la Fiera. Passava gente, drio la strada, che gera partìa da i paisi arente, ma anca da lontan. I partiva de note par rivare a ciaparse el posto pi beo. I traversava le coline conpagnando le so bestie da vèndare a la Fiera. Chi gavéa la cavareta, el musso, el vedèo o la vacheta e parché i caminasse in pressa, i li ciamava forte par nome. Sì, parché ogni bestiola la gavéa el so nome e diséndoghe: "Forsa, dài, avanti..." la caminava de pi.
Là in piassa, ghe gera i mediaturi che quando l’afare gera fato i se smacava le man tuti continti de aver cussì ciapà la mediassion. Me vien in mente adesso, anca na femeneta che passava arente a la nostra casa apena che faseva ciaro, prima che levasse el sole e noantri curiusi se gera là a vardare chi passava. La gavéa el bigòlo in spala e tacà so le reciare, du grandi sisti da staro pieni de ovi, che la portava a vèndare in Fiera. Me pare ancora de védarla, col so vestito moro, longo fin par tera, la so traversa, senpre mora, parché la gera quea da festa, petenà col so cocon e co on’aria contenta la ne saludava racomandàndone de saludare el nono Giacomo.
Ma el ricordo proprio pi beo de tuti, me xe restà queo, de quando, a man del nono, rivava in tel canpo de la Fiera e po’, sentà drio la riva co meza anguria sora i zenoci, se magnava de gusto. El nono tirava fora da la scassèa de la jacheta el sculiero e na ciopa de pan biscoto, destregolàndola drento: che bon, gente, che boni i bocuni de pan e anguria! Tuti, lì torno, magnava sta specialità. Chi mai gavéa sentìo on gusto pi bon? Me pareva de magnare miele, rosolio e, insieme, sculieri de sole, bocuni de vita e de alegrìa. E i coluri de le granatine, quanto bei gèreli? Me pareva che lì, in tel banco de la Fiorasa (cussì se ciamava la parona) fusse petà basso l’arcobaleno. In mezo a la piassa ghe gera anca el banco de la pesca de le bànboe e chi gavarìa pi desmentegà la vose che sigava forte: "Venite, venite, ogni giro un premio, ogni tre giri un regalo..."
E l’odore de le spumilie sol banco de la sagra? E el colore bianco, proprio come on baloco de neve, del sùcaro filà? La faséa fadiga la mama a tirarne verso casa disendo: "Svelti, svelti, xe ormai tardi!" A Fiera finìa, rivava a casa nostra l’omo col mas-ceto picenin conprà dal nono. "Vu, Giacomo, si on galantomo – el diséa – e se non ve basta i soldi ve lo dago anca a soldi spetare". Ma el nono no voléa aver dèbiti e el pagava el mas-ceto meténdolo drento al porsile e ciamando tuti a védarlo come se el fusse na spece de tesoro. Pareva de sentire in te l’aria l’odor de le grasàpoe e qualcun diséa: "Questo el farà sens’altro el grasso alto na spana!" Tuti gera continti, in te chel dì de la Fiera. Anca i morusi che i passava dopo disnà tegnéndose par man. Me par (se ricordo ben) che on tenpo i dovesse rivar casa prima del son de l’Ave Maria. So de le vèce carte, go catà scrito qualche notissia curiosa; vedemo la prima a propòsito senpre de sta Fiera: parché i ghe tegnesse in Fiera el posto pi bon, i ghe regalava al guardian on salado o na anguria. Eco nantra notissia curiosa: on comerciante gavéa conprà arquante pezze de stofa, che el se gavéa messo soto la testa come cussin par dormire drio l’àrdare del canàe parché ghe gera vegnù sono. Però na volta svejo, dopo averse repossà, le pezze de stofa no ghe gera pi, parché fin che ’l dormìa, i ghe le gavéa robà. Gnanca che ’l gavesse el sono targo (dirìa el nono).
Po’ i contava anca, che a la Fiera qualcun fusse ’ndà a conprare le corde de violin par tajare la polenta a fete.
Ma ste notissie, pur essendo curiose, penso che le sia de tanti ani prima del me tenpo de toseta. A noantri, a la fine de la Fiera, ne bastava aver fato du giri de giostra, magnà na feta de anguria on gelato e tre spumiliete in man, drento on scartosso e se gera i tusiti pi siuri del mondo. Anca adesso, el dì de la Fiera, la giostra la gira, la gira, masenando i ricordi, che ne sa regalare el valor de na vita.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El bosco ga perso la so "vose"
La montagna veneta no sarà pi la stessa. Ai boschi de l’Altopiano ghe mancarà la quinta stajon, quela che ghe regalava el "Grande Vecchio", senpre lì a vigilare e a difèndare la natura e le so creature
de Mario Klein
Da Verona
Quando le done le faséa "spesa"
de Wanda Girardi Castellani
|
