|
Da Schio (VI)
Na tore antica
 |
| La Tore scaligera in piassa a Enego |
Giorni indrìo, sercando de métare un fià in ordine la me biblioteca, me ze capità fra le man un volumeto che, evidentemente, el zera nà a finire sconto drìo la fila de libri. Lo go vardà co’ curiosità. La copertina, che zera na vera e propia fotografia, la riportava in primo piano na strissia de pra, velà da na nebiolina leziera; dopo se vedéa, in salita, un bosco de pessi, anca quelo co’ la nibia, che la vegnéa a dare a la sèna quasi n’atmosfera de mistero. Conpletava el paesajo na fila ben visibile de monti, che fursi la dovéa trovarse distante, al de là de na valada.
Fin che stavo lì a pensarghe sora come mai gavesse quel libro, eco che da le pagine scapa fora na cartolina co’ un stema araldico e, in grande, la scrita "Enego – Ghènebe – 1310/1807". Sul retro ghe zera na data, 7/3/1993, e na scrita a man: "Concorso – Storie su l’Altopiano". E ’lora me ze vegnù in mente tuto, in modo ciaro e lanpante. Zera stà ’ntel 1993 che gavevo ricevudo el bando de un concorso de poesia e prosa promosso dal Comune de Enego, uno de i Sete Comuni e l’Altopiano de Asiago. In sta bela citadina ghe son stà un saco de volte, anca parché là go diversi parenti, ma a Enego invesse no’ gavevo mai ’vudo ocasion de narghe. El se sentiva anca poco nominare; el disinteresse ne i so riguardi da parte de i me concitadini el zera anca dovudo al fato che Enego se trova sul lato estremo, a levante, de l’Altopiano, e par questo distante da Asiago; fursi el pole èssare pi frequentà da i bassanesi e altri abitanti de la valida del Brenta.
Comunque, tornando a la me storia, gavevo partecipà al concorso propio parché, pur conossendo ’bastansa ben i altri comuni, a Enego no’ ghe zero mai stà. E fursi sta volta podéa èssare quela bona par nare, in ocasion del concorso, a visitarla.
Qualche tenpo dopo me ze rivà na letara co’ la comunicassion che al concorso in parola me zera stà assegnà un premio par la poesia "Le rogassion de Asiago".
Grande giubilo ma po’... e come gavarìa fato a portarme a Enego dato che no’ go la machina e nare co’ la coriera zera massa conplicà? Prima che l’entusiasmo calasse dal tuto son ricorsa a un sistema za sperimentà. Go telefonà ai organisatori del concorso domandando se fra i premià ghe fusse, oltre a mi, qualcheduni da Schio o comunque da la provincia de Vicensa. Me ga risposto na siora gentilissima, precisàndome che da Vicensa, dopo de mi, ghe zera solo un serto sior Domenico (no’ preciso el cognome, par particolari motivi). Me son sentìa slargare el core; el zera infati na me vecia e sinpàtica conossensa. Sensa perdare tenpo lo go ciamà al telefono, spiegàndoghe tuto e domandando se el podéa darme un passajo. El me ga risposto: "Sì, sens’altro. Dato che gavemo in programa de nare a la premiassion mi, me mojere e un amico, cussì el quarto posto el ze par ti." Lo go ringrassìà de core restando d’acordo che se gavarìssimo telefonà ancora par le ultime intese. Pensavo de aver risolto el problema, ma na stimana dopo el me riciama diséndome che ghe zera de i canbiamenti al programa previsto. Se tratava che el gavéa ricevudo l’invito a partecipare a na festa de fameja proprio il dì dopo a quelo de la premiassion (lue el zera nativo da na contrà vissin a Enego) e cussì co’ so mojere i gavéa deciso de narghe e de fermarse par qualche giorno.
"Ma no’ sta’ a preocuparte parché gavemo risolto la question in sta maniera. Nemo su a Enego co la machina del me amico e partecipemo a la premiassion. Finìa quela, mi e me mojere se va in casa de parenti e invesse el me amico te riporta a Schio."
Son restà un poco incerta: "Ma che persona zela el to amico?" El se ga messo a rìdare: "No’ aver paura, se trata de un professore, gentilissimo e de grande cultura."
Cussì el sabo seguente me son trovà a afrontare l’aventura. Come senpre, me son godù un mondo a vardare, ’ndando su par el Costo, el panorama che se slargava sempre de pi. L’amico de Domenico el zera na persona sinpàtica, coreta, passionà de poesia. Passà Asiago, senpre piena de gente, se gavemo direti verso Enego. Dopo qualche chilometro el paesagio ga scomissià a canbiare; ze finìa la distesa de pra e se ze passà fra sime rociose, spesso co’ forme strane. Par gninte el monte Fior no’ el vien ciamà anca "Città di roccia". Finalmente semo rivà a Enego. Zera daromài su l’inbrunire e no’ se vedéa ben el paese. A un serto punto go esclamà: "Ma cosa ze quelo?" Infati davanti, dopo aver fato na curva de la strada, ze conparsa na tore alta, coronà de merli, che no’ gavarìa pensà de trovare ’nte un posto de montagna.
"Quelo" ga spiegà Domenico "el ze el famoso Grabo, la tore scaligera che tuti su l’Altopiano conosse. Quando che i signori Della Scala, paroni de Verona e altro, i ga ocupà sti teritori qua, i ga vossudo farse un castello co’ na alta tore, el Grabo par l’apunto, che ga resistìo fin ’desso."
"Eco", go dito mi "parché el me ga maravejà. El ga un stile medioevale che no’ sarìa adato par el paese. D’altra parte, se i lo ga fato i veronesi..."
Intanto zèrimo rivà a le scole, ’ndove se tegnéa la premiassion che ze stà fata ’nte na sala co’ el sofito de legno, tuto laorà che ’l zera na belessa. La cerimonia ze nà ben, el pùblico ne ga coerti de aplausi. Có semo nà fora zera scuro orbo e ’lora gavemo saludà tuti, conpresi Domenico e so mojere, che i se fermava, a semo montà in machina par tornare a casa.
Credevo che l’aventura fusse finìa e invesse... Rivà a Asiago, deserto che no’ se vedéa in giro gnanca un misero can, l’autista ga ciapà na strada che ghe paréa d’aver fata prima ma invesse se gavemo trovà ’nte un posto che no’ zera quelo che se voléa. Tornà fin davanti al municipio, ciapemo n’altra strada ma col stesso risultato. No’ savìvimo se rìdare o piànzare, ne paréa de èssare capità ’nte un labirinto. Finalmente da na casa ze vegnù fora un giovanoto e cussì gavemo possudo domandarghe quale zera la strada da tore. El ne ga dà tute le informassion e finalmente se gavemo messi su "la giusta via".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El bosco ga perso la so "vose"
La montagna veneta no sarà pi la stessa. Ai boschi de l’Altopiano ghe mancarà la quinta stajon, quela che ghe regalava el "Grande Vecchio", senpre lì a vigilare e a difèndare la natura e le so creature
de Mario Klein
Da Verona
Quando le done le faséa "spesa"
de Wanda Girardi Castellani
|
