|
Tradission
La sagra de la siola
Semo deventà un popolo de festajoli: ogni ocasion xe bona par catarse e fare baldoria; no sarà miga che volemo desmentegare le rogne e le preocupassion ca se catemo de vìvare tuti i santi dì? Na volta ghe jera la sagra del paese: ogni paese, el dì del santo patrono, faseva la so festa, una e una sola par tuti, ’desso invesse ogni associassion e grupo ga la so festa. La Pro Loco par ciamare zente da pi parte e métare in mostra i prodoti e i laori del paese, le socetà sportive par tirar sù schei e poderse iscrìvare a na categoria superiore, la Biblioteca Comunale e le associassion culturali par ricordare le tradission e el modo de vìvare de i nostri antenati... Cussì catemo la sagra de l’ua dove se magna ua e se beve vin bon; la sagra del gnoco dove su na setimana sparisse quintài de patate; la sagra de le castagne, de le sarese, de le zìzole, la sagra de la bira, de la papardela... e chi pi ghin’à pi ghe ne zonta.
Mi me son fato na domanda: "Come mai nissun ga mai pensà de fare la sagra de la siola? Forse parché la sarìa na festa dove se piansarìa assè, visto che par fare na bela sagra bisognarìa tajàrghene de siole!? Cussì có tuti pianze, la podarìa vignere scanbià pi par na velia funebre che na festa; opure se podarìa pensare a na dimostrassion de protesta dove la polissia xe rivà a butare i lagrimogeni. Insoma na festa dove tuti se suga le làgreme fin che se taja quintài de siole, na sagra emossionante assè dove se piansarìa senpre." A sta festa farìa in piassa un bel monumento a la siola: na gran siola co da na parte un bel masso de porete masarole e da st’altra tri o quatro sioloti che salta fora come cipressi e tuto ’torno na corona de fruti de l’orto.
La siola, sto prodoto de la natura tignùo poco in considerassion, salvessa par l’omo ne i momenti tristi de carestìa; me ricordo che, quando le robe ’ndava male, in casa de i puareti se diseva: "Semo ridoti a magnare pan e siola" o "polenta e siola!" Infati la faseva parte de la nostra dieta pi de ’desso, magari parché de cicin ghi ne jera poco. La xe doparà par preparare ogni manicareto: un bon sofrito de siola par fare un sugheto co i fiochi, par un risotin de qualsiasi verdura, par darghe gusto a un brodo che fa risussitare i morti, su na bela minestra de fasiòi, dapartuto insoma altro che ’l pressémolo che se dise el sia senpre in meso come el zoba.
Po’ ghin’è de rosse, de bianche, schissàe o tonde, pìcole e grandi, ghin’è par tuti i gusti e par tute le ocasion. Trovemo le sioline da métare soto aséo, quele de Ivrea o de Firense, de Barleta o quele na s-cianta pi grosse de la Toscana o de Parma, senpre par conservarle soto aséo; de Como, de Rovato, bianche, zale, violeta e rosate. Ghe xe quele giganti, grosse assè come la bianca del Gargano e quela rossa de la Sicilia; no se pol desmentegare quela salda e fissa de Tropea.
Tornando a la nostra sagra vien da pensare come se podarìa farle ste siole par gustarle co passion: se podarìa tacare co un antipasto de verdure co la siola crua, tajà zo a fetine, magari col pomodoro o i fasiòi lessi, su na bela insalatada mista consà col tono e la mossarela. Continuaria dopo co na gustosa supa de siole co i crostini o el pan biscoto, na gran fortaja e po’ in mile altri modi: lessa condìa co l’ojo e aseo, opure co le patate e un pissego de parsimolo, in tocio col pomidoro, al forno co l’ajo e parsìmolo, ripiene co la salsicia e funghi, infarinà e frite a anèi. Le bancarele che le metarìa in mostra ste specialità le sarìa tante assè, un viale pien de specialità originali e tanto naturali: quei che vende le siole ripiene de riso cusinà co’ un goto de vin bianco e servie frede co la majonese; pa’ i pi rafinati se pol cusinarla a la parigina, messa al forno, dopo scotà, co sora do fetine de panseta tajà fina. A ghi ne sarìa de piati da poder servire a na sagra che se rispeta, par tuti i gusti e par tute le scarsele, par chi ga i denti e par chi xe sensa, tanto la siola cota la xe tenarina. Podarìa èssarghe anca raquanti bancheti de prodoti pi vari e balordi, senpre a base de siola come el tortino de siole, na salsa de siola al pevaronsin, pan a fete co ojo e siola tipo bruscheta, magari anca na bela marmelata de siola e, par finire, ovi duri e siola cota tipo spàrasi. Serto che na sagra de la siola la sarìa movimentà, la ciamarìa tanta zente curiosa de gustare sta baleta de aqua e sali minerali, ma a l’inissio ghe dovarìa èssare na bancheta che vende fassoletini de carta par sugare le tante làgreme che se versarìa, passando in mezo a le montagne de siole pronte par èssare gustà. Insoma na sagra a l’insegna de la salute e del ...bon UMORE! (umore el saria chel liquido che vien fora da i oci par difèndarse da i acidi solfurei provocài da le siole quando che le vien tajà.)
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El bosco ga perso la so "vose"
La montagna veneta no sarà pi la stessa. Ai boschi de l’Altopiano ghe mancarà la quinta stajon, quela che ghe regalava el "Grande Vecchio", senpre lì a vigilare e a difèndare la natura e le so creature
de Mario Klein
Da Verona
Quando le done le faséa "spesa"
de Wanda Girardi Castellani
|
