|
Editoriale
Par conbàtare sta crisi...
Capi de Stato, presidenti, ministri, papi, premi Nobel, esperti de economia: tuti i zerca el ponte d’oro par passare de là del fosso. Nissun pensa e parla... de farse na puntura de esperienza e de tradizion popolare...
 |
| ...la xe na strada in salita, ma el xe senpre on nare avanti... |
Có se se sbrojava na man, tajando la passaja o bruscando le vegne, na disinfetada a la bona, magari col pisso... se no ghe jera altro, e ’vanti col laoro, ché ’l sole magna le ore!
Forse, parlando de "crisi", se trata de calcossa de pi serio de na sbrojada da curare co na pèle de ajo, o de on bojon da guarire co ’n decoto de salvia; qua bison nare da chi se ne intende de sacagnade pi grosse e sperare che ’l ghe intiva.
In giro no se fa altro che parlare de "crisi", de calo de le borse, de recession, de inflazion, de banche che sara botega, de schei da scóndare te ’l pajon. Certo che calcossa de grave ghe xe. In qualche zona industriale le canpane le sona da morto... e i bechini i se sfrégola le man: "Anca oncò el pan xe sicurà!" E i ciama a racolta pi jente possìbile. Tuti in piaza... par dirghe sù a governo, paroni, preti, imigrati... No se pole pi nare ’vanti cussì!
Xe anca vèro: "No se pole pi nare ’vanti cussì!" Ma serve poco dire: "Go male! Son stufo!..." e parlare, parlare, urlare, criare, spacare: bisogna fare! Pensare par fare! Anca parché "a tuto ghè rimedio, fora che a l’osso del colo".
De tuto sto anbaradan, ghe n’emo parlà co on vecioto che da toseto el ga sentìo le conseguenze de la "crisi" del ’29 e po’ dopo el ga passà la guera del ’39. Secondo lu, semo nà massa ’vanti co l’alta velocità (par doparare on paragon de atualità). Ghemo vardà senpre ’vanti e mai o quasi mai indrìo. Se ghemo desmentegà in pressia da dove semo partìi e cussì se ghemo persi... Ghemo perso l’orientamento e, có xe calà el sole, ne xe vegnù sangoe da naso da la paura.
"Cossa se pole fare par conbàtare sta crisi?" xe stà la nostra domanda.
"Stare calmi, no agitarse, no spaventarse parché ghe n’emo visto de pezo!" xe stà la so risposta.
Sicuramente a la so veneranda età (classe 1919), elo el pol dire na parola in piaza, in fato de tribolazion, de qualche pasto tirà, de rinunce a regài o furizi. E el xe qua, magari co on fià de rasteghin, ma el xe el ritrato de la salute.
"Caro mio" el continua, "no ghe xe malatìa che risseta no ghe sia! Bisogna saver adatarse, far ‘de necessità virtù’ e mai pèrdarse de corajo. De fame no se more pi e con poco se canpa. Questo xe el momento del poco. Dovemo adatarse e acetare de canbiar vita. El massa belo, massa còmodo, massa bon... xe deventà massa caro! Ocore bituarse al manco: manco belo, manco còmodo e manco bon. Te vedarè che la crisi xe superà... e, se no la xe superà del tuto, te vedarè che no la fa pi male come ’desso!"
"Ma questo vol dire tornare indrìo..." ghe femo noantri.
"Lo sò che tornare indrìo la xe na strada in salita ma, anca se se fa fadiga, el xe senpre on nare avanti so la strada del vìvare!" el ga sentenzià.
No se la ghemo sentìa de darghe torto, parché da che mondo xe mondo, par fare on salto in avanti, ga senpre servìo fare du passi indrìo par ciapare la rincorsa.
Pensemo propio che ’l gabia rason!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Par conbàtare sta crisi...
Capi de Stato, presidenti, ministri, papi, premi Nobel, esperti de economia: tuti i zerca el ponte d’oro par passare de là del fosso. Nissun pensa e parla... de farse na puntura de esperienza e de tradizion popolare...
de Mario Klein
Da Thiene (VI)
Che belo el tenpo "dei Morti"
...L’autuno che ne dava el vin novo e tanti fruti, gera benedìo...
de Bepin Daecarbonare
|
