|
Da Thiene (VI)
Che belo el tenpo "dei Morti"
...L’autuno che ne dava el vin novo e tanti fruti, gera benedìo...
 |
| ...Anca grosse castagne lustre vigneva tegnù da parte... |
Novenbre maravejoso, tenpo de castagne e patate mericane.
Calda intimità de case de istà poco abità, quando se sta stava ben soto la siaresara, co la sigala fastidiosa che ne schitava su la testa la sòlita solfa.
Che belo scartossare ne le longhe sere frede e cantare felissi vissin a le tose, sentà sora un mucio de panoce.
Che belo inpissare la stua e fare la polenta, missiare sensa pressa, tri quarti de ora, fin che la se destaca dal caliero, e la facia de chi missia tuta invasà.
E dopo sentarse a tola, come na volta da i noni, quando el grande panaro co la polenta fumante "calamitava" tuta la fameja e el fumo lesiero se intortejava contro el piato de la luce e i colori de la carta tajussà che nava sù fin al sofito ne faséa sognare l’arcobalen.
– ’Naltra feta, nona, ca vojo deventare grando.
E ela, col filo nava soto la polenta, ’zigzagava" un poco par tore le misure e dopo, co un bel tajo neto, vigneva fora la feta sensa difeti, calda.
Che belo, de autuno, quando maura i fighi e i peri spada e quei del vin bianco e i peri barca e i peri rosseti che el nono meteva in te la graspìa e i gera pronti quando se nava a cantare la stela e augorare el bon prinsipio.
Ne le note gelide de dissenbre i peri rosseti i gera na speciaità, i magnàvimo golosi siben i fusse fredi e asprigni. Anca el nono, sbassando co le man el pelo che se indrissava, soto la camisa el diseva: "Sono ancora un po’ ‘indrio’, ma quelo che no stràngola, ingrassa".
L’autuno che ne dava el vin novo e tanti fruti, gera benedìo. Có ghe xe abondansa, bisogna métare via par l’inverno. No gera raro, curiosando drento i cassetini de l’armaro, catare, in meso a le mudande felpà, grossi peri che pian-pianelo se maurava, e intanto, nel leto vissin nasseva tositi o ne l’altro moriva la nona.
Anca grosse castagne lustre vigneva tegnù da parte, par rispetare la tradission de magnàrghene, almanco una, el primo majo. Se gaveva cossì la certessa de no èssare morsegà da le vìpare: el gera un "antidoto" che no falava.
E la ua picà al sofito de la càmara, che profumava de fràgole, giorno e note, e ogni sera calava na s-ciantinela, e a Nadale gera quasi finìa e noaltri disìvimo che gera le morejete, e la nona faseva finta de crédarghe.
E le panoce de sorgo, in granaro, che bestie stranbe, in colaborassion col gato, par tuta la note "trasportava", no se ga mai capìo dove, e quando calcheduna cascava da l’alto e se sgranava in te na ràfica, romai famejare, el nono diseva, quasi co rispeto par chi lavora: "I xe de note!" Come se dise de quei che va in Cartiera nel turno de note.
Che belo nar fora de note col nono e la s-ciopa a fare la "posta" al liévore, a metà novenbre.
– Vìdito che note de luna, note da liévori, bisogna caminare drio le siese par no farse vèdare da le bestie e da i cristiani.
Controvento vol dire ciapare le ràfiche sul muso e lagrimare e vèdare tuti liévori che pàscola e calche salbanelo.
Spetare incucià, soto al ròvare, vardando "intensamente" el prà e l’infinito, e có se vede mòvare, sbarare, e quando l’eco ga finìo el so giro par le vale, nar fora e inacòrsarse de ’ver copà el can de Endri.
– Te lo gavevo dito, nono, che ’l gera un liévore massa grosso.
– Mi credevo la volpe.
El nono no ga mai sbalià, el gera infalibile.
Che belo "dai Santi" ’ndare in simitero a catare i noni che te varda contenti, ne i so "inconsueti" àbiti da festa, da la fotografia ovale tacà su la làpide.
E i te ciama par nome: "Te racomando, véstete, che ‘dai morti’ fa fredo".
– Sì, nona.
– Sta ’tento co le tràpole, che na volta o l’altra i te cata.
– Sì, nono. Ve piase la tonba nova?
– Bela, suta! No dovevi disturbarve. Volive ben tuti. ’Desso va casa che i tosi te speta, daghe un baseto par naltri.
– Speté, noni, sta rivando el prete par la benedission, el se ciama don Bruno, don Giovani xe morto.
– Piassere, reverendo.
– ... Riposino in pace.
– Amen.
Che belo profitare del prete che fa la "loro" conossensa par tirarse da na parte e piànsare.
Da "RICORDI DA BOCIA" de Claudio Cappozzo, un rajoto del "GRASPO".
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Par conbàtare sta crisi...
Capi de Stato, presidenti, ministri, papi, premi Nobel, esperti de economia: tuti i zerca el ponte d’oro par passare de là del fosso. Nissun pensa e parla... de farse na puntura de esperienza e de tradizion popolare...
de Mario Klein
Da Thiene (VI)
Che belo el tenpo "dei Morti"
...L’autuno che ne dava el vin novo e tanti fruti, gera benedìo...
de Bepin Daecarbonare
|
