Da Thiene (VI)

A marso in Bragonza
Belesse naturali da gòdare e, soratuto, da protègere

Le coline de 'e "Bregonze".

Cossa ghe xe de più belo, par chi come mi ga sta fortuna drio casa, de gòdarse in sto mese ne le Bregonse, el risvejo de ‘a natura, dove fiori salbeghi e ciciolare de osèi conpagnà dal s-ciafesare de l’aqua su i sassi de na cascatela in tel rivo in fondovale ralegra sto posto da fiaba?
Le coline de ’e "Bregonze" a ’e falde de l’Altipian de i Sete Comuni ga na superfice de 17 kmq e ciapa drento i comuni de Calvene, Lugo, Zujan, Carée e Ciupan.
Grumolo, frassion de Zujan (Zugliano), a soli 4 km da Thiene dove parte ’l "Sentiero-Natura di S. Biagio", che, tocando i diversi punti de ‘e Bregonse el forma un anelo de km 12,3 de percorso, xe par mi la "meta" preferìa.
E tuti i ani, passa i rigori de l’inverno, i primi de marso, quando l’aria se fa tepida e se slonga le giornate, dopo magnà có el sole xe belo alto, salto in Panda e in diese minuti me cato de rinpeto la cesa de Grumolo; me meto i stivài de goma e, armà de baston e machineta fotogràfica, me incamino par la strada che porta a S. Biasio, ma prima del Ponte de la Rosta, ciapo el stròso che da Val S. Andrea mena al logo ciamà Bosco dei Preti, e fati pochi passi, scomissia le maraveje.

Tra i rami de 'e cassie, eco el "Campanellino di primavera" (Leucojum vernum).

Qua e là mace verde-scuro de rusco co le balete rosse, el "pungitopo" (Ruscus aculeatus), proteto da la Regione Veneto, ma del quale se continua a rancurare i buti (spàrasi).
Un ragio de sole, spiando tra i rami de ’e cassie (Robinia pseudoacacia) ancora spoji o quasi, fa risaltare de più el bianco càndido del "Campanellino di Primavera" (Leucojum vernum) che a sgnase el s-ciara, col so biancore, el sotobosco: momento magico par na fotografia.
Un pocheto più ‘vanti, in meso a le foje seche de l’autuno, cioche de prìmole (Primula vulgaris), oci de bo (Anemone hepatica), de do colori: rosa e celeste càrico, e ancora, ciufi de dente de can (Erythronium dens canis), fiore grassioso da ‘e tinte sfumà e le foje verde-ciaro macià de rosso, ciamà cossì par via de ’a patata bianca da dove ’l nasse fata a forma de dente de can. Drio ’l torentelo che me core da vissin, a l’ùmido, eco el zalo lùcido de i ranùncoli (Ranunculus ficaria) sora ’l tapedo verdesin de ’e foje un poco distacà da l’aqua, ma senpre in posti a l’onbra, fa bela mostra le bianche colonie de le silvie (Anemone nemorosa)... e fin ca sto gustando ste belesse, el vispo ciciolar de on petarelo (pettirosso), che de rama in rama ghe zola drio a la so "conpagna", el me descanta e, fermàndose on fiatin sora on russaro (rovo), intonando un canto co note piene de armonia, par che ’l me diga: "Ciò, Bepin, lassa stare i fiori che no i scapa, alsa i oci e varda i oseleti che salta tra le rame e canta e come mi te tien conpagnìa: anca naltri femo parte de ’e belesse naturali de ’e Bregonse." Dopo co un bàtare de ale el me saluda, sevitando la so corsa, gnanca ‘l tenpo de scatarghe na fotografia, e mi ghe sigo drio de istinto un "te ghè rason!" che ’l se perde in meso al bosco, intanto un sguassaròto (Ballerina gialla) volteja lisiero sora l’aqua.

Drio 'l torentelo, i ranuncoli (Ranunculus ficaria).

E la me atension, se sposta da i fiori ai oseleti, batùfoli de piume, che in sto tocheto de paradiso i ga el gnaro.
Na radéta (Scricciolo) che mete fora la testina da un spinaro, do musséti (Saltimpalo) posà te un ramo de saugàro (Sambuco), e poco distante, su la biforcassion del tronco de na vecia càssia, el gnaro fato a ovo, vero capolaòro de "ingegnerìa" del coalùnga (Codibugnolo) o còa de timon, come lo ciama i contadini.
Ai primi de febraro sto pìcolo oseleto, drento la siesa o tra le biforcassion de i rami, scomissia la costrussion "stranba"de la so caseta a forma de ovo, tuta sarà, salvo un buseto da na parte a mo’ de portesela, par la cubia che ghe metarà vinti dì a terminarlo.
Ne le Bregonse i coalùnga, da la testa strià, i xe de casa e diversi ani fà, nel 1980, par la prima volta in Italia, xe stà acertà la nidificassion de un esenplare che fa parte de na soto-spece a testa conpletamente bianca, na vera rarità; purtropo el gnaro, no se sa da chi, el primo de marso xe stà catà distruto, col materiale de costrussion sparpanà partera, e la còa de timon a testa bianca, da chel’ano no ’l se ga più visto.
El tenpo me xe scapà in pressa, rornai xe ora de tornare a casa e a malincore lasso el bosco, la Val de S. Andrea, el torentelo, i fiori, i oseleti e tuta la NATURA che anca st’ano me ga fato vìvare momenti de poesìa.


da "Colline delle Bregonze", Ed. 1987, C.A.I., Thiene

[torna sopra]