Da Maran Lagunare (UD)

El primo zorno de Quarésema

La barca de 'na "conpagnia".

’Na volta, pur se no gera tanto de magnà, el carneval a Maran el gera tanto sintìo, gera senpre grupi che sfileva inventàndose machiete e calicature, màschere stranbe, tanti i schersi, duti i rideva.
I. Formentin, el ricorda su un "Voce della Laguna", un carneval rapresentò da un omo sul careto tirò da un musso vecio e meso spelò deto "Pingheli"; l’omo che lo tireva el veva el muso duto sporco del sfrusin de ’na pignata, i òmini che i ghe steva vissin a sto careto i gera vistì in maniera talmente ridìcola che la zente la se sbacaneva de ride. Chi podeva ofriva, a sta alegra conpagnìa, qualchi "fritola" o "galani", e anca qualchi onbra de vin: sto qua el gera senpre senpre ben acetò. Mi ricordo ancora la sfilata de un sposalissio, sposo e sposa, parinti e invitài, i gera vistì in maniera cussì ridìcola, che la zente la se piegheva dal tanto ride. A la sera gera anca el balo, ma a mesanote el nònsolo el suneva la canpana a significà che la festa del divertimento la gera finìa. Le zòvene che le gera al balo le ‘ndeva de corsa a casa parché sta a balà anca un sol minuto nel zorno de Quarésema, deventeva pecò. Le mare quela sera le deventeva dute vigilesse, le se meteva su la porta de casa e fin che la fia o fie no le riveva no le gera tranquile, ma penso che nissuna sgareva, la parola trasgression no la gera ancora rivada fin a Maran.

'Na volta gera un ziogo che 'l se ciameva "Buso pacèca". (disegno del compianto pitor maranese Mario Della Ricca; da la racolta de ziughi de Claudio Damonte).

La matina del primo zorno de Quarésema el Piovan insieme al nònsolo e al gaseto, el ’ndeva sul molo a benedì le arte de pesca che i pescaùri i veva za caricò su la barca. Ste arte le gera fate de grasiùi de cana, sol più tardi le se ga trasformò in grasiùi de reo (rete). Dopo sta benedission seguiva la Messa, co la benedission de le’ sèneri. ’Na volta duti i ‘ndeva a ciapale, la formula la vigniva dita in latin, se sa che in talian la ga sto significato: "Ricordati o uomo che sei polvere e che polvere diventerai". Se pol anca capì che la inposission de la sènere xe un ato penitensial ‘bastansa frequentò anca ai nostri tinpi. Naltre fiòi de un tenpo, gerévomo duti sbraurini de vè la sènere de ulivo su la testa; ricordo invesse el disagio che veva un omo ansian, parché in testa el gera duto spelò, el Piovan el ghe la metèva, ma lu ghe dispiaseva parché presto la ghe ’ndeva anca via. El primo zorno de Quaresema vigniva e vien anca tiràe le "sorti" o "fato el toco". Sto qua el vien fato in t’una stansa del Comun par duti i pescaùri che i lavora co i grasiùi. Un tenpo a parte qualchi tognaòr o caparossoler, dute le conpagnìe le lavoreva in mar co i grasiùi. Par conpagnìa se intindi de solito el pare co i so fiòi, la barca la gera longa nove metri circa, negra parché piturada co la pégola. ‘Desso i xe circa trenta i pescaùri de grasiùi e i lavora un o do par barca parché pesse ghe ne xe poco. El "toco" el consisti nel fa el sortegio, come se fa col ziogo de la tonbola. El numero che vien fora el vien abinò al pescaòr che ‘l pol insièlzese un posto o ‘na zona de mar che la ga anca un nome, e qua el pol fa le so seraje duto l’ano. Me vien de comentà: "Tanto pesse che gera ’na volta! Mi che vevo la càneva tacada a casa mia, me inmagonevo i oci a vede le gran burìe che la conpagnìa de me nono la pescheva. Gera bel vede sistemà ne le casse de legno, pàssere, passarini, sfoji, sìivoli, gò, anguele, ganbariti, e in tenpo adeguò le masanete, ma no mancheva gnanca i bransini che i salteva fora có gera maltenpo, parché el torbio de l’aqua el ghe feva perde la tramontana. Tanto pesse, puchi mercanti, un vero pecò!"
Finisso co questo racontin che ’l xe de i nostri tinpi.
Gera el primo zorno de Quarésema e un pessivendolo maranese el passa vissin a la Cesa del paese ’ndove che ’l vendeva pesse. Fora de la porta ghe gera el Piovan che ’l speteva qualchi aventor (praticante).
Dopo velo saludò el ghe disi: "Poca zente, ah, siòr Piovan!" Lu seren, el ghe rispundi: "La zente la fa come el fubal, (pallone): a volte el va su, a volte e va zo...; xe ancora presto, i vegnarà, i vegnarà."
"Speremo che ’l fubal no ’l trova la pacèca¹, siòr Piovan, parché se fussi cussì, no ’l varissi più la forsa de alsasse."
Ma lu, el Piovan, pien de fede, el continueva a dì: "I vegnarà, i vegnarà..."

(1) Pacèca = Fango molle

[torna sopra]