|
Cultura orale
No xe custion de fame
 |
| ... e 'desso te si za in stati co 'naltra pedoina in pansa... |
– No go capìo ben, barba, se la to vissina de casa, la sinpàtica Romilda sbessolona che có la me vede la me saluda senpre in larga siera con sorisi a quatro ganasse, la fusse drio schersare o drio questionare co so nora Flaviana. Fato sta che propio ’desso passàndoghe davanti la go vista fora in giardin drio sbraitare, però sensa tante roganse, contro la sposeta de so fiolo. Go sentìo che la ghe sprolicava:
"Te si na burlina d’altura cussì mostosa ti, ca xe domè bona cargarse de fiòi, fà na liòda soto sforso ma ca no vale gnente a ranghine de fen in tabià. In tri ani, poco pi, ca ve si maridà te ghè sgnarà tri selegati. Par la verità i xe uno pi belo de l’altro e guai a chi toca i me nevodeti ca ghe vojo on ben de l’ànema. Ma par nare a poma co ’l discorso, siben che to marìo te lo vedi a spezanele inscartossàe de cartaciucia, magari spaìa de strangolon dal bufeto al cavessale, ti da sgaja fuìna boscarola de puro sangue montagnin te si za in stati co ’naltra pedoina in pansa. Vuto fàrghene na ciocà da no èssare pi bona quaciarli co le ale? Nò, seto, che la sia custion de pagnoca e gnanca d’on scoeloto de sboba o sinopì d’on pugno de caròbole, parché ringrassiando el Padreterno, la providensa no ne manca e po’ i fiòi no ga mai fato carestia. Pitosto me vanto de dirte che, co l’agna del me Jelindo, sta meza cartucia fureghina de rassa Piave, tuto nervi e caponara, sgajo fin da bocia come la bonanema de so pare, de tuìni el ghe ne ciapa a capelà, sia d’inverno che d’istà e la pignata da noaltri va suso tuti i dì. Vuto dirme cossa ca te farissi da par ti s’a no ghe fusse to madona ca te dà na man a costumare ste creature? Te te catarissi de sicuro inbalsà te i àrpesi e te vansarìa poco tenpo da fare balote e balotoni."
– Gnente male, come esenpio de fecondità, te sti ani che va via: cossa te pare, barba? Ansi te dirò che m’à fato piassere sentire che la cadorina xe insinta de novo. Beata ela! Sò che ti te la pensi come mi parché vegnemo fora da fameje grosse de antica costumansa. Pitosto, savarìssito spiegarme cossa che ghe entra quela sfaciata libertà dal bisogno sbabarà da la to confinante co ’l discorso ’pena riportà che tira in balo un zavajo mai sentìo mensionare?
– Come ca te sa, la nora xe na montanara belunese, de telaro rocioso ma de ànemo bon e la vecia forse intendeva pónzarla sensa farghe male, doprando on gergo ca ghe naséa ben a capoja. Jelindo el se la ga rancurà la sù a Sapada, gnonde co altri do soci d’inverno el manda ’vanti na scola de sìi e d’istà da bon scarpinadore so lo creste l’organiza escursion turìstiche, dando lession de alpinismo d’alta quota co tanto de inbragadure in cordàe. Lu pa ’l so laoro vive senpre su le Dolomite e par via de le palanche el ga da ciapàrghene bastansa. El fa on sbrisson a casa sì e no na volta al mese e te lo vedi rivare co de le machinone alte senpre ca ga da costare on ocio de la testa. Mi credo anca che co tute chele scolare vacansiere ca ghe passa pa ’e man so la neve e su i pra, o magari de sera in discoteca el ghe fassa anca calche corneto. Cossa vuto mai, del morbin el ghe n’à da vanso e a noaltri vecioti la malissia no ne manca mai. Tàjame la lengua s’a go pissà fora dal bocale! Ma vegnendo a la liòda ca go capìo che te intaressa saére de cossa ca se trata, solo nominàndola me vien inamente quelo ca me contava me nono che ’l ga fato la guera del 1915-18 te i alpini de la Julia. El so batalion ga conbatùo anca su l’Ortigara e lu gera on caporale de quele pene nere ca tendéa i muli doparài pa portare sù al fronte le culate e le cane da fogo de i canoni co le so cassele de munission cargàe su la gropa de le bestiole. A turno, ogni tanto co naltro s-ciapo de bociati, ghe tocava pensare ai riforniminti de galete e scatolame de magnativa da portare suso a le trincèe de conbatimento. Me ricordo ca so’ restà incantà anca mi có ’l m’à dito ch’i cargava ste ranbaje de marcansia so le liòde, ossia so de le slite requisìe ai montanari, ingegnose sbrissone da trasporto che i le tirava sù a spale co ’e corde ligàe a tracola. El peso del cargo ghe faséa tirare fora la lengoa ’fà de i marassi ’vanti rivare in sima. Però el me contava, convinto de ritegnerse uno de i fortunài, che lu la fame er la ga tribolà manco de i so conpagni, parché capitàndoghe a salti de manejare gènari da magnare, pi de calche rassion el la faséa sparire da i sachi destinài a la so conpagnia in prima linea e con de pi, dovendo custodire e farghe bela siera ai muli, pi de calche note el riussìa a farse on passacuore polacià sol fen al riparo te i tabià. Però quei sì ca gera ani duri, de fame, de miseria e de pericolo, pa ’i soldà che conbatéa e de ansie e tribolassion pa’ i familiari a casa, ciapài tra i spini, mancàndoghe i òmani che guadagnava da vìvare par le mujere e i fiòi. Ti, fiosso, te me dirè che anca ’desso ghe xe ’ncora tanta fame nel mondo e mi da omo che ga fato le scole basse, ’vendo sentìo dire par television da serti siensiati che vegnarà ’vanti ani sterpi che la tera no sirà pi bona darne da magnare a tuti, me parmeto de rispóndarte, inansi ca te verzi boca, che xe solo custion de egoismo e ingordisia. L’omo xe furo, pi el ga e pi el vorìa ’vere. El ga senpre paura ca ghe manca la tera soto i pìe. Invesse, secondo el me modo de pensare a la bona, par sgualivare le robe tel mondo, bastarìa che i governanti de i Paesi siuri, solo de bando ai spanti, i ghe desse quelo ca ghe vansa a le popolassion che trìbola la fame, invesse de incontrarse a paciolare senpre co la cagna al culo sensa ca se veda na s-cianta de ben scramenà da la miseria mondiale. Sò che i xe discursi che no garà seguito, ma mi te i fasso a ti ca te si zóvane mèjo de mi tel pàndare.
– Valà, barba, che la to sagessa sarà senpre un punto de riferimento par mi e anche par altri che volesse scoltare le to parole.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta violenza su le done!
Xe ora de inpegnarse tuti par far cessare la straje e la violenza contro le done,a partire da quela che ghe procura dani e soferenze fisiche, sessuali e psicologiche, in casa e fora casa. Xe ora de afrontare el problema seriamente!
de Mario Klein
Da Thiene (VI)
A marso in Bragonza
Belesse naturali da gòdare e, soratuto, da protègere
de Bepin Daecarbonare
|
