|
Editoriale
Basta violenza su le done!
Xe ora de inpegnarse tuti par far cessare la straje e la violenza contro le done,a partire da quela che ghe procura dani e soferenze fisiche, sessuali e psicologiche, in casa e fora casa. Xe ora de afrontare el problema seriamente!
 |
| Violenza, stupro e minace i viene senpre dal disprezo de la dona... |
Ne l’inpegno de la comunità internazionale su i diriti de l’ugualianza e contro la discriminazion, rientra, anca se con forte ritardo, el problema de la violenza in generale e, in particolare, de quela contro le creature indifese e contro le done.
Quando se parla de violenza contro le done... la facenda se cònplica. Ocore tegnere presente che spesso la violenza la fa parte de tante culture (stupro, incesto, mutilazion sessuali, lapidazion in caso de infedeltà, pasti de bòte... ; tante volte se trata de violenza fata dal propio marìo, convivente o moroso, ma anca da i fiòi; in altri casi la xe on’arma de guera ("stupro di guerra"); la xe presente ne i posti de lavoro, anca se la se ciama "molestia" o gesto palpagnin o man fonfa... In tuti i casi la violenza contro le done la xe on crìmine e come tale la ga da èssare giudicà.
Secondo i dati Istat e del Viminale su l’argomento, in Italia almanco na dona su tre la ga subìo ne la so vita on abuso fisico o sessuale e el 90% de le violenze su la dona el sucede in casa propia, dove la vien maltratà dal partner o ex partner. La fameja, non la strada, vien ritegnù el posto pi pericoloso par le done. In tuti i casi la violenza ghe vien fata da i òmeni che dòpara le maniere brute par sfogare i so istinti naturali in maniera bestiale, o par farghe capire a la dona che el potere... el xe de l’omo!
Disemo che par massa tenpo sta violenza la xe restà invisibile; el 96% de le done no denuncia la violenza subìa forse par paura, forse par mancanza de corajo de acusare la persona che le ghe ga vossùo ben, forse parché le se vergogna e no le cata le parole par farlo.
Una de le conseguenze del canbiamento de i raporti afetivi tra mojere e marìo, mete tante volte l’omo che xe stà ’bandonà da la so conpagna, ne la condizion de deventare prima un persecutore e, dopo, un omicida. La cronaca xe piena de sti casi.
Xe ’pena stà varà un decreto del governo par conbàtare el fenòmeno de sta violenza bestiale su le done. Pare se sia capìo che le "bestie" le va tegnù in gabia, in sarajo e no lìbere de violentare o molestare e po’ nare par la so strada come se gnente fusse.
Ma prevegnere e punire no basta: ocore educare i òmeni, insegnarghe a rispetare fin da pìcoli la dona, anca ne la scola. La violenza riguarda soratuto i òmeni, parché xe i òmeni che stupra, che ghe da bòte, che umilia o che còpa. òmeni come noantri. E i tosi? I tosi: droga, alcol e branco... i se trasforma in lupi.
Sì, ghe xe anca el maniaco, el delinquente, el "bruto", ma ghe xe soratuto persone "normali" ne le nostre case, ne le nostre fameje, che ga da canbiare modo de pensare e modo de conportamento: el corpo de la dona no ga da èssare visto come na roba da consumare, da "doparare", ma come el conpletamento del corpo de l’omo. Inpore col dominio, co la violenza, co la minacia de le armi o con i schei la "virilità" maschile, ne disonora e ne fa male.
Domandarghe scusa a le done podarìa sonare come na pura furbizia. Preferimo starghe vizini, conbàtare la stessa bataja, magari racomandàndoghe de stare ’tente a no provocare, de tegnere de pi i oci verti, de scapare possibilmente in tenpo, de denunciare i torti subìi, se volemo che finissa presto sta guera contro le done.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta violenza su le done!
Xe ora de inpegnarse tuti par far cessare la straje e la violenza contro le done,a partire da quela che ghe procura dani e soferenze fisiche, sessuali e psicologiche, in casa e fora casa. Xe ora de afrontare el problema seriamente!
de Mario Klein
Da Thiene (VI)
A marso in Bragonza
Belesse naturali da gòdare e, soratuto, da protègere
de Bepin Daecarbonare
|
