|
El raconto del mese in visentin
"Carpe diem"
 |
| Ghe xe stà fatale l’incontro al mare... |
Jole jera na professoressa che insegnava a le superiori in sità. Essendo anca anbissiosa, la tratava da l’alto al basso tusi e genitori. La jera anca na bela dona e la savéa de èsserlo, massime in paragon de altre ansiane coleghe: na figura slanciata, carnagion ciara e caviji senpre in ordine, svelta senpre e presente dapartuto. Nissuni ghe dava i quaranta ani che la gavéa ’pena conpìi. Ma savendo che, come dise el gran poeta, rivà nel "mezzo del camin de nostra vita", par forsa se scominsia a capire che la vita se avia par la sua naturale dissesa, ’desso la se convinseva che nela vita la gavarìa possudo far de pi, come la aspirava da zovane, ma la dovéa a malavoja adatarse e sercare almanco de gòderse, come dise el poeta latino Orazio, el "Carpe diem".
La jera libera da necessità economiche, anca parché el mario, proprietario de na assienda in voga, non el imponeva a la fameja quele restrission che invesse el faséa pesare so le spale de i so dipendenti.
L’unico fiolo, Enrico, jera ’assà da parte. El godeva de la massima libertà economica e morale ma no ’l dovéa creare nessuna preoccupassion ai sui. El jera on bon e brao toso, educà con i Scaut, volonteroso e diligente a scola; gioviale e generoso, el gavéa vudo la fortuna e la volontà de non cédare a le lusinghe de la droga e de le note de sbalo in discoteca.
Jole, sensa acòrsersene, la capiva ’desso de provare na serta amicissia par on colega, diese ani pi vecio ma, par disgrassia sua, separà. La se sentìa atrata e la ga finìo par amarlo. E elo, xe naturale, el ghe stava.
L’inpresa del marìo jera rivà a tanto benèssere, che lu dovéa parfin rinunsiare a le ferie e spesso portarse a l’èstero par conbinare i afari. Dona e fiolo invesse i podéa gòderse lunghe e fastose ferie in alberghi de lusso, so spiage famose. Col marìo i raporti jera ridoti a qualche saltuaria telefonada, che spesso ela anca dismentegava.
Adesso Jole no podéa privarse de gnente: el toso no ghe dava fastidi e ela coltivava amicissie e frequentava lussuosi saloti mondani, amiche sveje come ela e non privarse gnanca de divertimenti noturni.
Ghe xe stà fatale el casuale incontro in spiagia col suo stimato colega e proprio quando ela sentiva el bisogno de amicissia e condivision. Xe sparìa ogni "remora" e la sua xe diventà na passion violenta e totale da la quale no la podéa pi alontanarse. El professore se ga trasferìo so l’albergo de ela, con la càmara a l’ultimo piano dove nissun li disturbava e da dove i podéa mirare l’infinito e luminoso mare.
Enrico se jera acorto del conportamento de i du e dentro de elo pianzeva al solo pensare l’amore e la stima che ’l gavéa par so mama. El sercava anca de starghe el pi possibile vissin, faséndoghe capire tuto el so afeto. Ma jera inutile e a lu no ghe restava che passare disperà la note a piànzere.
Durante on pranso in albergo, so on tavolo a tri, el ga visto el professore parlare sotovosse e dare a so mama l’apuntamento par la note.
El toso chela note no ga sarà ocio e, a na serta ora, catando el leto desfà de so mama, col core strassià, no ’l ga possudo ignorare dove ela fusse.
I do amanti gavéa dà parfin on giro de ciave a la porta e distacà el telefono.
In piena note Enrico, scalso e col core che ghe scopiava, ghe ga tocà spiare dal buso de la ciave. Na spada ghe ga trapassà el core e disperà l’è tornà pianzendo tra i nessùi.
La matina drio a colassion, el professore tuto soridente, ga saludà el toso, basà la man de la dona che ne la note gavéa inanelà de on diamante. El paréa l’omo pì sodisfà de sto mondo.
Enrico, col core strassià, no ’l ghe ga pi visto. Sensa curarse de la gente intorno che faséa colassion, el se ga alsà in piè furioso, rabaltando anca la carega e ’l ga sigà in facia a l’amante de so mama: "Lurido porco" e disperà el ga ciapà la porta. La sèna par i du amanti, oltre che vergognosa xe sta terìbile e i xe scapà fora dal salon.
Ansiosa ela de corsa e drio de ela el professore, no i jera boni de catare el toso. I lo ga scoerto nel tardo pomerigio, incoatà so la sabia, co la facia sfigurà dal pianto.
’Desso però jera Jole disperà, strassià nel profondo de i so doveri e sentimenti: "Come podévela dirse ancora mama?"
Ma el bon Dio che sa perdonare e riabrassare qualsiasi pecatore, ga acetà el pentimento de la dona, sanando la profonda ferita, come solo la so bontà sa fare. El professore xe sparìo anca da la scola dove el insegnava. Jole in làgrime, ga domandà perdono al fiolo e xe tornà de novo a èssere molie fedele e mama amorosa, comovéndose de l’afeto che mai el fiolo ghe gavéa negà.
El brilante, pegno del pecato, la lo ga fato cascare discondon ne la casseta de le elemosine par el pan de i poariti ne la cesa vissina, dove, pianzendo, la xe tornà a inzanociarse.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Quando la Tera trema...
Oltre a la Natura anca la Tera che trema ne ricorda che cussì no se pole nare ’vanti. Serve na profonda riflession par capire dove sbaliemo e in cossa ghemo da canbiare. Pa ’l nostro ben!
de Mario Klein
Da Rovigo
I mignini de Floriano
de Gianni Sparapan
|
