|
Da Rovigo
I mignini de Floriano
Par via de i dulzi, na òlta, a jèrino a carità. In casa a magnàvino la brazadèa, da Pasqua, e anca par la sagra. E invece, soto Nadàe, a magnàvino la mejaza, che la sarìa na torta fata co la zuca.
Qualcosa a se magnàvino de doménega matina ’pena vegnù fòra da messa, e le jera crème quadre, o biscotini lunghi e sichi ch’i ghe diséa "pevarine" o de le sfuòje con la crosta bianca de ovo inzucarà e spargujà dessora.
Ma a parlare de paste fine, a bisognava spetare la crésema nostra o de qualche putin de fameja.
La cicolata, invece, i la vendeva sotoforma de triàngolo e la jera fata de nosèe masenà che la ne faséa da conpanàdego a na ciòpa de panbiscoto.
E dopo a xe rivà la moda de i mignini, e le robe le xe canbià in mèjo. I jera fati, sti mignini, come i "wafers" de onquò, ma più grossi, alti e larghi come on tòco de saon da lavare, e come gusto i saéva de vanìlia. Insuma za, i ne piaséa on pra e quando ca se podéa a se li conpràvino, spendendo zìnque franki, schei ca se procuràvino robando qualche vuòvo in te i cuci de gaina.
E co sti vuòvi a se ’ndava in botega a conprarse i mignini par dopo ciuciàrseli de scondon. E a li magnàvino, sgagnàndoli in ponta e dopo rosegàndoli on fià a la olta par farli durare de più, opure cavàndoghe i strati uno a la olta par dassarli desfarse in boca come la partìcola de la comunion.
Ma qualchedun el jera propio fortunà e li magnava regolarmente ogni dì, come Floriano de Crespin, che ogni dì, passando par el fornaro prima de andare a l’asilo, el se conprava, in dèbito s’intende, on mignin. E cussì so pare, a fine mese, quando che ’l ’ndava a pagare el fornaro, el se catava inotà sol libreto na trentena de zinque franki tuti segnà dì par dì insieme al conto del pan.
"I xe i schei ca go inotà par i mignini del fiòo, che ogni dì el vien a tòrseli al forno" el ghe diséa a so pare. Insuma za, ogni dì Floriano el se magnava on mignin che’l se portava a scola-asilo, par marenda.
Ma na olta, passando longo l’àrzare del Po, el se ga fermà a vardare i pescaduri calare e tirare sù la balanza. E alora el mete in tera el zestin de paja e po el se ferma a vardare el pescadore ciapare el negossin par rancurare el pesse che ’l saltarava in te la balanza pena tirà sù.
Ma el livelo de l’aqua el jera èlto e la corente turbia par i tenporali de montagna ch’i ghea descargà on mare de àqua in tel Po. Fato sta che, stando in pèca so la riva, a vien che ’l sbrissa in aqua, e più no ’l se vede, tuto soto aqua, che gnanca no ’l se vedéa. E alora el pescadore el fonda sùbito la man drento l’aqua e a palpeto el riva a brincare i caviji del pìcolo, e a tirarlo sù che ’l jera drìo niegarse.
Insuma Floriano el ga provà da putin cossa ca fusse el perìcolo de vita. E quando ch’i lo ga portà a casa, i ga domandà se ’l ghea passà paura. "Mi no – a ga risposto el pìcolo – l’ùnico me pensiero el jera el mignin drento el zestin. Eco ca muòro e no magno più i mignini. Cussì a me go dito!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Quando la Tera trema...
Oltre a la Natura anca la Tera che trema ne ricorda che cussì no se pole nare ’vanti. Serve na profonda riflession par capire dove sbaliemo e in cossa ghemo da canbiare. Pa ’l nostro ben!
de Mario Klein
Da Rovigo
I mignini de Floriano
de Gianni Sparapan
|
