|
Editoriale
Quando la Tera trema...
Oltre a la Natura anca la Tera che trema ne ricorda che cussì no se pole nare ’vanti. Serve na profonda riflession par capire dove sbaliemo e in cossa ghemo da canbiare. Pa ’l nostro ben!
 |
| Eco i segni del "mancato rispetto delle regole" e non solo, in Abruzzo. |
Lo ghemo za scrito altre volte: la crisi econòmica ga da servire a farne riflètare e canbiare strada. E a noantri ne sarìa bastà el tiro de cinghia par capire el bèrgamo. Inveze nò. Anca la Tera ga vossùo far sentire la so vose, forse anca ela stufa de èssare maltratà da l’omo.
Se fa par dire... ma, al teremoto... ancora in moto, se pol darghe anca sta interpretazion fantasiosa. Fantasiosa no sò quanto, co tuti i esperimenti in profondità che vien fato da st’altra parte del globo: da qualche parte el goasto sbocia fora.
"El Signore el xe stufo de noantri" diséa na volta i nostri veci. Signore o no, anca questi del teremoto in Abruzzo i xe segnài che ne fa pensare che bisogna canbiare sistema de vita. La question del goadagno prima de tuto.
Xe oncora da dimostrare, ma ghe manca poco: cemento scarso, sabia de mare e poco fero, nel tirar sù le case a L’Aquila e dintorni, xe tra le cause de i croli de tante costruzion che dovéa restare in piè. E inveze... zentenari de morti soto le macerie.
La colpa de ste malefate no la xe de uno solo, ma de tanti, de tuto on mecanismo disonesto de òmeni col pelo te ’l cuore, zente che pa ’l goadagno no varda in facia nussun. "Cossa m’intaressa a mi de i altri? Mi me vardo mi e basta!" xe el ragionamento de sta smanegà de coroti, che solo Dio pol perdonare.
Par fortuna che la solidarietà, scopià dapartuto par i teremotati, la xe on segnale positivo. Le ave del ben ga fato el so giro su i fiori che oncora inprofuma de umanità sta nostra pora Tera. La xe stà sùbito na gara de aiuti e de generosità par le vìtime de la tragedia. Quelo che ne xe stà mostrà e quelo che ne xe stà descrito xe la prova lanpante che el canbiamento xe possìbile. Podemo ’ncora dichiarare guera al goadagno disonesto, al non rispeto de le règole, al consumismo senza freno, a quelo che in ’na parola se ciama "avidità".
El problema no ’l xe nato ieri: la disonestà, l’ingordisia, l’inbrojo i ghe xe senpre stà e senpre i ga creà dano, anca par causa de l’ignoranza e de la bassa cultura. Adesso che semo un fià pi sveji e pi sgaji, e che semo boni de distìnguare on oselo da on aeroplano... e quindi la roba fata ben da quela fata co i piè, adesso semo anca in grado de métarghe on rimedio o almanco de tentare de farlo.
Forse lo gavarìssimo capìo anca senza el teremoto ma, ormai che el ghe xe stà, ghemo on motivo in più par corègiare i erori co l’intenzion de no ripètarli, parché senò semo propio del gato!
A la Tera ghe domandemo de avere on fià de pazienza. Se jèrimo distrati, a ghìvino el sole in t’i oci, ma ’desso el canociale de Galileo ne ga jutà a védare mèjo la Tera, poarina.
Scùsane, Tera! Ti no sta’ pi tremare, ché noantri te prometemo de canbiare!
[torna sopra]
|
