|
Da Lendinara (RO)
El mazo de frasche
 |
| Popà... la ghemo za fata la frasca e la ghemo ligà dessora de on palo co anca na frecia... |
Gera squasi sera e l’Angioina, co le zare piene de late, partiva in bicicreta pa’ ’ndare in paese. La spintonava el vento, co refolade carghe de pólvare ca se alzava da tera e da i canpi.
Da la canpagna, intanto, trabalando tra le caroàre de la carezà, tornava a la boarìa so pare col caro pien de erba.
"Bisogna far presto" pensava Jacomo; da lontan brontolava el tron.
A casa lo spetava in ansia so fiòeo Cinto, pronto co la forca in man pa’ descargare el fen ’pena rancurà.
"Oo... oo!" diseva finalmente Jacomo fermando el caro in faza a la staea. "Dài, toémose rancura prima ca piova." "Ee... voialtri dooo!... Rinooo... Bepii... quando spetèo a métare fora la frasca?" E lori che i zogatava co le ànare che le vegneva sù dal fosso i ghe rispondeva, "Popà... la ghemo za fata e la ghemo ligà dessora del coèrto de la casona!"
Messo li, el mazo de frasche, el se podeva védare anca da lontan, tanto che za qualcun lo gaveva ocià e de bona ganba el stava rivando a la boarìa.
"Bonasera, siora Melia." "Sera, Neno." Neno, el scarparo, el gera considerà cofà un de fameja, ma el viveva da solo in te ’na casa picinina del paese.
"Go visto la frasca, siora parona! Alora, se poe bévare raquante pecarete... vero?"
La Melia, mojere de Jacomo, insieme ai so fiòi, la gaveva inasià soto a la barchessa na tòea longa che la serviva da ristoro a la zente che passava da li, co l’intento de vèndare el vin de la so cantina. (Vecia usanza dovùa a un privilegio concesso da la Siora Maria Teresa, Inperatrice d’Austria e, el segnale che in chel posto se podeva bévare e magnare gera apunto la frasca).
Se tratava de un vinèo leziero che ’l spetava de èssare bevù in pressia parché, col caldo ormai a ’e porte, el garìa ciapà el cagnon. Vendù a un prezo modesto, el vinèo tirava a la boarìa raquanta zente senpre disposta a ciàcoeare e a far baldoria.
Intanto, co qualche tronà, passava de furia el tenporàe senza bagnare la tera, e intel giro de poche ore, soto a la barchessa, se gavèa mucià de la zente che a voze alta la scanbiava opinion sul tenpo, su i lavori e su le done. Cussì che la parona, pa’ sodisfare i so crienti, portava in tòea bocài de vin, panbiscoto e salame.
"Xela tornà l’Angioina, siora Melia?" diseva Neno, che ’l moriva da la voja de mostrare a sta fiòea on paro de scarpete rosse, fate co le so man e co tanto amore. "Parchè... sàea... vojo farghe un regaeo a l’Angioina, che la xe na puta bona da maridare."
"Valà, Neno, cossa gavìo pa’ la testa?... L’Angioina la xe ’ncora zóane pa’ ste robe. ‘Ndè là a sentarve co’ chi altri, che tra poco ve porto anca a vù un bocàe de vin."
Se soto a la barchessa i lumi a petrojo i s-ciarava la longa tòea, circondà de alegrìa e brava zente, fora, la sera gaveva coèrto tuto queo ca stava in tera. Ma in zielo... ah!... là dessora... slusegava na marèa de stée azure e quele rosse le pareva più grosse che squasi te vegneva voja de ciaparle co le man. Un quadreto ca proprio intenariva i cuori. Come queo de l’Angioina che, sentà vizin a Berto, lo vardava inbanboeà fin che lu sonava la fisarmonica.
La zente in borezzo intanto conpagnava co i canti le ande che Berto sonava e Neno, profitando de la confusion, se vizinava a l’Angioina mostràndoghe le scarpete che ’l tegneva tra le man.
"Le go fate pa’ ti, parchè te bai co mi stasera. Te piàsele, Angioina?"
A l’Angioina le ghe ’ndava a penèo, ma de baeare co lu proprio no la ghe pensava. "Te ringrazio, Neno, ma me despiase, go mal de testa stasera, sarà pa’ nantra volta."
Neno el sarìa stà pronto a desfare el mondo se la putèa lo gavesse sposà. A tuti i so amizi el diseva che presto el garìa messo sù fameja, e che ’l stava slargando la so pìcola casa.
Ma i so pensieri no i trovava posto intel cuore de l’Angioina, che la continuava a vardare Berto che alegro cantava: " O Angioina, bea Angioina, inamorato io son di te, inamorato da l’altra sera, quando veni a balar con te. E la gaveva la veste rossa e le scarpete co le rosè, e le scarpete co’ le rosete fate a posta per ben balar..."
"Dài, Neno, el vègna qua co mi" ghe diseva Jacomo, che intel fratenpo lo gaveva ciapà soto brazo, portàndolo in stala. Là, le bestie, rumegando chiete inte le grupie, le scoltava le ande ca vegneva da la barchessa. E Neno, vardando la mora che lecava el so bisin ’pena nato, finzeva un soriso de sodisfazion, stofegando in gòea un gropo che no voleva ’ndar zo.
La sera passava in alegrìa e come tante altre sere, soto a la barchessa, se ciàcoeava e se cantava fin ca le bote le gaveva vin. Dopo tornava la vita de senpre. Se tirava via la frasca ormai seca e solo al novo ano, co el vin pronto, i la pozava sora la casona. Sta storia la ga continuà pa’ tanti ani, come pa’ altretanti ani Neno xe tornà a la boarìa col cuore inamorà e un par de scarpete rosse tra le man.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
"Clandestini": che bruta parola!
El problema de i imigrati nel nostro Paese, in sto momento, el xe come on "roveto ardente". La facenda la xe talmente ingrejà che bisognarà nare a fondo anca so ’l ciamarli "clandestini", parché le parole le ga el so peso
de Mario Klein
Ricordi
La cantina de i schiti
de Luigi Frosi
Da Vicenza
"LA GUERRA... e la vita pulsava"
Co sto secondo lavoro de ricerca storica, la nostra Lucia Beltrame Menini la ga superà se stessa, dimostrando che co la passion e la volontà se pol fare de i capolavori
de Ines Scarparolo
|
