|
Cultura orale
La vanzega
 |
| I òmani naséa a carezare le crosete in canpi co' i cari tirà da i bo a timon... |
– Barba, l’altro giorno go fato na figura da ciodi co ’l me amigo Carlo. Mi credeva che la vanzega la fusse un pranzo de nosse, invesse me par d’aver capìo che se trata sì de na gran magnada, ma ligà a tradission contadine d’altri tenpi. Podarìssito s-ciararme le idee su l’argomento?
– Altroché, fiosso! Ghe ne go fate mi de pascolade del gènare in vita mia. Però solo a pensarghe me vien i sgrisoloni pa la schina co tute chele persone ca semo stà sentà a tola insieme e che ’desso no ghe xe pi. La pi parte ga tajà zo pa ’e curte e s’à catà a portainferi, setarà co quatro sbailà de tera sol muso e sol pansale. Mi ca so’ ’ncora qua, nando ’vanti de rognon co ’i rògiti, no pol far ca m’inbata co l’òbito mio de mi anca qua sol porton. De note m’insunio parfin de inorelare la negra e me pare de védare pestolare lì denansi on tiro de cavài a paro co le recele de veludo nero bordà de zalo, drio spetare i paraduri pizegoti.
– Ma valà, barba, destràviate na s-cianta da sti cruci grisi; có riva la nostra ora ’ndemo tuti a le piopete. Parlemo de vanzega pitosto che stemo più alegri sicuramente.
– Lalo, no sta’ pensare ca sia na bestia incagnìa. Cossa vuto, caro, i ani i ghe xe tuti, e a tuto roto tel faelare tento de tegnerme querto da na mantelina de fustagno, parché no vorìa mai ca me se giassasse le onge de i pìe prima ch’i me daga i oji santi. So’ on fià zo de corda parché zoba passà me xe rivà la notissia che anca la Bice i la ga menà via co’i ànzoli e mi go la scagarela a le culate. Co sti discursi te m’è fato vegnere inamente che propio co me dermana se ghemo catà sentài a tola no sò quante volte par la vanzèga in cao de’a canpagna sucarina, parché semo nai par ani a cavare le biétole insieme e tajarghe i culiti co la messora. Te dirò che i mominti alegri de le gran tolade vilanote cascava a giro stajonale longo ’n ano sgramegnaruolo e co ne capitava l’ocasion giusta de sventronarse, gnissun inbarasso tel gramolare da furi, co quela tòtana ca ne morsegava el rumegaro da permétare al gato de ronchisare sol sendron del camin. La prima magnada vegnéa organizà dal mièdare, ’pena terminà el laòro del tribatojo, quando fra corte vissine i s’inprestava i brassi dal bisogno.
Capo primo, te ga da saére che par l’ocasion a me nona ghe tocava fare na straje in ponaro, co tuto el personale ca rasìava ’torno chel polvaroso machinario. Pènsate ca ghe gera quatro meandini inpegnài sol castelo; da quelo ca inforcava le faje che ’naltro descargava dal caro, a quelo ca ghe tajava i balsi co la brìtola, a st’altro ca ghe sporzéa le sforcà de spighe a l’inboconadore de manevèi. Altra meza dosèna de òmani naséa a carezàre le crosete in canpi co’ i cari tirà da i bo a timon, raquante mùe de fèmane ranghine naséa a pajaro e altre a ziliaroni de pula, e do canevare, soto chela candela de lujo, gera castigà al caileto de sorbara, a sgudare assè in banbana bossuni de graspia. A zonta staséa senpre alerta du machinisti, uno ca onzéa i menaùri d’ingranajo a la trebia e st’altro esperto foghista ca tegnéa in bojo la vaporiera co fassine e socati stajonà, butando l’ocio ogni tanto anca al sengion che no ’l sbrissasse doso da la poleja, se dal caso s’inpongava el bataùro da on lévaro maturlan.
Insuma par la vanzega meandina se catàvimo in parici co le ganbe soto la tola. Me ricordo che da bocia ghe jutava a nona Irma sguaratando na quarta co drento calche fafà de spezanele par invojare el polame a vissinarse, ’vendo la prontessa de smirare, drio indicassion sue, soratuto ai galiti da tirarghe el colo. Có i me rivava a tiro ghe incapelavo on criòlo in sima e la condana a morte ghe tocava a quele creste rebechine ca barufava co ’l galo da sómena. Le faraone, pi sgaje e vispe de st’altri cai, no se lassava inganare dal riciamo e se la scapolava quasi senpre co la scusa che le naséa a polacio su i spinari in banda al fenile. Le arne invesse, pi tonte e squaquarone, gera fàssile inbrojarle, butàndoghe tel serajo na sbrancà de radicio ’pena tajà e ghe tocava la malasorte a quele che faséa conbàtare ’nando a sguassarse tel màsaro de i confinanti.
Vardando el lunario, de longo capitava la vanzega de le rèste, ossia ’naltra bela pascolà so l’ara có gera fenìo de inrestare l’ajo, sena che de le volte faséa on tuto ùgnolo co quela in cao a la bataùra de i fasòi sol sélese. Par l’ocasion me nono metéa in tajo la panseta in ròdolo e inprimava el canolin del caratelo, spinando on vàtene e vièntene de bocaline de moro a sgobagnon, uso vérghene da vanso, da mandar casa in ciarina pi de calchedun.
Però l’apuntamento co la magnìfica ca me naséa pi a genio gera quelo de fine vendema, anca se noaltri bocia i ne metéa in tola bassa, piantàndone davanti on bosson de aqua de posso. Me pare da védare ’ncora parecià chele gran tolade soto la tesa, gnonde ca ghe gera i tinassi in sbrònbolo. Se magnava le lasagne fate in casa consàe co ’e ciche, snasando odor de mosto. No so’ mai stà bon saére quanti ovi la inpastava chela pòra dona pa’ darghe asio a tute chele gorne e quanto ojo de gòmio la ghe metéa par tirare la sfoja co la méscola. Gera quela la corensa che cavava el ranso dal parsuto picà ai travi del granaro e in camarassa i tajava co na cortela ’pena gussà serte slepe ca ghe voléa tri frati a benedirle. In tola se vedéa na destirà de pan biscoto ca metéa in andare na giostra de goti pieni e gudi che intersàndose naséa catare el patoro al culo de la bota de Corbinelo vecio, anca par pareciarla al travaso del cheno novo, quelo de l’ultima foladura. Parlàndoghene me s’indolsisse ’ncora i sbàrboli da i sìguli de cotona ca no so’ sta pi bon petarghe in coste. Inframèso San Michele e San Martin, ca jera stajon de scadensa pa ’e fitanse, cascava la sena a fine descapojaura de le panoce, na magnativa miserota, a base de renga e polenta nova. Soto Nadale, par la còpa del mas-cio, se usava fare el senon del tastasale. In tola na destirà de fondine inpienàe de supa de pantassine, so la grèla calche fafà de paston da saladi schicià fra cartapiegora e sol panaro fumava na polentona co’e grasàpole. Gera la volta ch’i ghe tirava el colo a la fiasca del vin de torcio. A poma de sbafade, garia da zontarte anca la vanzega de la frasca, quela ca se pareciava pa’i murari có i rivava al querto de na costrussion in corte, on smorfire saltarin e par poche boche da inpongare, parlopì riservà ai cassolari de malta e graizo. Co la scusa che ai me ani l’ingiotaùro gera in castigo so’ nà via marciando sol gualivo co ’l descóare de ste robe, ma par no stomegarte sarà ben ca me ferma qua.
– Te si stà parfin massa ciaro e par gnente longo. Grassie, me ritegno più che sodisfà.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
"Clandestini": che bruta parola!
El problema de i imigrati nel nostro Paese, in sto momento, el xe come on "roveto ardente". La facenda la xe talmente ingrejà che bisognarà nare a fondo anca so ’l ciamarli "clandestini", parché le parole le ga el so peso
de Mario Klein
Ricordi
La cantina de i schiti
de Luigi Frosi
Da Vicenza
"LA GUERRA... e la vita pulsava"
Co sto secondo lavoro de ricerca storica, la nostra Lucia Beltrame Menini la ga superà se stessa, dimostrando che co la passion e la volontà se pol fare de i capolavori
de Ines Scarparolo
|
