Da la Marca

El cantar de i osèi

Finco alpin (foto F. Gaydou)

Uno de i spetàcoli pi poètici e sublimi che ne ofre ancora la natura el xe sicuramente quelo del canto natural de i osèi in libartà, un canto sènplice e s-ceto ma che riesse a rivar a mile virtuosismi e gorghegi soratuto ne i versi de pura melodia del rossignol, ispirator de poeti in ogni tenpo.
Pochi sa però che se ne la grassia del cantar el primato el xe del rossignol, quelo de la varietà del verso el ghe va al pi modesto finco, l'oseleto studià anca da Darwin ne le so ricerche su 1'evolussionismo.
Infati se el verso pi comune de ’sto osel el xe quelo de "pink" o "fink" che oltre al nome dialetal el ga ispirà quelo italian de "pincione", in tedesco "Fink" e in inglese "chaffinch", a seconda de le stajon, de i posti de stansiamento e del caràtere se pol sentir tante variassion su quel tema.

Uno de i "fringuelli di Darwin" (Geospiza fuligginosa)

I nostri oseladori i ghe dava come nome a ogni varietà quelo del so verso distintivo: se distingueva cussì, el "barbazìo" dal "francescomìo", el "cicibè" o "cicibèi" dal "cicipìo" e dal "cescrìo", el "fuìcio" dal "frìcio" o "uìcio" e ghe jera parfin el "sarsifìo".
Par la varietà e la gioiosità del so cantar el finco el vegnéa messo de preferensa fra i sanbèi o riciami che co i so versi i gavéa da atirar i osèi de passo verso o boscheti o i ròcoli dove che li spetava le insidie de i oseladori.
La gioia de vìvar del finco no la se mostrava solo che nel canto ma anca nel conportamento verso i fiòi: infati el finco continua a nutrir so fiòi anca se i xe stai ciapài e messi in cheba mentre altri osèi, primo fra tuti el gardelin, al fiol serà in cheba i ghe porta pomele velenose parché no ’l viva in prigionia.
Oltre a ’ste caraterìstiche comuni a la spece, i finchi de la Marca Trevisana i ga ’na specialità unica parché quei che vive sul Cansejo i ga ’na batùa diversa e i separa ritmicamente le ribatùe, in gènare ogni tre, col verso del "cit" opur del "zic", dando cussì vita a ’na spece de dialeto che permete de riconóssar subito l’area da dove che provien el cantor.

[torna sopra]