|
Ricordi
La cantina de i schiti
 |
| Me son messo de guardia, ma i sorzi vegneva de note có dormivo e par qualche matina la sèna jera senpre la stessa... |
La casa dove ca so’ nato e go vissùo par pi de vint’ani, i la ga vendùa dopo che xe morta la parona e, ancora tre ani fà, i ga tacà a sistemarla. Ogni volta ca passo da chele parte me fermo a vardare i laori che pare no i finissa altro. Ne la memoria torno a védarme putèo e chea corte che me paréa tanto granda, co i oci de ancò la xe un coridore de do metri scarsi; vardo la mureta de la scala ’ndove slissigàvino sentài come su un sìvolo, i sinque scalini de la terasseta de l’ingresso che saltàimo tuti de un colpo, el retricolato che me pare gheva messo sora al cancéo parché no scanpasse d’istà quando, co la mama, lì ’ndava a fare el riposin dopo disnà... Sta casa, ’desso i la ga butà sotosora: dove ca ghe jera le cantine i ga scavà par fare de i garage moderni, i ga fato le dissese par ’ndare soto e cussì chela s-cianta de giardin el xe sparìo; dentro i ga rabaltà tuti i muri e i ga spartìo le stanze in modo diverso, po’ i ga fato na toreta in alto par guadagnare spassio e cussì i ga canbià la facia de sta pora casa.
No la xe pi la me casa de na volta, me vien un gropo in gola ogni volta che passo par de là, ma me fermo istesso davanti a vardare e a ricordare... Ghe jera tre cantine, la cantineta sotoscala, quela de i scaravasi, parché un ano ghi ne jera cussì tanti che la go inpinìa de aqua par negarli tuti e có la se ga sugà ghin’ò tirà sù do seci pieni; po’ la cantina granda dove se meteva la legna e el carbon, ne i so bei stali che me popà gheva tirà sù co tole e traviti, ghe jera anca el spassio par i mastèi par la lissia e un casson grando indove me mama meteva le cuerte inbotìe dopo l’inverno. Tuto ’torno ghe jera le scansìe, dove che metévino i cachi a farse dopo ’verli tirà zo in autuno, e na fila de butilioni, quasi senpre vodi, par via de ’l sparagnare. Soto a la finestrela ghe jera el tavolo da lavoro e, su na vecia sgiossarola, me popà el gheva messo in fila tuti i atressi che ’l gheva: martéi, cassavidi, pinsa, tenaja, la sega e altri feri par fare i mestieri che ocoreva in casa. Par ultima ghe jera la cantina de i schiti e xe proprio de questa che ve volevo contare.
Na volta no la ghe jera parché quando la casa jera stà fata, la jera quadra, a do piani, nialtri stàvino sul piano de soto, de sora invesse stava n’altra fameja. Davanti, da la parte de la strada, la gheva l’ingresso, grando come na stansa de ’desso, a drita ghe jera el tinelo e a man sanca la càmara da leto, par de drio la cusina col fogolaro e su na spece de terassin sarà, el seciaro e un cesseto quadrato, solo col buso par el vater. Cressendo in fameja, me pare ga convinto la parona de casa a fare n’altra càmara e un cesso na s-cianta pi moderno, col vater e un lavandin par lavarse el muso a la matina senza ’ndare nel seciaro. Proprio soto al cesso e a la càmara nova, ghe jera na cantina bassa, tuto longo, che finiva co na finestrela sarà da na inferiada: la cantina de i schiti.
In corte, par de drio de casa, ghe jera un gran figaro che d’istà el jera la nostra dispensa de fruti: fighi che magnàimo col pan la matina par marenda, fruti da portare in tola a mesodì e par rónpare el digiuno al dopopranso, da la fame che ghévino ’i magnàvino anca crui. Soto al figaro, me popà el gheva fato na fornela par scaldare l’aqua per la lissìa e ’torno l’àlbaro, co na rete, el serajo per le galine. ’Pena finìo la guera, tuti tigneva raquante galinele in corte, un galeto e qualche capòn par Nadale, sarài su a ruspare, parché fazeva còmodo ’vere qualche oveto e qualche polastrelo da tirarghe el colo la doménega da fare el brodo co un bon ripien che ingossava. A la sera, sti ruspanti, i paràvino sù nel punaro che ghévino sistemà ne la cantina de i schiti, proprio parché le galine le se liberava senza remission durante la note. Ghévino fato na scaleta de legno dove sti bipedi se ’npolajava par dormire e èssare sora tera par no ciapare malatìe e pèrdare le ganbe, se diséa. In primavera, la mama ’ndava al marcà a cronpare raquanti pulsinèi, la inbriagava na galine che no faseva ovo par farla inciocare e la ghe afidava sta sgnarà de polastrini parché la ghe insegnasse a rangiarse e créssare ben. A la matina ’ndàvino a vèrzare el punaro, tirà sù el rostreeto se toeva sù i ovi dal gnaro e paràimo le galine nel serajo, se canbiava l’aqua del bevarolo, raquante sbrancade de granela, i avansi de la verdura e arivederci a la sera.
Me ricordo un’istà: jera i primi de agosto e ghevo deciso de sercare drio la siesa na forcela nova parché quela de la fionda la se gheva spacà. Chela matina, vago a vèrzare el rostreleto del ponaro e me incorzo che partera ghe jera sinque polastreli morti, pene e spenoti dapartuto, sangue e, tute le galine incantonà su i paleti pi in alto. No riussivo a capire cossa che fusse stà e, senza gnanca tirar sù i ovi, coro a dìrghelo a la mama. "Oh, Signore, vuto vedare che le tonpegane xe vignùe stanote a magnarne i polastrèi... Bisogna fare calcossa parché no le torna!" Jera proprio stà cussì, suito me son dà da fare par rinovare el tirasassi e ponà un bussoloto sora la fornela me son alenà co la fionda par fare la guardia al punaro. Me son anca fato su un arco e, co le steche de na onbrela vecia, a go parecià le frece par tirarghe a le tonpegane magna-galine. Me son messo de guardia, ma i sorzi i jera pi furbi de mi, i vegneva de note có dormivo e par qualche matina la sèna jera senpre la stessa: pene e sangue... Me mama alora la ga risolto la question a modo suo: par do setimane la ne ga fato magnare polastrèi, mesodì e sena, na volta in brodo, na volta in umido co le patate, n’altra volta rostìi in forno... Cussì, la cantina de i schiti, xe restà solo de nome parché da alora, me mama, no la ga pi volesto rogne co le galine.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
"Clandestini": che bruta parola!
El problema de i imigrati nel nostro Paese, in sto momento, el xe come on "roveto ardente". La facenda la xe talmente ingrejà che bisognarà nare a fondo anca so ’l ciamarli "clandestini", parché le parole le ga el so peso
de Mario Klein
Ricordi
La cantina de i schiti
de Luigi Frosi
Da Vicenza
"LA GUERRA... e la vita pulsava"
Co sto secondo lavoro de ricerca storica, la nostra Lucia Beltrame Menini la ga superà se stessa, dimostrando che co la passion e la volontà se pol fare de i capolavori
de Ines Scarparolo
|
