|
Editoriale
I dise che la sarà on’istà poareta
Lo riferisse i dati riportà da giornài e TV: la sarà na stajon difarente da i altri ani: pi disocupazion, manco schei in circolazion, manco distrazion, rinuncia a tante robe... Sarà vèro?
 |
| I alti e i bassi i ghe xe senpre stà: par consolarse... tirémose sù co sta imàgine de i tenpi "alti" |
"Quando le canpane sona – dise on vecio proverbio – in qualche paese xe festa." Ma, podarìa èssarghe anca on funerale o aver ciapà fogo na stala, on cavajon de formento so ’l zélese... Però xe da st’inverno che se ghe ne parla: calcossa de vèro de sicuro ghe xe. Calcossa, ma non tuto.
Ne i posti de vilegiatura, al lago, al mare, in montagna, za adesso, có xe ora de magnìfica, le pizerìe le xe piene stofinà. On me amico el me ga contà – a semo a metà giugno – che no ’l xe stà bon de catare, par la metà del mese de lujo, on apartamentin in quel de Rosolina Mare. E gnanca parlàrgane pa ’l mese de agosto. Che sia parché, rispeto a altri posti de mare veneti, sta qua la vien considerà na spiaja da poareti? No credo propio! Anca a Rosolina Mare ghe xe posti "aristocratici", l’aqua xe neta, la spiaja pure, i "bagni" xe ben organizà e pieni de comodità, la pineta xe verde e ben tegnùa, el sole xe abondante...
E alora, come la metemo co la crisi? Dove xela l’istà poareta? Forse la ghe xe in posti dove cresse la pianta del lusso, de le godurie a go-go, dove inpera la moda e dove no se pole nar fora in zavate e braghete de tri ani fà.
Ben, se le robe le sta cussì, no xe da preocuparse pi de tanto. Anca parché el "poco" cresse dove el "massa" more.
De sicuro ghe xe fameje che st’ano ghe tocarà rinunciare a la solita vacanza al mare o ai monti, ma no la xe na catàstrofe, no la xe na pandemia da vacanza! A sta malatìa se pol oncora farghe fronte. Ghe xe senpre on rimedio: on àrzare, na stradela, na carezà, on sentiero, na bicicletada, on tufo in pissina, na partìa de carte co i amissi de l’Auser, na ’marena a l’onbra d’on moraro, na feta de anguria e, a la sera, on piato de costesine al capanon de la Pro Loco o a la sagra de la parochia.
Me sento supiare te le rece: "Retrogrado! No xe pi i tenpi de anguria e pan biscoto. ’Desso le esigenze le xe tante. Prova ti a tegnere i fiòi..."
Giusto! Eco nantro problema "connesso": i fiòi! I fiòi no se pole privarli de on poco de mare o de montagna. Luri i ga rason, parché li ghemo bituà ben, poarini, e no ghe ghemo mai fato conóssare el sacrificio e la rinuncia, anca in tenpi che xe canbià. Cussì a ghemo lassà pèrdare na bela feta de educazion.
Forsi sarà el caso che se armemo de pazienza e che tentemo de recuperare el tenpo perso, insegnàndoghe che bisogna èssare senpre preparà anca al pèzo, no solo al mèjo. Ma che quela de i "fiòi" no la sia na scusa... parché ’lora semo noaltri che ghemo da ’vere on orizonte pi anpio, pi largo de la vita, del rapotarse co le situazion che canbia, pronti a anca a fare du passi indrìo par fare mèzo passeto in ’vanti.
In altre parole, sarà ben fare "de necessità virtù", parché l’istà, la nostra istà la possa èssare manco poareta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
I dise che la sarà on’istà poareta
Lo riferisse i dati riportà da giornài e TV: la sarà na stajon difarente da i altri ani: pi disocupazion, manco schei in circolazion, manco distrazion, rinuncia a tante robe... Sarà vèro?
de Mario Klein
Da Belun
Adolfo Crespan, "Dodo"
de Luigina Tavi
Da Verona
Maridarse... vestìo da sposo
de Giacinta Dall’Ora
|
