|
Da Adria (RO)
Va e vieni
 |
| La Tilia la faséa la sarta... |
L’aqua de Po la va senpre in zo, al mare, ma l’onda del mare la vien e la va. Cussì fa anca la zente: ghè chi va via pa’ la so strada, sensa mai voltarse indrìo e chi va e vien fin che ’l mare no ’l deventa lisso come in serte matine de bonassa.
La Tilia la jera ’ndà via ch’la jera poco più che putina; so sàntola, che la staseva a Milan da ani, na volta ch’l’è vegnù zo a catare i sui, la ga domandà cossa che la faseva. "La sarta." "Ma ghe n’ato del lavoro?"
"Quelo el ghe sarìa anca, i è i soldi ch’i è senpre pochi, parchè la zente la paga quando che la pole." "S’a te vien co mi a Milan a te cato un posto sicuro da lavorare, dove i schei a t’i vidi senpre e sicuri tuti i misi." E l’à ciapà el treno, quatro strasse, un ciao a tuti, e a Milan l’è ’ndà inte na peliceria. La s’à catà cussì ben che la s’à casamentà là: la s’à catà un moroso, la s’à maridà, l’à mucià d’i fiòi.
Quando ch’è rivà la gran aluvion del ’51, la zente del Polesine l’è scapà de qua e de là indove che l’à catà àneme bone e acoliensa. Parici, co tuto sto scunpìlio, i à scoperto che in giro pa ’l mondo a gh’iera da ciapare el franco mèjo che chì da nantri e i à fato sanmichiele na volta par tute. L’è stà cussì che l’Elsa – sorela de la Tilia ? e so marì i è fenì a Milan, o lì par volta. Tuti i diséa Milan, ma el più de le volte i stava de casa in paesi lì intorno e Milan i lo vedeva qualche volta quando ch’i jera lìberi dal lavoro. In prinsìpio la Tilia la ga dà na man: par catar l’alogio, par un lavoreto che andasse ben a l’Elsa – so marì el l’eva catà prima de partire –, par darghe qualche sugerimento indove far le spese a bon marcà, insuma tutte chele picole robete che chi ch’è sul posto da ani ben conosse e chi riva da via no ’l pol savere. Naturalmente có i podeva i se catava, co na scusa o co l’altra o anca sensa scuse.
Drio l’Elsa è rivà n’antro fradelo e po n’antro ancora, fin che tuta la fameja, fora che i veci ch’i à preferì restare inte le so quatro piere e sapare el so orteselo, bruscare le so vide, brusare bruscole inte ’l fogolaro par far la polenta, i è fenì tuti a Milan. Vita dura ma palanca sicura. Ognuno à fato fameja, à tirà sù fiòi, i è deventà milanesi e có i tornava al paese a catare i veci i parlava in "nè" cussì come che ormai i s’jera bituà. I fiòi i è deventà grandi, i s’à diplomà, laureà o inpratichì de qualche mestiere, i è ’ndà in giro par l’Italia e anca fora via, i à tendù i so afari de qua e de là e a catare i veci i ghe vegneva senpre manco.
Quii che invesse no i s’jera desmentegà el giaron de Po, le fumare nostrane, la pachèa de l’istà e i giassun de Genaro, le carezà piene de fango d’inverno e i stradun coverti de polvere d’istà, i jera i so genitori, come l’Elsa e Giàcomo: ciò luri i gh’jera nati da ste bande, i jera cressù co la polenta de sti canpi e i gànbari de sti fossi. L’Elsa l’è stà la prima ch’la s’à conprà na casa arente ai sui, ormai veci e carghi de magagne; na casa vecia, messa discretamente, che la gheva bisogno de qualche sistemassion. Adesso el franco no’l ghe mancava e cussì i la l’à fata métere a posto tanto ben ch’l’è deventà nova. I ga messo dentro tute le comodità, come a Milan, e ela e so marì i vegneva da Pasqua a vèrzere casa, d’istà inte ’l tenpo de le ferie, da S. Belin par la fiera, da i Morti par métere du fiuri su le tonbe inte ’l so simitero, qualche volta perfin da Nadale par passare le feste in conpagnìa d’i veci. Naturalmente ogni volta a gh’jera el giro d’i saludi a parenti, amissi e conossenti e i pochi o tanti giorni no i bastava mai, parchè i paesani i li considerava ancora d’i sui, anche se ormai a jera passà na vita da quando ch’i eva messo sù casa a Milan.
Co la scusa de la casa, no macava de far qualche scapadina anca i altri fradèi. El jera un vàntene e vièntene par tuto el tenpo de l’ano. Ma. come in tute le robe. è capità chelcossa ch’à fato molare le abitudini: i veci i è ’ndà a ingrassare la tera del simitero, Bepe, el marì de l’Elsa, l’à scuminsià a ’verghe poca salute e i viaj sù e zo i s’à fato più ciari; i so fradèi, fra fiòi, magagne e veciaja, i è stà costreti a molarghe un punto anca luri; cussì, dopo che ’l Padreterno l’à ciamà Bepe a curarghe el so orto, anca l’Elsa la faseva più fadiga a far le so visite usuali, tanto più che el viagio ormai el ghe pesava un pocheto e la se faseva conpagnare da uno d’i so fiòi, e cussì la doveva spetare i comodi sui. Insuma, par farla curta, l’è ’ndà a fenire che l’à messo la casa in man a n’agensia e la s’à contentà de ciapare ch’le quatro palanche ch’i ga oferto e i contati co qualchedun del paese i s’à ridoto a qualche lunga partìa de ciàcole par telèfono co qualche amiga che gheva tenpo da véndare cofà ela.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
I dise che la sarà on’istà poareta
Lo riferisse i dati riportà da giornài e TV: la sarà na stajon difarente da i altri ani: pi disocupazion, manco schei in circolazion, manco distrazion, rinuncia a tante robe... Sarà vèro?
de Mario Klein
Da Belun
Adolfo Crespan, "Dodo"
de Luigina Tavi
Da Verona
Maridarse... vestìo da sposo
de Giacinta Dall’Ora
|
