Da Verona

Maridarse... vestìo da sposo

Insoma Michele l'à fato ora istesso a maridarse vestìo da sposo...

Son invià a nar in pulitura quando scapusso ne la me amiga che la vansa sù a fadiga da un fagoton piassè longo de ela. La se ferma e la me dise:
"Ciao, bela. El seto ’sa go qua dentro? El vestito da sposo de me fiol. A propòsito, dài che nemo a ber un cafè che cosita profito par finirte la storia de sto vestito che t’ò scominsià l’altra ’olta."
Ne comodemo al taolin de n’ostarìa tacà a San Zen, ’ndo se cata i pensionati a zugar a le carte, i ’stracomunitari par salvarse da la candelina e do "signore mature", come mi e la me amiga, a ciaciarar. ’Pena sentà, la parte in quarta.
"Donca, s’era restà al Sabo Santo che mi, el me omo, la nona e el sposo semo tornè a casa sensa vestito, parché la sarta la l’avéa sassinà e perciò ghe l’avéene petà là. A ’pena un mese de distansa da le nosse, me fiol l’era ancora – se fa par dir – inudo e dopo Pasqua el gavéa da nar via na diesina de giorni par laoro. Na sera par fortuna la ne va drita de nar dentro inte ’l negossio più ‘esclusivo’ de la cità, un pel prima che i sèra e propio lì el butel el cata par la seconda ’olta el vestito da sposo de i so sogni, el se le misura: el ghe stà a penel. Ghè solo da farghe l’orlo a le braghe, che l’è conpreso nel presso (e che presso!) e i ghe pensa lori; ’ntanto noantri ne portemo a casa la giaca. El sposo, in partensa par el Piemonte, el me lassa zo el scontrin e mi, dopo na stimana, ghe ritiro le braghe pronte, le porto a casa, le unisso a la giaca e fico tuto ne ’l so armaron."
"Che storia ela?" ghe domando a la me amiga. "No ghè gnente de estraordinario inte un orlo de braghe."
"Tasi e ’scolta!" la me comanda, po’ la ritaca: "Alora, me fiol el parte par Alessandria, propio el giorno de l’aluvion. El riva vissin al so albergo e ghè na disperassion: gente sul coerto de le case, done e buteleti che siga e se spìngola zo da i ponteséi, motoscafi de i ponpieri che cìrcola par le vie de la cità come le góndole par i canài... In quel mentre ghe sóna el telefonin. L’è el comesso che ga vendùo el vestito che el ghe dise de presentarse da lu, de persona e in pressia, parché ghè un problema. Me fiol, un fiantin spaentà par l’aqua che ghe rivàa al finestrin de la màchina, ma soratuto par la paura de restar n’altra ’olta – se fa par dir – in braghe de tela, el me ciama e el me manda mi che, sensa gnan petenarme, vao."
"’Sa era sucesso?" ghe domando a la me amiga.

Sì, bela, par sta volta ghe ga pensà so nona... Pi vanti ghe pensarà... la so Marzia...

Ela la bée el so cafè, la cata sù el sùcaro co ’l cuciarin, la se strusa la boca e finalmente la se àldega a rispóndarme:
"Donca, el comesso, desfando la vetrina, el se incorse che el vestito esposto el ga giaca e braghe desconpagnè, cioè de colori difarenti: nero e grigio scuro."
"El sarà stà un spessato" salto fora mi.
"Magari, bela!" la me dise e la séita: "Alora el controla i vestiti de negossio e magazin che i è abiné tuti giusti e perciò l’ùnico desconpagnà el pol èssar solo quel de me fiol. El le ciama, lu el me manda mi che, smorbà da i àbiti da omo e convinta che l’è mèjo un sposo in jeans pitosto che con na scarpa e ’n sòcolo, ciapo el vestito e, inbilà, córo dal comesso. Quan el me vede el me fa parfin la rivarensa, el tira fora lu el vestito desconpagnà de la vetrina, mi quel de me fiol, desconpagnà, da la custodia... El se l’avéa intajà giusta, difati la giaca de me fiol la se conpagnàa con le braghe de la vetrina e la giaca de la vetrina con le braghe de me fiol."
"Tuto risolto con un scanbio" ghe digo mi, intrigà a capir sto garbujo.
"Gnanca par sogno" la me dà sù ela. "Parché le braghe de la vetrina, che i era conpagnè con la giaca de me fiol, i era sensa l’orlo, ma, dato che le gavéa el stesso tajo de quele za scurtè par me fiol e che invesse le se conpagnàa con la giaca de la vetrina, s’à podùo sistemarghe l’orlo sensa farlo vegner de ’olta dal Piemonte aluvionà. Pensa che ghe mancàa solo tri dì a le nosse."
"Ma l’à fato ora istesso a maridarse vestìo da sposo!" scherso mi.
"Sì, bela, ma solo parché l’orlo la ghe l’à fato so nona de 83 ani!"

[torna sopra]