Da Vicenza

“Il mare” de Antonio Capuzzo
presentà da la poetessa Lucia Gaddo Zanovello

La “Scaletta 62” de Vicensa, logo d’Arte.

Na spirià de sole ga stenprà fora la giornata de domènega 21 febraro e ben volentiera me son sgranchìa le ganbe pa’ ’dar a Santa Lussia, a la “Scaletta 62”, indove, a le 17.00, la poetessa padovana Lucia Gaddo Zanovello ga presentà el libro de poesie “Il mare” de Antonio Capuzzo, altro padovan de nàssita, ma visentin de ànema, sia pa’ i ani che l’è qua Vicensa vìvare e insegnare, sia par i so libri de poesia indove ’l canta la sità, le so bèe coline, le tante vile paladiane e i colori de la nostra splendida vegetassion. Altra roba no da poco, el fato che ’l fassa parte da ani del nostro Cenacolo Poeti Dialetali Visentini.
Inte ’a Saletta Cornaro, le careghe jera deboto tute ocupà, ma qualchedun, co bona sièra, ga fato sùito spassio par el clan de i Scarparolo. Presenti, fra i altri, anca el grande poeta prof. Cesare Ruffato e l’umanista, critico e scritore, prof. Gianni Giolo. No mancava i afessionà del Saloto Leterario de la Luciana Peretti: pitori e poeti visentini e foresti; el soriso pi slusente parò, có so’ ’ndà rento, me lo ga regalà na toseta bela ’fà ’l sole, Sofia, fipla de Antonio Capuzzo: la go spesso vista a sti incontri leterari, senpre co ’n libro in man e ’tenta a scoltare, a capire.
Lucia Gaddo Zanovello ga presentà sta splèndida òpara poetica de Antonio co vosse musicale e parole inprofumà de poesia; d’altro canto ela stessa ga sta Musa ’te l’ànema... Le poesie se ga sparpanà regalàndone versi che inmaga. ’Te la prima session: “Mito”, el poeta, co la stupenda lirica “Sogno”, el se vede so la spiaja, soto l’onbrelon. Dal pisocheto el passa a sognare: personaji de la mitologia come Anifitrite, Poseidone; l’ocia on gabian che fa la lota co ’n pesse grando, e le onde xe musica pa ’e rece, caresse, vosse che incanta; Apollo el pèstola in serca de qualchedun a caso par regalarghe l’ispirassion de la parola e l’imortalità...

Da sin.,Antonio Capuzzo, Lucia Gaddo Zanovello e el prof. Gianni Giolo.

I versi de la seconda parte par coasi trasmétare, dise la presentatrice de l’òpera, na sensassion de fredo, de “Malinconia”, e cussì xe titolà la seconda parte; qua el mare xe visto come “dolore cosmico”, “oblio” o, come ’l poeta scrive in “Fossa delle Marianne”, “... l’azzurro è un occhio / che si chiude...”
Ma cossa xelo ’lora el “mare”, par el poeta? ’Te la tersa parte: “Poesia”, Antonio Capuzzo el ne dà la risposta, co de i versi che smove fora emossion, sburatando rento: “Il foglio di carta, per un poeta, è come il mare. / Si possono fare navigazioni, traversate, scoperte / a bordo delle parole. Lunghe file di parole, / flotte, ponti navali, e si fanno poesie, / poemi...” Ma i versi che pi me ciapa, xe quéi che lèse poco dopo la Gaddo Zanovello (e sto qua el par on racontin scarpià de ironia): “Sono sdraiato sul letto, nudo. Finestra del terrazzo aperta, / zanzariera; la notte è perfetta: non fredda né troppo calda. / Vicino ho carta e penna, vorrei scrivere una poesia su / questo momento magico: ma l’ispirazione non arriva. / Lei dorme sorridendo leggermente. Ci siamo amati in / modo dolcissimo... // Ma non giunge alcuna parola poetica: non scende dal / cielo, non sale dalle profondità della terra e del mare... / Forse perché l’ispirazione non è per chi è felice, completo, / pronto per la morte.”
L’ùltima session de sta racolta se ciama “Amore” e la scominsia co na poesia originalissima: “Laureato in Filosofia”. A l'inissio el poeta fa on paragon fra ’l celestin del parèo de la so dona e quelo del mare e del celo e po’ el fa sentir ciara la so confusion, ’tel capir che i veri filosofi xe i pìcoli. “Tu che sai tutto” ghe domanda i so putèi... e zo domande, so ’n fià de tuto.

El momento de i autografi. (foto Ines Scarparolo)

Quante imàjini fantàstiche ’ncora el ne dà, on verso drìo l’altro, tuti pieni de amore par la vita, el mistero del mare, so mojere, i so toseti.
Antonio Capuzzo el ga po’ parlà de sto libro, inframesando leture de poesie a risposte a la jente, incuriosìa da la naturalessa che se incateja l’un l’altro versi che parla de miti (“i dèi” dise Antonio, “no i xe altro che la rafigurassion de l’omo co le so debolesse”), de vita e de morte, de amore.
Ghe xe stà anca interventi da parte de la prof. Anisa Baba Bressan e del prof. Gianni Giolo che ga leto qualche poesia so ’l tema del mare, scrita da Cesare Ruffato.
Par finire, qualche scanbio de opinion su cossa ca xe la poesia, rivando a la conclusion che la poesia la xe l’Arte par ecelensa che mete l’omo in contato co l’universale.

[torna sopra]