|
Da Adria (RO)
La ceseta d’i leun
 |
| La Cesa de San Nicola, ciamà “Ceseta d’i leun” |
Strada Granda, uficialmente Corso Vittorio Emanuele II, che ninsun ciama cussì e che i adrioti de na volta i à ciamà Via Maggiore, come se pol védare ancora al giorno d’anquò da do targhete in marmo bianco incastronà int’el muro in scuminsio e a la fine del tronco centrale, l’è divisa praticamente in tri tòchi: el primo, da piassa Castelo fin al ponte omònimo; la parte centrale, dal ponte a corso Mazzini; la finale, da corso Mazzini a la Cepara.
Lungo la parte centrale, quela del spasseso d’i adrioti, comunemente ciamà “vasca”, se vèrze, senpre su la destra, do piassete: piassa Cieco Groto, davanti al munissipio, ciamà anca “piassa d’i òmeni” parchè al sabo l’è senpre folà da zente, che na volta jera solo de canpagna, che trata i so afari o i se perde in ciàcole che le duvrìa èssere inportati; piasseta San Nicola co la ceseta dedicà a sto santo da ani anorum. Squasi tuti i la conosce come la ceseta d’i leun; su ’n bel portale nero de fero batù, banda par banda, gh’è du bei leun de bronzo, che el tenpo à fato deventar tanto intabacà da parer neri anca luri, fati dal Samoggia, scultore bolognese, che mi ricordo par i cavì lunghi e un travesson senpre inpatacà de gesso par via d’i bosseti e bassorilievi che ’l ’ndava fasendo in Cesa Vecia, ch’à lassà parici segni de la so bravura in Adria.
I fa un gran bel védere, sia parchè i risalta su la faciata de piera bianca, sia parchè, colegà su i so piedestali, i è contornà da le do bande da na serie de targhe, senpre in bronzo, co i nomi d’i morti de la prima guera mondiale. Se trata propio d’un bel monumento: defati la ceseta l’è dedicà ai Caduti de tute le guere e inte la so piasseta se cèlebra le funsion civili del 4 Novenbre, del 25 Aprile e via discorendo, tanto ch’a ghè n’asta da bandiera bela alta col piedestalo formà da na statua che rapresenta la Vittoria co ai piè n’aquila, anche questa tuta roba del Samoggia.
Int’i giorni fatidici, Sindaco, gonfalon, autorità, rapresentanse civili e militari i se cata tuti lì par l’ino nassionale, i discorsi de comemorassion e conpagnìa bela. Ma i più interessà, sia ai leun che ai paracari, a forma de sedili conpagni de na “X”, che contorna la piasseta, i è i bocia. Defati da quando scuminsia l’età del capire chelcossa, fin a quela che no i capisse più gninte, parchè i se insemenisse andando a scuola, no i pol passare davanti a sta piasseta sensa tironare mare, pare, zii o altri ch’i gh’i à a man, parchè i vole andare su i leun e fare el giro intiero d’i paracari. Prima bisogna méterli su un leon e dopo su st’altro. Quando ch’i è stufi de cavalcare, i se fa tirar zo – i leun i è bastansa in alto parchè i possa ranpegarse da luri suli! – e i scuminsia el giro d’i paracari. Prima su uno e po zo co ’n salto, dopo el secondo e po zo ancora co ’n altro salto, fin ch’i riva a conpletare tuto el giro. Solo alora la magioransa ghe mola e se pole tornare a caminare su Strada Granda. De le volte, qualche boceta più tegnisso, no ’l se contenta, e ’l vole fare nantra cavalcà dessora d’i leun prima de ’ndare via. Che ste bestie le sia usà spesso a se se pol incòrzersene vardàndoghe le grope: i è più lustre del resto del corpo e el colore del bronzo vien fora dal nero de la pitura e de l’ossidassion del tenpo propio lì indove ch’a monta a cavalo i boceta. Però, se de le volte el tironare d’i pìculi el pol èssere na bela rotura de scàtole pa’ i genitori ch’a no ga tenpo da pèrdere, quanta no ela la sodisfassion int’el védere el soriso de contentessa che se vèrze su chi museti da i pùmuli russi sfogonà a forsa de salti e corse? Par mi vale parecio de più de le funsion co làbari e medajere, bandiere e divise, no parchè sia contrario al ricordo de chi poveri can che ga lassà le strasse per la Patria, ma parchè un soriso de bocia no gh’è oro ch’a lo paga! E so’ sicuro che ’l vecio Samoggia, ocesando da le nuvole, el prova na gran sodisfassion anca lu, vedendo che, oltre a onorare i Caduti, la so opera dà contentessa a tanti boceta da raquante generassion.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L'Onestà?
No la pare pi de moda.
Da quelo che se sente e se lèze tuti i sacrosanti giorni – pur sfonzàndose de no scandalizarse – a se ga l’inpression de vìvare t’on mondo… co na smanegà de coroti e de disonesti. Che la sia propio cussì?
de Mario Klein
Da Vicenza
“Il mare” de Antonio Capuzzo
presentà da la poetessa Lucia Gaddo Zanovello
de Ines Scarparolo
Da Verona
La sapiensa del musso
de Lucia Cozzolino Masotto
|
