|
Editoriale
L'Onestà?
No la pare pi de moda.
Da quelo che se sente e se lèze tuti i sacrosanti giorni – pur sfonzàndose de no scandalizarse – a se ga l’inpression de vìvare t’on mondo… co na smanegà de coroti e de disonesti. Che la sia propio cussì?
 |
| La pi parte de la zente la xe onesta, silenziosa e quasi no te la vedi gnanca… |
Che ghe sia on futìo de coroti, corutori e disonesti, no se mete in dubio. E che le persone oneste no le faga ciasso, né notizia xe altretanto vèro. Raramente l’onestà la ga inpienà pagine de giornài e telegiornài, anca se la sageza popolare la ga sfornà sentenze che dise la verità e che oncò no pare pi de moda: “Chi vive onestamente no more mai”, “L’omo onesto se contenta de la so onestà”, “L’onesto no ga paura né del ciaro, né del scuro”, “Chi no se contenta de l’onesto, perde el mànego e anca el resto”.
Tute robe vère, ma che pare che le sia par pochi ingenui e anca poco pràtiche. El stesso poeta satirico Giovenale, del I sècolo dopo Cristo, el scriveva: “L’onestà è lodata ma muore dal freddo”.
Dopo vinti sècoli xe ’ncora vèro? In parte. Ai tenpi nostri se dise inveze che el disonesto vol farte crédare che “el Signore gera paron de la legna e el xe morto dal fredo”. Sarìa come dire che el furbo – parché el disonesto el se sente furbo e el se conporta da furbo – el vole farte crédare che tuto se basa so ’l trafujo, so l’inbrojo e so ’l “dio danaro”.
Vardando el nostro tenpo, no credo che ghe sia de pi o de manco disonestà de na volta: xe canbià la forma e xe canbià el sistema de farla savere in giro, magari sperando che el farabuto el se penta, dopo èssare stà scoperto e ficà in caponara.
Anca ne la nostra cara Italia, ogni tanto salta fora de chei malafari da spegazo: i vien ciamà giornalisticamente “scàndali tributari, sugli appalti, giudiziari, dei rifiuti, della pedofilia, delle intercettazioni telefoniche, delle foto sui vip, a sfondo sessuale, a luci rosse, scandalo dei funerali, della Sanità, della Protezione civile, della fuga di notizie secretate dai Tribunali…” Ghe ne xe par tuti i gusti e tuto finisse co inchieste giuduziarie, processi, condane, preson par quei che xe stà catà… co le man ne la marmelata!
Le storie de coruzion le xe come i spàrasi de stajon, da rancurare ogni matina. No te fè ora svejarte che te ghè pronta la coruzion nova de trinca… da mandar zo in pressia, par lassarghe el posto a la prossima che sarà ’ncora pi stuzeghina de st’altra.
El resto de le persone? El resto, che xe la magioranza e che vive distante da ste rogne de coruzion e de coroti, quasi quasi i finisse par sentirse de i fessi, persone che no xe stà bone de fare i so intaressi e che xe restà indrìo… come la coa del mas-cio.
Ma, anca se el mondo el pare de i furbi, no la xe so mama: la virtù de l’onestà no la xe mai morta dal fredo, anzi la xe tegnù al riparo da la pi parte de la zente che tase e che fa el so dovere.
Disemo che ghe xe bisogno de separare “la zizania dal gran” e de darghe pi visibilità a la vita onesta e al ben che vien fato in silenzio e ’traverso el sacrificio. Non col conpromesso, co l’oportunismo o col goadagno personale e basta. La stessa crisi che ne ga colpiò, la pole èssare superà solo co on raporto de fiducia che viene da l’onestà.
Mèjo par tuti, dunque, se l’onestà la torna de moda.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L'Onestà?
No la pare pi de moda.
Da quelo che se sente e se lèze tuti i sacrosanti giorni – pur sfonzàndose de no scandalizarse – a se ga l’inpression de vìvare t’on mondo… co na smanegà de coroti e de disonesti. Che la sia propio cussì?
de Mario Klein
Da Vicenza
“Il mare” de Antonio Capuzzo
presentà da la poetessa Lucia Gaddo Zanovello
de Ines Scarparolo
Da Verona
La sapiensa del musso
de Lucia Cozzolino Masotto
|
