| de Lucia Cozzolino Masotto |
|
Da Verona
La sapiensa del musso
 |
| Mussi… bestie messe ingiustamente da parte. |
Darghe de l’àseno a qualcheduni l’era un insulto che ghe n’avéa una serqua de altri drento. “Te si un àseno; ignorante come un musso; averghe le rece da musso; te si indrìo come la coa del musso; averghe la belessa de l’àseno…” El posto ne l'ultimo banco in fondo a la classe l’era quel de i àseni. I insulti par questa pòvara bestia i se butava via. Del resto Pinochio e el so amigo Lucignolo i vegnéa trasformadi in àseni dopo che i s’aveva passà via nel Paese de i Balochi: estrema punission, tirar el careto e non averghe altro dirito che quela de rajar e pararse via le mosche con la coa, che, tanto se sa, rajo de àseno non va in çiel.
Ne la leteratura la figura de l’àseno l’è stà presente fin da l’antichità, da: L’Asino d’Oro de Apuleio, tanto par dìrghene una, a Pele de Aseno ne le favole, al giornal satirico L’Asino di Podrecca e Galantara, publicà tra la fine del 1800 e fin al 1925, indove che l'àseno l'è senpre el porocan, tormentà da la scarogna e da i cagnoni grossi del poter.
Ma, in tute le storie ghè senpre un ma (congiunsion aversativa), senò non ghè storia. Ben, è stà dimostrado che el musso, l’àseno, l’è tanto, ma tanto più inteligente del caval. El caval – dise i esperti - bisogna comandarlo e adoparar le maniere forti, doparar la scuria e i speroni, par farghe far quel che se vol; el musso bison spiegarghe, convìnsarlo a far, senò, non ghè frusta o baston che tegna.
L’era la Cinquecento de i poveri: avérghelo el mussetto, invesse de dover movarse a caval de San Francesco (a pedagna)! Presente anca ne la canson popolar: “Son vegnù da Montebel a caval de n’asinel…” L’era belo solo lu, che el portava l’anel a la so bela! E, anca se non l’era un purosangue, bastava métarghe un poche de capole e de fiori – proprio come i fa ancò quei che cronpa l’auto strapiena de “optional” – e i se faséa convinti de averghe el più bel caval del mondo.
L’era anca el furgonsin de i picoli comercianti, quei che prima i andava in volta con la casseta su le spale o che tirava la careta a man. I frutaròi i passava par la strada con el careto tirado dal musso che i aveva ciamado magari con el nome de una persona. Me ricordo de quel che el se ciamava Marco e el so paron el vendeva le tegoline: tre chili e mezo çento franchi.
Ancò non ghè più careti e cavài e in tante strade ghè el cartel che non ghe permete de passar. Così, come i cavài, quando che i ga da far un bel tòco de strada, i le mena via in camion o sui van. Ci l’avarìa mai dito che sarìa andadi a caval de l’omo? Secondo qualcheduni i mussi i è così furbi che i se veste da semi par non pagar el dassio.
E alora, a cossa sèrvelo el musso? Intanto a dar el late e no par far végnar bela la pèle, come faséa Poppea, ma el serve par quei butini che non digerisse altri tipi de late: quel de l’àsena l’è uno de quei che ghe someja piassè a quel de la mama.
L’è una bestia da trasporto quando se fa le sagre, a Roncà i ghe ne fa una proprio par lu la quarta doménica de lujo; in çerte scaessagne dove non ’riva le auto el ’riva lu; da carne – el salame de musso l’è tra i più particolari – e l’è anca una belissima bestia da conpagnìa.
Da conpagnia?, me domandarè. Sì, perché, a difarensa del caval, l’àseno el çerca la presensa e le caresse de l’omo. E anca qua se sfanta via ’n’altra busìa sul poaro musso, quando i dise che no ’l ga sensibilità, che el fa butar via tenpo e schei se dise: “L?è come darghe un biscotin al musso”, o “lavar la testa a l’àseno”.
L’è una bestia bituada a portar passiensa e la porta indosso anca le persone con problemi. E la cura se ciama “onoterapia”. In sto lavoro la va benissimo e mèjo del caval, intanto perché l’è più basso, ma soratuto perché l’è bon e la se lassa tocar, sensa scarti e sensa onbre. Insoma, se pol far l’equassion: el caval sta al gato come el musso sta al can.
A Stalavena, località Basalovo (forsi vol dir basar el lupo) insieme a tanti bei cavài, ghè anca un alevamento de mussi...
La dotoressa Silvia Allegri, varda caso, veterinaria la ga una gran passion par i mussi, bestie messe ingiustamente da parte. Basta ricordarse che Giugurta l'aveva dito: “Non ghè fortessa che possa resìstar, se se ghe manda drento un musso cargo de oro.”
Anca Papà del gnoco el va a spasso par Verona insima a un musso e Santa Lussia la porta i regali ai butini a caval de un mussetto e nel presepio insieme al bo ghè proprio l’àseno.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L'Onestà?
No la pare pi de moda.
Da quelo che se sente e se lèze tuti i sacrosanti giorni – pur sfonzàndose de no scandalizarse – a se ga l’inpression de vìvare t’on mondo… co na smanegà de coroti e de disonesti. Che la sia propio cussì?
de Mario Klein
Da Vicenza
“Il mare” de Antonio Capuzzo
presentà da la poetessa Lucia Gaddo Zanovello
de Ines Scarparolo
Da Verona
La sapiensa del musso
de Lucia Cozzolino Masotto
|
