|
Editoriale
El tenpo: córare o ralentare?
Semo da poco vegnù fora da la pausa estiva e semo tornà a fare quelo che se faseva prima. Come xe mèjo afrontare la nova stajon lavorativa? Xe ben métarse a córare par recuperare el tenpo de le ciàcole estive, o xe mèjo ridure… la corsa contro el tenpo?
 |
| Da Salvator Dalì l’idea de “piegare” el tenpo a nostro uso inteligente e consumo. |
Anca senza rèndarsene conto, scometo che sta domanda a se la ghemo fata tuti, na volta che semo rientrà da la vacanza al mare, al lago, a la montagna o a ramocia, sarà sù in casa, parché i vizini no i diga che ne xe mancà le petenele da permétarse na vacanza no sò dove.
Forse se ghemo anca dito: “Come passa el tenpo! No te fè mia ora a métare el piè so ’l paradiso terestre de le ferie, che za te toca voltarte indrìo e métarte a fare quelo ca te fasevi prima! El sarà anca on gran maestro, el tenpo, ma el fa morire tuti i so scolari!”
Son convinto che, senza cativeria, a semo on poco tuti rabià col tenpo; verso de lu no ghemo par gnente na gran sinpatìa; lo vedemo come on ladro, on nemico, on male, na bruta bestia che ne speta al varco par tuta la vita. Invesse, al contrario, el xe on amico onesto, che ne conpagna e ne ricorda che no bisogna butàrghene via gnanca na frégola, parché no ’l torna pi. Bisogna tegnérselo in bona, parché no ghe xe gnente al mondo che ne se vèndica contro pi del tenpo.
Ma la domanda de base xe: “Come ghemo da conportarse de fronte al tenpo?” Na risposta ùnica no la esiste: xe dimostrà che par i veci el tenpo el passa piassè in pressia che non par i zóvani che ghe pare de poder senpre riciaparlo in man. Epure lu el xe preciso par tuti. Tuti, có se se sveja a la matina, se ga a disposizion on borson pien de ore: esatamente vintiquatro, né una in pi né una in manco: vintiquatro ore par tuti, vintiquatro ore a nostra disposizion, da far frutare al mèjo, da no sprecare e da spèndare secondo le propie regole de vita.
Eco ’lora che no xe né da córare, né da ralentare: bisogna seguire le propie esigenze, tegnendo senpre presente che, par fare contento el prossimo, xe ben che sia contento mi, parché se son contento mi, riesso a far contenti anca i altri; se son felice mi, riesso a far felici i altri, tegnendo senpre presente che el tenpo speso par i altri, in definitiva, el xe speso ben anca par noantri. Par questo xe inportante assè abituarse a spèndare el nostro tenpo a favore de la giustizia, de la libertà, de la solidarietà nel mondo.
Tante volte se sente dire che “il tempo è denaro”. Sì, parché xe come se ogni giorno te vegnesse messo a disposizion na cifra fissa de schei: se te li spendi, bene, se no te li spendi, pezo par ti: “ogni lasciato è perso”: có xe sera, el tacuìn torna vodo. La stessa roba el giorno dopo, e quelo dopo oncora. Dunque bisogna vìvare el presente, fasendo ogni giorno el mèjo investimento, dàndoghe el giusto valore a ogni àtimo a disposizion, parché chel’àtimo xe na pìcola parte de la nostra vita che se consuma.
Se gavì osservà, l’omo moderno el fa tute le robe pi in pressia possìbile par no pèrdare tenpo, ma dopo no ’l sa cossa fare del tenpo guadagnà e spesso el lo spreca, parché saver usare ben el tenpo no la xe solo na virtù, ma anca on’arte. On’arte a disposizion… de chi ga tenpo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El tenpo: córare o ralentare?
Semo da poco vegnù fora da la pausa estiva e semo tornà a fare quelo che se faseva prima. Come xe mèjo afrontare la nova stajon lavorativa? Xe ben métarse a córare par recuperare el tenpo de le ciàcole estive, o xe mèjo ridure… la corsa contro el tenpo?
de Mario Klein
Ricorense
I 100 ani de la “Vaca Mora”
de Luigi Frosi
Cultura vèneta
A Licia Colò el Premio “Basilica Palladiana”
’Nte la soasa de Vila Sesso-Schiavo, a Sandrigo, xe stà consegnà el riconossimento pi spetà da i operatori culturali vèneti
de Giordano Dellai
|
