|
Ricorense
I 100 ani de la “Vaca Mora”
 |
| La “Vaca Mora”, ferovìa a cremaliera da Piovene Rocchette a Asiago. (p.g.c. Foto Edizione Bonomo, Asiago) |
”Per quest’anno, non cambiare...” dizeva na volta la canson e cussì, anca sto ano, semo tornà su l’Altopiano a passare le vacanze come el nostro solito: qualche dì par sistemarse e ciàpare l’aria e po’, a l’Uficio del Turismo par informarse de le varie proposte culturali e “mondane” che come ogni ano vien organisà par turisti e vilegianti da le Pro Loco de i Sete Comuni.
Vardando el libreto “Guida Turistica dell'Altopiano” quelo che me ga fato pi colpo xe stà le manifestassion par el ”Centenario della Vacca Mora”, la ferovia che da Thiene-Piovene Rocchette gheva unìo la pianura co i paesi de l’Altopiano. Sta ricorenza xe stà vossùa da l'Associazione degli Artigiani de Vicenza che ga sponsorizà le varie manifestassion: na setimana de incontri che ga visto la colaborassion de tre Pro Loco: Treschè Conca, Cesuna e Canove. Sto ricordo el xe scuminsià sabo 7 agosto co na marcia fiacolata in noturna, da Campiello a Canove su la strada de la vecia ferovia che la xe stà sistemà par bici montan-bike e par la zente a pie. La doménega drio, a Cesuna, un spetàcolo teatràe del grupo “I Trivelini”, “El tenpo de un cafè”, la durata de la sosta de la “Vaca Mora” par fare el pien de aqua dopo la salita a cremaliera del Costo. El marti dopo, a Canove, na serata culturale su la storia del trenin co un filmato pien de foto e comenti par la costrussion de la ferovia. Cussì par st’altri dì. Sabo 14, par finire, na sfilata de bici d’epoca, senpre su la strada del trenin, da Campiello a Canove, dove ne la vecia stassion (deventà el Museo de la “Grande Guerra”), ghe xe stà la cerimonia conclusiva del sentenario. Par l’ocasion, le Poste Italiane, ga dà la possibilità de un anulo speciale pa’ i amanti filatelici e non.
Sto trenin, che da Piovene Rocchette portava a Asiago, ga segnà un’epoca, la fine de l'isolamento de l'Altopiano, unendo la pianura a la montagna e permetendo un svilupo economico e turistico de la zona. L'idea xe nata al paron del lanificio ”Rossi”, el sior Alessandro, che ’l jera afetivamente ligà a l’Altopiano, tera de origine de i so avi e, poderla ligare a la pianura jera senpre stà el so sogno. Finalmente, dopo tanti sforzi, el xe riussìo a métare d’acordo Governo, Provincia e el Consorzio de i Sete Comuni par far realizare l’opera: cussì el 3 otobre del 1904, col Regio Decreto n. 728, xe stà dà el via a la realisazion de sto tòco de ferovia. Nel 1908 parte i lavori, par primo xe stà fato el ponte sul fiume Astico: na òpara granda senpre, tuto in fero, longo 151 metri a na altessa de 70 metri sul canale. Le locomotive che doveva sfadigare par tirar sù vagoni co merci e persone, tre par la precision, le jera stà ordinà a na dita svissera. Cossì, el 10 febraro del 1910, soto na gran nevegada, el primo viajo inaugurava l’opera realizà a tenpo de record, anca se l'inaugurassio uficiale la xe stà fata el 4 de agosto del stesso ano. El sogno de védare realizà quela che alora jera stà definìa ”La ferrovia più ardita d'Italia” jera deventà realtà: 21,16 km de binario a scartamento ridoto, co’ 7 stassion, 10 casèi e 6 galerìe scavà tute a man, (la seconda adiritura elicoidale) che permeteva al trenin de rivare sora al Costo. E la ”Vaca Mora”, pena partìa, ela se gansava a na cremaliera e par 6 km la superava na pendensa del 12,5%, rivando a Campiello, 965 m de altessa, dove che la se fermava par fare el pien de aqua (3.000 litri e 10 q de carbon consumài par la salida), e continuare dopo par boschi e pascoli. Eco el parché de la “Vaca Mora”, na macia nera sbufante come na vaca mora, diversa da st’altre tante vache sparse su l’Altopiano. Alora, pa ’ndare e tornare, se spendeva 4 lire e 35 centesimi; el tenpo par andare da Piovene a Asiago, conprese le soste, jera de na ora e meza, contro le 5-6 ore che se ghe meteva, col careto tirà da cavài e mussi par la strada statale del Costo.
Passài squasi 50 ani, sto trenin, dopo aver passà le do grande guere, el ga dovesto arèndarse davanti ai mezi de trasporto, pi economici e moderni, che faseva el so stesso servissio. Cussì, el 30 lujo del 1958, el ga dovesto fermarse e, in poco tenpo, come che ’l jera nato, i lo ga desfà. Xe da ricordare che i comuni dove che ’l coreva, i ga trasformà la strada ferata in te na strada da passejo, sia par la zente a pie che par le bici moderne che core su par le montagne.
Co sti festejamenti a me xe vignesto in mente có so’ stà in Brasile: anca là i gheva fato un trenin, ”La Maria Fumassa” che da Bento Gonçalves la portava in pianura fazendo tre giri del monte e passando par tre galerìe. Dopo ’verla desmessa, i la ga trasformà in te un trenin turistico, che ancora incò la porta la zente in te un viajo de promossion culturale e gastronomico a l’italiana, co assaji de i prodoti e vini locali, aconpagnà da musiche italiane e gaùshe. Tuto el mondo xe paese!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El tenpo: córare o ralentare?
Semo da poco vegnù fora da la pausa estiva e semo tornà a fare quelo che se faseva prima. Come xe mèjo afrontare la nova stajon lavorativa? Xe ben métarse a córare par recuperare el tenpo de le ciàcole estive, o xe mèjo ridure… la corsa contro el tenpo?
de Mario Klein
Ricorense
I 100 ani de la “Vaca Mora”
de Luigi Frosi
Cultura vèneta
A Licia Colò el Premio “Basilica Palladiana”
’Nte la soasa de Vila Sesso-Schiavo, a Sandrigo, xe stà consegnà el riconossimento pi spetà da i operatori culturali vèneti
de Giordano Dellai
|
