Da la Lessinia Centrale (VR)

El caro de fen

Eco el Marce… co la so Angelina.

Ghè stà na sera, coando ero a famejo dal Marce, che a ora del filò, el Marce el m’à dito:
“Dài, Gigio, che nemo a far filò ne la stala su insima a Rosaro, ne la stala del Ticiò. Go da conbinar on caro de fen e bisogna che se metemo d’acordo. Tóte sù la giacheta e dài che nemo!”
Mi ò fato come el m’à dito e semo partìi. Ne la stala del Ticiò, mi no’ ghéra mai ’ndà, e come tute le stale, ghéra sète, oto bestie, tachè al maón, là bele che le rumiàa; ’pena rento a drita e a sanca ghéra na fila de bale de paja, tute consumè a forsa de sentarse e sentè su ’ste bale ghéra pien de gente: ghéra butèi e butele, ghéra spose su de età e ghéra ’n par de buteleti, e là nel canton vissin a la fenara, ghéra l’omo che el Marce el ghéa da parlarghe. Ne semo sentè lì arente, el Marce su la bala de paja e mi i m’à dato el scano, coel che i doparàa par mondre le vache e i du òmeni i è né subito ne l’argomento de vendre e comprar ’n caro de fen. El Marce el conpràa e l’altro el vendéa. El Marce el diséa senpre che ’l fen no’ se ’l vende mai, parché ci vende el strame (fieno) el conpra la fame. “L’è belo, l’è san, l’è sta segà dóino, l’è stà méto ìa ben, l’è comodo da tór e te ’l dào a bon presso!” el seitàa dirghe sto omo. E el Marce el ga risposto: “Sò che te si uno che laora ben e che te piase le cose ben fate, ma la verità la sarà ciara, se le vache le le magna el to strame e se vedarò che le cresse de late, alora se pol dir che l’è san, che l’è bon e tuto coel che te me ’l lodi el to fen e sicome stemo arente de posto, se te me conti busìe, te ’l dirò e te meno a védare la verità e le sarà le me vache a dìrtela, lassando el fen ne la grupia. E adesso pensemo al presso, e a coando vegnemo a torlo.” L’omo del fen da vendre, l’era ’n omo ben vestìo, ma ne la stala ghéra poca luse e solo coando el s’à leà ’n pié ò isto che el ghéa la giaca mora, con le braghe stesse e la camisa bianca e el ghéa on bel capel moro e finché l’omo l’è nà fóra na s-cianta, go domandà al Marce ci l’è, parché òmeni su de età col vestito, par le stale a far filò, no’ se de vedéa mai; i morosi, sì, coéi te i vedéi a la festa col vestito, ma dal dì de laoro, no’ se vedéa nissuni. E el Marce el m’à dito, soto osse: “L’è el Perini Albino, l’è el Sindaco del Sèro, el ga anca lu i canpi, e no ’l ga mia le bestie e cossì el fen el le vende tuto e de solito el ga roba bona.”

Anca lore le laoràa ben e ghe piaséa le cose ben fate…

Coando l’è tornà rento l’omo del fen, i sà conbinà sul presso e sul dì che saréssimo né a tor el strame al Sèro. El Marce el ga domandà: “Vuto ’n po’ de capara o te fìdito de mi?” La risposta l’è stà seca: “De ti me fido a oci serè, eto capìo, Marcelo?”
’Pena fenìo l’afar, el sindaco el ga domandà al Marce: “Ci èlo coel bracheto che te ghè adrìo e da ’ndó vègnelo?” segnàndome col diel. Alora el Marce el ga dito: “L’è on neodo del Brisàola, te ’l conossi el frutaról, coel che ’l fa anca el cogo, e che ’l ven da Sago?” “Sì, sì el conosso anca massa, parché el Brisàola, l’è pi al Sèro che ne al so paese; el fa el cogo a la festa a l’albergo dal Lèssi. El vende la so roba in te ogni contrà e al Sèro i le conosse de pi de mi che son el so Sindaco!”
’Sto discorso l’è stà scoltà da la dona che ghéimo lì arente e la s’à messo subito a rìdere e a dighe al sindaco: “El fa poca fadiga, so nono de coel lì, a farse voler ben de pi de ti, anca se ti te si sindaco, lu ’l ne conta le barselete e ti, invesse, te ne fe pagar le tasse e anca el previal!”
El sindaco el ga risposto con calma e con bela maniera diséndoghe: “Cara mia, parché la vita la vàa avanti e magari anca ben, ghe vol gente come el Brisàola e gente come mi, che a òlte, me toca far anca l’antipatico, ma credo che se mi e el nono de coel braco lì, se scambiéssimo i laori, mi no’ saréa sinpàtico come el Brisàola. Ma la vita l’è cossì e acetémola cossì come l’è.” El Marce, anca lu l’à dito la sua, disendo a ósse ’n po’ alta: “Mi go canpi soto el Sèro e canpi soto Gressana, ma del Sindaco del Sèro, digo e ò sempre dito de ben, che l’è on gran omo!”
I altri che ghéra par la stala de i nostri discorsi e che ghéra el sindaco, poco ghe interessàa, anca parché era restà a filò du, trì butèi e do, tre butele e i ghéa da parlar de altro… lori.
Tri, coatro dì dopo, mi e el Marce, semo né al Sèro col caro e con i bo che semo né a torli ’n presto sul Briago dal Rico Giberti e finché che mi tegnéa fermi i bo, el Marce, el Sindaco e nantro omo che ghe jutàa i à cargà on caro stracolmo de fen, butàndolo zo da la teda che ghéra tacà a la casa del sindaco, lì ne la corte arente a la cesa del Sèro. A le una émo fenìo e prima de nar a pesar el fen a la pesa che ghéra in fondo al paese, la dona del sindaco, l’à volù che magnemo on piato de minestra e me ricordo ancora ben che i éra le paparele con i figadini e dopo a mi la m’à dato anca on paneto col formajo. A peso fato, el Marce col sindaco i è né a l’ostarìa che ghéra tacà a la pesa e i à fato i conti e el Marce ’l ga pagà el fen. Mi che séra davanti ai bo a tenderghe che i stàa fermi, a afar fato è vegnù el sindaco con meso goto de vin caldo a dirme: “Dài, brachéto, béelo e scàldete anca ti…”

[torna sopra]