Vicenza Arte

Mostra pa’ Otello De Maria

Un momento de l’inaugurassion de la Mostra.

A go fato i oci lustri, có go ciapà l’invito de la Ricciarda a ’ndar a l’inaugurassion de na Mostra dal bon speciàe, pensà pa’ i sinque ani da la morte del caro Maestro Otello De Maria (1909-2005); la gavarìa dovudo èssar za stà fata l’ano passà, ciapando l’ocasion da i sento ani che Otelo gavarìa conpìo ma, se sa, le robe le va par le longhe có se trata de schèi e burocrassìa... Eco el parché del tìtolo de l’Esposission: “Sentoeuno – Otello De Maria: 'n omo, 'n artista”.
La xe stà fata, dal 4 al 22 setenbre passà, in te i locài de l’Assoc. ART.U’ – ARTISTI UNITI de l’Amico Davide Piazza, Presidente de la Scola de Pitura “La Soffitta”, fondà da De Maria a Vicensa tel 1957. La rancura le òpare de Otello de l’ùltimo periodo, che par de pi no se conosseva e che la Ricciarda ga ben voentieri tirà fora dal so scrigno de tesori par far in modo che Vicensa capisse calcossa de più de sto grande artista, “ancora massa poco conossudo”, ga precisà el prof. Bagnara, sia te la so produssion e, ’ncora manco, come omo.

Otello De Maria, Collage.

“Otello, te me vien inamente, seto, có vegnéo catarte casa e te me mostravi le to ùltime creassion... Daromài no te jutava pi le ganbe e gnanca la vista, ma i to oci savéa védare istesso quéo che bastava, al de là de le forme, pi ’n là de i colori... Te rancuravi carte de giornàe, tochi de carta ’ngelica, cartoni da inbalajo e te creavi co la cola, co ’n colpo de penelo, co la carta de on cicolatin o co ’e borsete de cartonsin colorà de la spesa... n’òpara d’arte, insegnàndoghe a tuti quéi che te stava rente, e sora de tuto ai to alievi, che la materia se rinova, che ’l colore el se reinventa, che ’l pitore che ama dal bon l’Arte, el sa anca ris-ciare, rivando a darghe emossion ai altri co la massima libertà creativa.”
El prof. Mario Bagnara ga parlà de i fati inportanti che, fin dal 1992, in quanto Assessore a la Cultura visentina, lo ga ligà al Maestro e a la Ricciarda: la nomina de Otello a Academico Olìnpico, la Mostra par i sessant’ani de atività pitorica, e ’l stesso ano el ga vudo anca ocasion de consegnarghe la Medàja de Oro come “Visentin Benemerito”; tel ’97 xe stà fata na Mostra tanto inportante in Galeria Ghelfi e infine, tel 2002, el Comune ghe ga alestìo na Mostra ’ntològica in Galeria de i Zavatteri, da majo a lujo, curà da Giuliano Menato e Fernando Bandini.
Insoma, Vicensa ga scominsià inacòrzarse de sto gran personajo solo a la fine de la so atività artìstica; parò De Maria el xe stà senpre on “bastian contrario” e no ’l ghe le ga mai mandà a dire, né ai politici né ai altri cagnoti grossi, sensa desmentegarse de preti e basabanchi... El gavéa l’istinto pedagogico e l’insegnava senpre ai so alievi, prima de la Scola Arte e Mistieri de Vicensa e, dal 1957, de “La Soffitta”, che par èssare on artista ghe vole sì el talento ma insieme anca tanto lavoro e sacrifissio.

Otello De Maria, Il matrimonio di Otello De Maria. (foto Ines Scarparolo)

El ga scominsià a disegnare, co na abilità granda, za a sìe ani; par ben coatro volte l’è stà a la Bienale de Venessia (1950, 1952, 1954 e 1970), el ga òpare sue a New York e in Giappone ma, anca se i so amissi pitori del primo Novesento se ga coasi tuti ’lontanà da Vicensa pa ’ndare a Milan o altre sità grande, elo xe restà senpre qua, te la so sità par la quale, anca se de le volte el la criticava in maniera dura, el provava on sentimento de amore grando.
Poco posso dirve ’ncora, ma chel bagno de Arte fato el 4 de setenbre in Galeria ART.U’, me ga comossa e me ga dà on spuncion pa ’ndar ’vanti e inparare che, par far pitura, no bison “védare”, ma “sentire”...
Grassie dunque a Ricciarda, sposa de Otello e cara amica de tenpi felissi, a Davide Piazza e Mario Bagnara che i me ga regalà calcossa de splèndido, ricordando el Maestro co le so paròe, ai Artisti tuti che go catà chel dì a l'ART.U', dopo tanto tenpo: Concetto Di Modica, Pino Bassetto, Teresa Soardi, Franco Celli, Guerrino Sartori, Franco Vian, Giuseppe Pozzan, Bonizza Modolo, Stefania Bernardotto e... se ghin’ò desmentegà, perdonème, ma jero massa emossionà!

[torna sopra]