| de Maria Penello Mingardi |
|
Fantasìa visentina
L’apalto
 |
| El treno el stava pa’ partire quando a l’ultimo minuto… |
El diretor de na grossa assienda, el sior Marcini, el ga fato ciamare on zóvane inpiegato: Sergio Galanpi. “Galanpi, vojo darve un incàrico speciale. Doman a Genova ghe xe n’asta de l’aministrassion de la provincia pa’ l’apalto de un lavoro de un novo ponte. Nojaltri concoremo. Elo el portarà la nostra oferta scrita, personalmente. Go selto elo parché ocore ’n omo inteligente, robusto e coragioso, oltre che de na onestà a tuta prova. Me spiego: l’afare l’è grosso, el fa gola a tanti. Le dite concorenti, lo sò par sicuro, che le farà de tuto pa’ conóssare la nostra oferta al ribasso, so ’l presso de base. Sercando de farne pèrdere la gara, anca co la forsa. Stè in canpana! Ve la sentìo de afrontare la lota?”
L’inpiegato con un soriseto sornione el ga risposto: “Come nò! Col massimo piassere.” El diretor che no ’l se aspetava un rifiuto: “Jera proprio quelo che pensavo! El sa che mi vegno da na fameja de contadini e ghe xe n’antico proverbio che dise ‘Scarpa grossa e sarvelo fin’ A ghe spiego el me piano. Ècove cinque buste sarà, co ben in vista l’inderisso de l’aministrassion provinciale. In quatro de lore ghe xe on folieto bianco. El ghe ne metarà una so la valisa, una sol portafolio, e le altre do so le scarsele de la giaca. I ghe le robarà! Ma no fa gnente. Ma la quinta busta, la più pressiosa, el se la meterà nel pèto. Capio? El tèermine pa’ presentare l’oferta el scade a le diese de doman matina, un minuto più tardi e tuto sarà perso. Ma elo el sarà puntuale. ’Desso xe le sédase, el partirà col rapido de le 17,54, el rivarà a Genova a le venti. Se el riussirà ghe sarà pa’ elo, na gratificassion, e un aumento de paga. Intanto ècove i schei pa’ le spese, aqua in boca e bon viajo e bona fortuna.”
Sergio rivà a casa el se ga ligà la pressiosa busta nel pèto, co na pìcola fassa, e le altre come gaveva disposto el diretore, metendo so la pìcola valisa anca un pigiama. Ciapà posto sol treno, el se ga slongà fora dal finestrin pa’ conprare un giornale. Voltàndose pa’ sentarse el se ga inacorto che la valiseta la jera stà canbià: la jera pìcola, zala e voda. Sergio el ga fato na smorfia, po’ el se ga messo a rìdare pensando a la delusion de chi ghe la gaveva robà, convinto de trovarghe dentro la busta bona. El treno el stava pa’ partire quando a l’ultimo minuto xe montà na signorina grassiosa e ciacolona. Anca ela la ’ndava a Genova. Ma a Voghera, l’unica fermata che faseva el treno, la xe smontà velocemente. La dona xe mobile ga pensa l’inpiegato, palpàndose la scarsela da la parte dove ela jera sentà, capindo subito che la busta la jera sparìa. “E do”, el ga pensà; la situassion cominciava a divertirlo. ’Ndà in albergo, el ga pensà de passare la serata al cinematografo là vissin: in via Venti Setenbre. Quando da l’onbra xe tornà la luce, el se ga trovà sparìa anca la tersa busta. Serto i gaveva corajo, ma chissà con che naso i restarà quando i trovarà solo un folieto bianco. A la matina dopo el ga pensà de tirar via i schei dal tacuin, disendo: “No vorìa che insieme a elo, sparissa anca i petachìni che me ga dà el diretor.” El jera stà on bon profeta, parché in te na piasseta vissin a l’albergo on grupeto de zóvani i lo ga urtonà faséndoghe sparire el portafolio. I so persecutori delusi de aver trovà solo un folieto bianco, i ga cominsià sbalotarlo de qua e de là, sercando de frugarlo. Sergio stufo de la situassion el xe partìo so la difensiva, molando pugni e peà a tuto andare fin che no xe rivà un vigile che el ghe ga inposto de andarghe drio, in Questura. La situassion no la jera tanto alegra. Bisognava che rivasse el funzionario. El pòro inpiegato el se sentiva morire. El ga cominsià a suplicare, a spiegare. Ghe ga vossudo del tenpo, prima che el funzionario el capisse e lo lassasse andare. Intanto jera rivà le diese, l’ora fatale. Tremando el se ga messo a córare, traversando piassa De Ferrari e su par via Roma: arfiando, ’l jera rivà al Palasso de Giustissia. Tirando el fia longo, el ghe ga domandà a l’ussiere: “L’asta, l’apalto?” L’ussiere ghe ga risposto: “Fato, agiudicà!” El pòro Galanpi, molo, molo, el se ga sentà so na bancheta. Dunque dopo tuto i jera riussìi. Altro che rìdare: i lo gaveva batù, busarà elo e la dita dove el lavorava. Adìo gratificassion, aumento de paga, nosse e lavoro. On fiasco, che rovina!
“Ècove qua, finalmente!” Quela vosse! Alsà i oci el xe restà a boca verta, sensa capire più gnente. Ghe stava davanti Marcini, el so diretore. “I me ga robà le buste, la tràpola, ma quela bona la go salvà.” Tastàndose nel pèto Galanpi el ga tirà fora la busta tuta infrapolà. El diretor el ga verto el folieto, ridendo: el jera bianco. “Védelo, Galanpi, la jera na tràpola anca questa.” El pòro inpiegato no ’l saveva più cosa dire: “Ma alora mi…” El diretor ridendo: “Caro Galanpi, tuto xe ’ndà ben. El ga svolto ben la so mission, che jera quela de sviare i concorenti, portàndoli so na falsa pista. La busta vera la go portà mi, rivando stamatina col primo treno. L’apalto el ne xe stà agiudicà, e elo el gavarà i aumenti promessi.” Sergio el ga tirà un sospiro de solievo, el ga vardà el diretor, ridendo amaro: “Diavolo, el gavarà anca el sarvelo fin! Ma jèrali schersi da fare?”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
de Mario Klein
|
