|
Teatro e Teatri
Gino Rocca e el so teatro
 |
| Locandina de Se no i xe mati, no li volemo de Gino Rocca, par el Teatro Stabile del Veneto “Carlo Goldoni”, regia de Giulio Bosetti. |
Gino Rocca el xe nato a Mantova el 22 febraro 1891; so pare jera torinese e so mare feltrina. El ga passà la so adolessensa tra Feltre, Torin, Treviso e Venessia. El se ga iscrito a la facoltà de giurisprudensa de l’Università de Padova, ma po’ dopo el se ga trasferìo in quela de Torin; pare però che inte ’l 1913 el ghe gabia molà de studiare. El xe ’ndà a Milan, indove el ga conossudo Benito Mussolini, che lo ga fato entrare al Il Popolo d’Italia, in prinsipio come sènplice radatore de la cronaca giudissiaria locale, e po’ dopo, par oltre venti ani, come critico teatrale. El ga scominssià a ocuparse de teatro, inte ’l 1914, scrivendo un testo in dialeto veneto: El sol sui veri, che xe stà rapresentà gnentemanco che da el celebre Ferruccio Benini, ma che Renato Simoni (in chel tenpo, oltre che comediografo, el jera anca critico teatrale al Corriere della sera) inte le pagine del so inportante quotidiano, ga scrito che le capassità de l’autore le jera modeste, incorajàndolo però de ’ndare ’vanti par la so strada.
El teatro veneto el ga da spetare ’ncora diversi ani prima de védare Gino Rocca fra i so più grandi autori. Influensà da l’avento de la prima guera mondiale, inte ’l 1919 el ga scrito el romanso L’Uragano, che el ga ’vudo un clamoroso sucesso, e inte ’l 1920 Le Liane e La farsa dei nevrastenici. Inte ’l 1931 el ga ricevudo el Premio Bagutta par el romanso Gli ultimi furono i primi. Inte ’l 1934 el xe stà nominà diretore de el primo Festival Teatrale della Biennale di Venezia, e, par la prima e ultima voltà inte la so vita, el ga curà la regìa teatrale par la comedia de Carlo Goldoni La Bottega del caffè, realizà inte la Corte del Teatro di San Luca de Venessia, proprio par la inaugurassion del Festival (inte ’l stesso programa, inte ’l Campo di San Trovaso, el grande regista Max Reinhardt, el ga messo in sèna Mercante di Venezia de Shakespeare).
Gino Rocca el ga continuà intanto la so colaborassion giornalistica co’ el Popolo d’Italia e co altre prestigiose riviste come La Lettura e Dramma. Dal 1937 al 1938, el se ga trasferìo a Venessia, indove el ga direto Il Gazzettino. Tornà a Milan, el ga publicà inte ’l setimanale Il Milione quatòrdese ati unici ispirài a fati de cronaca che jera capità in quela çità. E cussì el ga continuà fin a quando le so condission fisiche le se ga ’gravà: conseguensa de ’na ferità de guera che ghe xe costà l’anputassion de ’na ganba. El xe morto a Milan el 13 febraro 1941, ma la so sepoltura la xe stà fata inte ’l simitero de Fonzaso, inte ’l Feltrin.
Come vedaremo più ’vanti, Rocca ga scrito più comedie in italian che in dialeto, parché el periodo del Fassismo ga rapresentà, par el teatro dialetale, tenpi tanto difìssili; la critica uficiale, infati, la jera ostile e poco propensa a ciaparlo in considerassion, par via de la so natura considarà massa machietistica, e anca el “regime” invitava adiritura la stanpa a ocupàrsane manco che se podeva; e xe stà solo par la ecessionale bravura de qualche grande atore che ’sto teatro se ga salvà da la desméntega più conpleta.
Tra i più de novanta titoli de le so comedie, xe da ricordare: in italian: L’altro amore, Trame, Gigomard, Tramonto romantico, Vecchie storie, Il martirio di San Gregorio, Il primo amore, Le liane (che la xe anbientà in Congo), La farsa dei nevrastenici, Le corna del dilemma, Noi, Il vincolo del dolore, Colpi di spillo, L’uccisione di un generale in Cina, Tragedia senza l’eroe, L’inganno, Purificazione, L’ora onesta, Dopo di noi, L’amante di suo marito, La calzetta rotta, La pelle, L’intesa, La gelosia, Cessate il foc!, Le lettere dell’altro, Gli amanti impossibili, Nido rifatto, Il gladiatore morente, Il terzo amante, Volo a Vela, Le carte son sincere, Il re povero; in dialeto: El sol sui veri del 1911 - Un baso del 1924 - Se no i xe mati, no li volemo (el so capolavoro), La vecia insempiada, L’imbriago de sesto (ato unico), La scorseta de limon (ato unico), Checo (ato unico) del 1926 - Sior Tita paron del 1928 - Su di noi del 1931 - Mustaci de fero, Gli ultimi del Krak del 1932.
Le comedie in dialeto veneto de Gino Rocca le xe stà portà inte le sène da tante conpagnìe venete (professionistiche e amatoriali) par le quali el xe stà (’desso un poco manco) uno de i autori predileti; adiritura, co’ el grande atore e capocomico Gianfranco Giachetti, Gino Rocca el gaveva dà vita a un vero e propio sodalissio, tanto xe vero che el Giachetti ghe ga rapresentà, con tanto sucesso, tute le so comedie più inportanti, comedie indove squasi senpre el soriso lassa el posto a la riflession e a ’na certa amaressa par la condission umana.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
de Mario Klein
|
