|
Da Maran Lagunare (UD)
Me insumievo de zorno
 |
| (foto da “Voci maranesi” de Bruno Rossetto Doria) |
La storia che son drio contave, capitada tanti ani fà, la parla de mi e de un zòvene che in paese el gera ciapò par “mato”. Par dì el vero, sintindo le vose su de elo: “che 'l xe cussì, che 'l xe colà”, vevo anca mi un giosso de riguardo. Quela volta fevo ancora el pescaòr, siben che me insumievo anca de zorno de deventà maestro de musica; ma go dovùo spetà, deventà grando posta rivà a falo. In t’i primi tinpi vevo scuminsiò ndà a scola in t’i misi fridi de inverno che, metùi in tera i grasiùi colpa del giasso, no se ndeva a pescà. Figurémose co' che diseva i maranisi: “che matissi che ’l ga quel zòvene là? El se ga metùo in testa de ndà a scola de musica...”
Par la zente de Maran gera na roba duta fora l’ordenario che un pescaòr el fussi ndò a studià, massimo de musica: “Quel là el ga poca voja de lavorà, altro che studià musica!” Mi no me la son mai ciapada. Cuntinuevo par la me strada, lassando che i disissi quel che i voleva: con la bela stajòn ndevo a pescà e, co metévomo in tera i grasiùi, ciapevo la bicicleta e ndevo fin Sanzorsi a scola de musica. Go inamente che i pescaùri i me cioleva in ziro parfìn parché, par no roviname i dì de le man, a pescà doprevo i guanti de goma.
No cognosso tanto ben el palùo de Maran, anca parché me pare el me ga senpre portò a pescà in palùo Mussana. Anca el fiol che duti i ciameva “el mato”, el peschèva in quel palùo, ma gera anca altri pescaùri che i lavoreva par quele bande. Go inamente che se serchévo de sta in te le mie, colpa la nòmina che ’l tigniva, istesso co se incontrévomo sul lavor, mi e elo se saludévomo senpre. Par mi no ’l gera mato come che i diseva, e gnanca ladro. Pitosto, mi digo, che ’l se vergogneva de so pare, parché el vedeva quel che ’l feva de note. Eco, gera de sicuro cussì. Mi ve digo che elo el gera na brava persona, e altro che mato.
Go inamente quela matina che, suò e pien de afano, gero drio a finì un lavor, co de colpo go sintùo la musica. Alsada la testa par sintì de là che la riveva, vedo la so batela che, fita in saca, sentò a pope, el gera drio magnà, pacifico e bel tranquilo, con l’aradio inpissada.
“El se ga fermò par magnà, ma alora el xe mato parebòn!!” go pensò.
Par nantre pescaùri fermasse a magnà in tel mentre che se xe drio lavorà, la xe na granda bestema; gera za massa daghe un morsegòn a la pagnoca co te geri drio cascà in t’i costrài de tanta fame, e quela de fermasse, po’! De duti i pescaùri intorno, nissun veva fato caso a la musica, sol che mi. Curioso, go vogò a la via de elo e ’pena rente, sinto che ’l me disi: “No te vidi che paradiso, che spetàcolo” el me fa slargando i brassi verso i tapi (barene), pardelà che gera drio montà el sol, duto estasiò. El “mato” el se laveva el muso de quel bel vede: ’l se la godeva a sta sintì la musica in tel mentre che ’l magneva... e mi pensevo: “E i disi che 'l xe mato.”
Gera ancora stajòn bona de pescà co go diciso de maridame e come se useva quela volta: gero drio mete i cugùi su i pai parché vevo de ndà in viaso de nosse, co lo vedo vignì a bordo, vogando. Almoto, qualchidun ghe veva dito che stevo via na sitimana; ’pena rente el me disi: “Parché no te me lassi che vardo mi i to cugùi?” “E che proposte, àra” vevo pensò tra de mi ’pena vignùo inamente quel che la zente diseva de elo e po’: “E co' go de perde? Se porto a casa i cugùi no i ciapa gnente e alora... xe mèjo che ghe li lasso a elo, che almanco el me tien conto la seraja” e po’ ghe digo: “Co’ te vol par tigni conto la me roba?” “Gnente, xe el me regal de nosse.” La risposta la me veva lassò con la boca verta.
Co gero torno dopo el viaso de nosse, me mare la me ga contò che ’pena che ’l riveva de pescà el ndeva a ciamala dute le matine, el ghe deva el pesse ciapò in t’i me cugùi, che adiritura el gera de più de quel che peschevo mi. E alora! Povareto, go el dubio che elo, par gavasse la nomenansa che ’l tigniva, colpa de so pare, el meteva in tel cassòn anca un poco del pesse suo.
Intanto che stevo realisando el me sogno, deventà maestro de musica: che mal che son stò, co vevo sintùo che elo el gera ndò in sufita e col stiopo el se gera sparò un colpo... “Mato”, elo el gera de ànemo bon, bel neto, almoto, stanco de sintì quel che diseva la zente... el ga preferìo ndà de oltra.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
de Mario Klein
|
