|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
Ghe xe poco da dire e tanto da fare e da sperare. Con più metemo da parte la morale, i valori veri, la religion, la fede, i boni propositi, le tradission… più se àgita, se sveja e salta fora la bestia che ogni omo se porta drento, sconta tel sotoscala de l’anima. Far finta de gnente, no parlàrghene, fare i indifarenti o vardare da st’altra parte vol dire slargare el buso e lassare che la belva vègna fora da la tana e la faga el massacro che xe soto i oci de tuti.
Par questo, in sto periodo, se sta parlando de strage contro le done. Solo te sti ultimi mesi xe stà copà nove done da parte de morosi gelosi o amanti respinti. Azion violente che xe rivà dopo continue intimidazion che no vien denuncià o che no porta a l’aresto del delinquente, parché la màchina de la giustizia la se move massa pian.
Vissin a Mestre, un omo de trent’ani ga scaricà tri colpi de pistola contro la morosa de apena 16 ani. A Spinea, senpre in provincia de Venezia, na dona de 43 ani xe morta dopo èssare stà scortelà dal moroso che no acetava de vegnere lassà. In Puglia, na dona de 34 ani la xe stà massacrà da on omo incontrà su internet; naltra dona xe stà copà a pugni, dopo avere domandà on passajo in màchina, parché no la voléa cédare a proposte “particolari”. A Volta Mantovana, na dona che gavéa vinto la causa de separazion, vien finìa a colpi de pistola dal marìo che ga mantegnù la promessa de coparla, parché no l’acetava la sentenza del giudice. A Roma, ne la metropolitana, na dona vien colpìa co un pugno da on zóvane, dopo na barufa par el bilieto, e la more poco dopo.
E no parlemo del delito de la pìcola Sarah, deventà ormai on caso che vien seguìo in modo morboso, na disgrazia trasformà te na telenovela, dove on fraco de persone vole avere na pìcola parte, visitando i loghi de l’orore, la casa, la cantina, la strada ne i canpi, el pozo… co tanto de foto-ricordo par dire “io c’ero”: bela e misera sodisfazion!
Se fermemo, parché la cronaca nera no xe el nostro mestiere, ma da sti fati se capisse che ste done le ga avù la colpa de avere incontrà i òmeni sbalià, che no xe boni de acetare el rifiuto o la separazion. Òmani che no xe boni de dominare la bestia, che no xe boni de avere pietà e, prima ’ncora, rispeto par la vita umana.
Cossa dire e cossa fare davanti a sto male sociale, in sto tenpo de sangue e de làgrime, che vede le done vìtime de na ingiusta violenza?!
Prima de tuto, pur no meténdoghe l’aureola de santa sora la testa de la dona, dovemo condanare la violenza, de ogni tipo e su qualsiasi èssare vivente. Ocore insegnare, formare, educare al rispeto, conpreso quelo de le pìcole robe, de i pìcoli gesti: nel caso de la done, darghe la precedenza, cédarghe el posto in tran, darghe na man se le ga bisogno de aiuto. Le done ga da superare la paura e de denunciare i torti subìi, parché fin ’desso solo el 7% de le done che subisse violenza, in Italia, le presenta denuncia contro l’agressore omo che crede de avere el dirito de esercitare el potere de superiorità su la dona. E inveze el xe soltanto on poro can che mòrsega parché no ’l xe bon de èssare omo anziché bestia.
Cossa sperare? Che la giustizia faga ben el so dovere, senza rivare in ritardo, par salvare da morte e da violenza la dona, che ga solo el torto de èssare nata dona.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
de Mario Klein
|
