Memoria viva

La sità e la canpagna de più de un secolo fà
’Na sera passà a filò co’ i contadini. La me stupida osservassion che ’l leto gera fredo. El Papà me conta la situassion generale de sinquant’ani prima

Uno de i casoni che gera ne la canpagna padovana e che, da tenpo, xe stà restaurà.

Gèrimo co’ la fameja ancora in canpagna a Albignasego in te i ultimi giorni de setenbre de ’l ’37 e faseva za un fredo boja poco conforme a la stajon. Dovévimo tornare a Padova dopo pochi giorni. Dopo la bona sena preparà da la Mama, gero ’ndà in cusina da i contadini che me gaveva invità a magnare i sùgoi; i saveva che i me piaseva tanto. Ne i giorni prima ’i gavevo jutà, come el solito, a pestare la ua dentro al veturo e gero ’ndà ’vanti par squasi tre ore, fin al sfinimento. I contadini apressava el me aiuto, tantopiù che lo fasevo volentiera e me divertivo. Me divertivo anca quando che ghe gera da métarse su le spale pesanti sachi fin al granaro e metevo a la prova le me fòrse de toseto.
Quea sera gero ’ndà in cusina da i contadini che me ga fato festa, intanto meténdome davanti un bel goto de vin che no’ go fato fadiga de acetare e bévarlo co’ gusto, parché in fameja par el vin i me meteva a steca. Dopo i me ga dà un piato de sùgoli che gaveva sora za ’na telarina bianca. Squasi co’ reijon, la go cavà co ’l cuciaro e in poco tenpo me so’ cucà tuti i sùgoi, lecàndome i lavari. I me ga contà che i gaveva magnà ’na bona minestra in brodo co’ tòchi de galina, do sardeoni co’ la polenta brustolà e sùgoi.
Dopo ghemo portà le careghe in stala dove che faseva più caldo, el caldo che vigneva da ’l bo, da le vache e da ’l cavalo. Dopo quatro ciàcoe, la vecia de la fameja se ga messo a dire el rosario e mi vardavo in rispetoso silensio quee man zonte, quee man grosse e rovinà da le fadighe de ogni giorno. El xe stà un momento de la me vita che me ga inpressionà parché go capìo la nobiltà de ’l lavoro, anca se modesto e manuale. Finìo el rosario, i contadini se ga messo a zogare a tónbola e me sarìa fermà tanto volentiera parché a ogni nùmaro i lo conpagnava co’ ’na frase piena de tradission e de calore, che no’ desmentegarò mai. Ma la Mama me gaveva mandà a ciamare par la dona de servissio, parché gera tardi e bisognava ’ndare in leto.

La mùnega che serviva par scaldare el leto e che tegneva solevà el nissolo de sora, fin che funsionava el scaldin pien de bronse.

Quando che so’ rivà, go contà tuto al Papà e a la Mama, co’ i particolari e le inpression. Dopo so’ ’ndà in bagno a lavarme e po’ in càmara, dove che me fradèo Franco dormiva za. Go fato par cavare la mùnega ma me so’ incorto che, contrariamente al solito, ela gera stuà e el leto fredo. Par i zóvani che no’ poe saverlo, la mùnega gera ’na strutura in legno par tignere solevà el nissolo superiore mentre a la base, senpre de legno, ghe gera un vaso grosso e resistente pien de bronse par scaldare el leto. No’ savevo cossa fare; so’ ’ndà in càmara de ’l Papà e la Mama e ghe go dito el me incoveniente. I se gera messi a dormire. La Mama un pochetin secà me ga risposto: “La dona dorme; mi no’ go voja de ’ndar zo. Sfréghete i piè; te te scaldarè!” Visto che no’ rispondevo, el Papà me ga fato sentare su l’orlo de ’l leto e me ga dà ’na lession de vita che no’ me so’ mai desmentegà: “Voialtri do gavì tuto: ’na fameja che ve voe ben; a Padova ’na casa bea e piena de conforti; magnare ben e senpre ’bondantemente, qualche scheo in scarsèa; vilejatura in canpagna e al mare; possibilità de fare tuti i zoghi che voì! E te te lamenti parché ’na sera el leto xe fredo! Te me ghè contà ’na ora fà le to giuste inpression su la vita modesta e senplice de i contadini! Ma seto che sinquant’ani fà gran parte de i contadini viveva ne i ‘casoni’ co ’l sofito de frasche e de paja e el pavimento de tera batuda. Ne i casoni la zente cusinava, magnava, dormiva ne ’l stesso anbiente e faseva i so bisogni de corpo in te ’l fosso più vissin. No’ gera ’na festa e la fame tanta, che no’ podeva un orto e un ponaro modesti a cavarla de ’l tuto. I putèi caminava a piè scalsi, parché i sòcoi costava massa. In gran parte i contadini no’ saveva né lèzare né scrìvare!”
El Papà, co’ calma e serenità sensa farme pesare i so pensieri, ga continuà dizéndome che la mortalità gaveva ’na “percentuale” alta in canpo infantile, che in gran parte i òmeni non rivava a sessanta e le done a sessantasinque ani e che el servissio sanitario gera insuficente. “Ma, anca se mèjo – el ga ripreso – la situassion in sità no’ gera da balarghe sora! No’ ghe gera la corente elètrica. Ne le case de i signori esisteva le lànpade a gas, che faseva quea luse verdastra e malinconica. Solo in centro de la sità ghe gera i lanpioni, senpre a gas, che i vigneva inpissà al tramonto e stuà a la matina presto. Fora de le porte Codalunga, San Giovanni, Savonarola, Santa Croce, Pontecorvo, Portello, gera canpagna co’ qualche vila signorile e capane de contadini. In sità la aqua gera un problema parché el vecio aquedoto no’ funsionava senpre in pien. Le case no’ gaveva servissi igienici. I siori faseva i so bisogni sentà su la còmoda che gera ’na carega granda co’ un buso in mezo e soto el vaso da note che po’ vigneva svodà. Le altre case gaveva in corte o in giardin un sgabiosso. No’ esisteva bagni e chi che voleva lavarse ben doveva farlo in un gran mastelo pien de aqua calda. El riscaldamento gera fato da i camini de chi che podeva ’verli in casa o da stue che bisognava inpissare, stuare e soratuto netare.”

Ne le case de i siori ghe gera ’sta carega che serviva, co un vaso da note soto, par andare de corpo.

“Òstrega – go dito mi – ma gèrino cussì indriì? Ma la zente come se movévela?” El Papà me ga risposto che sinquan’ani prima no’ ghe gera né motociclete né otomòbili, che tuti do sarìa vignù dopo la fine de ’l 1800. Funsionava le ferovìe co’ treni che no’ passava in pianura i setanta chilometri a l’ora e che ogni tanto i se fermava parché calcossa no’ funsionava. Se un omo de afari o un politico o un funsionario publico o privato voleva ’ndare a Roma, ghe meteva da le ùndeze o dódeze ore, sia che ’l scalasse i Apenini bolognesi come che ’l ’ndasse par Genova o Pescara. A Padova ghe gera solo un tran a rotaje che ’ndava da la Stassion feroviaria fin al Bassanelo; el gera tirà ogni vetura da do cavài e el faseva tante fermade. No’ esisteva come ’desso i tran a elètrico che va da la Stassion fin in Paltana, da Piassa Garibaldi a la Stanga, da via San Fermo a Vigodarzere, da Piassa de ’l Domo a Torreglia e a Villa de Teolo.
“Ma, Papà, in ’sta maniera la economia funsionàvela o no?” “Védito, Moro, la nostra sità ga ’vudo, fin da i tenpi de i Romani, ’na granda vocassion par el comercio che xe stà senpre la parte più inportante de la so economia. El comercio padovan, nonostante tuto, gera florido. In te le piasse, le strade e le stradete medievali, esisteva tante boteghe che vendeva de tuto e a bon marcà. Te fasso un esenpio: quando che to Nono xe vignù a Padova da Carrara San Giorgio a stare in te ’l palasso de via Altinate co’ proprietà anca in via Eremitani, lu, che gera agricoltore, el ga pensà ben de vèrzare un forno de pan, pasta, dolsi sul canton de sanca tra via Altinate e via Eremitani, ’na botega de fruti e verdura ne la stessa strada, ’na botega de vin in via Eremitani. El ga dà le tre aziende in gestion a persone che ’l stimava, e tuta la farina, la verdura, i fruti, el vin li faseva rivare da la so canpagna de Carrara. I costi gera naturalmente bassi e i guadagni sicuri. El voleva che noialtri fiòi, ne i giorni de vacansa, ’ndàssimo de prima matina a lavorare in te ’l forno de pan, parché capìssimo cossa che gera el lavoro manuale.”
El xe ’ndà ’vanti contàndome che a Padova ghe gera anca de le bone boteghe artigiane de fabri e falegnami; vissin a le Piasse se trovava de i fabri artisti ne la lavorassion de ’l fero che deventava ringhiere, vetrade, portoni, sovramòbili de rara elegansa. El avenimento più spetà de ’l ano gera la Fiera de ’l Santo che vigneva fata in Prà de la Vale al ’verto o soto i pòrteghi. La zente se scaenava a vardare zoghi, acrobati, merce varia, zogàtoli, bestie; ghe ’ndava tuti, sia i pòvari che i siori.
“Ma de industria ancora no’ se parlava – el ga dito – e questa gera ’na grande mancanza parché no’ ghe gera lavoro e regole sociali. A Padova esisteva alora do sole industrie: le Distillerie Italiane vissin a la Stassion e la fàbrica de botoni de i ebrei Zuckerman e Diena a la fine de quea che ancò xe via Gaspare Gozzi. El operaio no’ guadagnava gnanca do franchi al giorno, no’ ghe gera regole de contrati de lavoro, gnente assicurassion su i infortuni, gnente ferie. Xe stà co’ i governi Giolitti e Nitti che tuto ga scominsià a ’ndare mèjo a cavalo fra el ’800 e el ’900.”
El Papà ga concluso dizéndome che ancò podévimo basarse le man par davanti e par dadrìo, pensando a la difarensa co’ quei tenpi e, soratuto, che podevo anca dormire co ’l leto fredo. Quea note no’ so’ stà bon dormire anca se, sfregàndone le ganbe e i piè me gero da seno scaldà, ma par tuto queo che me gaveva dito el Papà e che me ga fato in longo a pensarghe sù.

[torna sopra]