|
Da la Marca
Freya Stark
l’ultima regina de Asolo
 |
| Una de le ultime foto de Freya Stark. |
L’antichissima çità de Asolo la xe stada famosa ne i secoli par le figure regali de done che la ga sielta par vìvarghe. La pi famosa la xe sicuramente la prima, Caterina Cornaro che la ga baratà co Venessia el so regno de Cipro par el feudo de Asolo, dove che la ga messo sù ’na corte che la ga ospità, fra i altri, Ruzante, Giorgione, el Bembo.
Ne l’Otoçento se ga stabilìo ne la çitadina la regina del teatro italian, Eleonora Duse che la ga vossùo èssar sepelìa nel so çimitero, de fronte al Monte Grappa. Nel Noveçento se ga fernà la “regina de le esploratrici”, Freya Stark, nata a Parigi nel 1893 da na copia de artisti inglesi giramondo e, su le orme del so conpatriota Robert Browning, la se ga inamorà del “paese da i çento orizonti” dove che la ga anca fato la crocerossina ne la Guera Granda.
Educada a l’anticonformismo e al cosmopolitismo la savéa sonar, piturar e scrìvar sia in inglese che in italian. Un frate missionario ghe ga insegnà l’arabo, trasmeténdoghe la passion par l’Oriente.
Finìa la guera del ’18, la ga tacà i so viaji in Medio Oriente, Siria, Libano, Giordania, Curdistan e Iran; la viajava senpre da sola, co poche valise e ’na Leica par fotografar.
La ga contà le so esperiense in articoli de giornali ma soratuto in romansi che ghe ga dà gran fama: “La valle degli assassini" co la prefassion de Moravia, “Preludio del viaggiatore” e “L’Oriente e l’Occidente”.
Ne le so inprese la vestiva a l’oriental, vivendo ne 1e tende de i beduini e inparando le lingue locali da le guide. Ne i ani ’30 e ’40 la ga fato atività diplomatica par el Foreign Office e l’Jntelligence Service e se dise che sia merito suo se Churchill ga rinuncià al bonbardamento de Asolo nel 1945.
Fin a la so morte Freya la ga abità ne la vila che porta ancora el nome de la so fameja e dove che la se circondava de artisti, pitori, scritori e poeti, tra i quali Lawrence d’Arabia e Ernest Hemingway.
Par la so instancabile atività e par el so inpegno civil ne la denuncia de la speculassion la ga otegnùo el titolo de “Dame of the British Empire” e la ga merità la gratitudine de tuti i asolani che la ricorda co varie inissiative culturali.
[torna sopra]
|
