|
Editoriale
Largo ai zóvani!
Giusto: el futuro xe de i zóvani! Ma bisogna che no i pretenda de fare solo de testa soa, ignorando l’insegnamento de chi ga za caminà so la strada maestra de la vita
 |
| Protestare va ben, ma spacare e brusare nò! |
On vecio proverbio dise: “Prima de parlare, tasi” che vorìa dire: “prima de fare calcossa, pènsa, scolta e rifleti.” Metendo in pràtica sto “sgianzo de sagessa”, dirìa el “barba” del nostro Dinerio, se ris-cia manco de far capele e de nar fora strada. Tanti tosi lo ga za capìo, tanti altri no i perde tenpo a pensarghe, i s’inàlbora e i passa a l’azion, deventanto, el pi de le volte, sassini da strada.
No se discute sul fato che i tenpi no i xe pi quei de na volta, ma pi ne la forma, che ne la sostanza. La stessa “inquietudine” de i tosi de oncò la ga vissùa anca quei de ieri e de ierilaltro. El malstare, la delusion, la sensazion de no valere gnente, de no èssare capìi, de no avere futuro in te na parola, no la xe na malatìa nova che intaca solo la gioventù de oncò.
La situazion de avere on diploma de Scola Superiore in man e de nare soto paron te i canpi a destacare tegoline, a zento franchi l’ora, diese ore soto on sole de lujo che te ronpéa i zarvèi, o de dover emigrare in Francia par nare a s-ciarare le biétole, pur no avendo mai laorà in canpagna… la ga vissùa tosi de ieri che no ga mai pensà de trasformare la rabia in violenza e no xe ’ndà a Roma a spacare vetrine, darghe fogo a bancomat o cassoneti, tirare piere o incendiare màchine de la polizia.
Parcossa xe – lo disemo solo par fare on esenpio! – che i tosi disocupà del Sud no i xe ’ndà lori a tor sù i pomodori, a destacare le naranze e le olive: se xe inacorti prima de lori, che ghe jera sta possibilità, i imigrati che xe rivà qua so le carete del mare. No dirì mia che le nostre brave tose, diplomà o laureà, no le sarìa stà bone de assìstare on anzian, a do passi da casa: se ne xe prima inacorte le tosate de i Paesi de l’Est che da noantri ghe jera sto bisogno e sta possibilità de laoro…
Bisogna pur dìrghelo a sti nostri tosi de no darghe bada a la “cultura di massa” che in mome del dirito a laoro, libertà e futuro, ga scancelà da l’elenco de i doveri el rispeto de la vita, l’onora “il padre e la madre”, el sacro timor de Dio e l’esercizio de la pazienza, la prudenza e l’umiltà.
Bisogna dirghe che on mondo “fantastico” dove a tuto e par tuti, a gratis, ghe pensa el stato, no ’l xe mai esistìo. E qua na certa colpa la ga i genitori che ne i confronti de i fiòi, no i ga doparà la balanza giusta del dare e de l’avere: poarini... i fiòi!
Ghemo incontrà sta létera: “Ho 30 anni e ho sbollito la rabbia incontrollata da 18enne, ma è una rabbia nuova quella che la mia generazione condivide, la rabbia di non essere ascoltati. E questa rabbia si sfoga, diventa violenta perché non c’è un’alternativa. Ci sentiamo imbrigliati in una grossa rete, e cosa fa il pesce imbrigliato? Si dimena, con tutte le sue forze, senza pensare alle conseguenze…”
Dialogare co i zóvani la xe na necessità, ma bisogna dirghe che non pole èssarghe futuro senza passato e de no inventarse on mondo distante da quelo de le origini e de le tradizion. El goasto che, mostra soratuto la television, el ghe xe senpre stà, ma ghe xe anca tanto de chel ben che no fa notizia, che mezo bastarìa par dimostrare che esiste na alternativa a la rabia e a la stupida violenza. Bisogna parlarghe de responsabilità par adeguarse a on mondo che canbia in velocità, anzi, che ’l xe za canbià.
E na bona regolada, non senza fadiga e rinunce, se la ga da dare le generazion che fin ’desso se la ga passà on fià mèjo. Senò, cossa nemo a contarghe ai zóvani: la sòlita storia del sior intento?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Largo ai zóvani!
Giusto: el futuro xe de i zóvani! Ma bisogna che no i pretenda de fare solo de testa soa, ignorando l’insegnamento de chi ga za caminà so la strada maestra de la vita
de Mario Klein
Memoria viva
La sità e la canpagna de più de un secolo fà
’Na sera passà a filò co’ i contadini. La me stupida osservassion che ’l leto gera fredo. El Papà me conta la situassion generale de sinquant’ani prima
de Gigi Vasoin
Da la Marca
Freya Stark
l’ultima regina de Asolo
de Emanuele Bellò
|
