Da S. Stèfano de Zimela (VR)

Le lasagnone

La méscola, la cortelina e l’asse par tajarghe de sóra el sfojo de pasta ben tirà e rodolà.

Me pora mama tra i tanti pregi la gavéa chelo de avere le man de oro par fare le lasagnone. La gavéa inparà a inpastare e tirare el sfojo che la jera talmente picinina che me nona Dirce, so mama, la la metéa inzima a la carega e la staséa lì a tèndarla che la inparasse ben. La faséa anca i gnochi, che magnàino, e ancora magnemo, conzà co el buro fuso e salvia e pocià sul zùcaro smissià co’ la canela. La li faséa co el pan biscoto che mi pestava ben ben co’ el martelo o el bordo de el panareto e che dopo lo tamisava par torlo sù belo fin (alora no ghe jera mia el pangratà za belo pronto in te i sachetini o in te le scatolete de plastica, anzi la plastica a no ghe jera gnancora.
Quando che la se metéa a inpastare e mi ghe ’nava vizin par curiosare, la me diséa senpre: “Par fare e gustare de le bone lasagnone o de le bone tajadelete da fare in brodo a bisogna seguire le regole che me ga insegnà to nona Dirce... inpasta, tira, taja, cusina e magna...” ’na spece de “Cotto e mangiato” de i nostri giorni.

La mitica cortelina, insostituibile par tajare le lasagnone e le tajadele.

A gavéa inparà anca mi a tajare el sfojo rodolà, e lo faséa ben senza tajarme anca mi. Par premio me mama la me lassava i du tochi maltajà che restava da le parte e che mi a cusinava inzima a la stua che i deventava bei crocanti e che bisognava che stesse ’tento che me fradèi no i me li portasse via. Par tajare se doparava la cortelina, che la jera ricavà da un fero da segare l’erba e che no ghe jera cortelo che ghe fasesse concorenza.
Nantra pasta che faséino in casa i jera i bìgoli col tòrcolo, che lo go ancora, anzi lo gavéa parché me fiolo el se lo ga porta via e me neodeta Veronica a la se gode un mondo a iutarlo a métarghe drento el bìgolo longo de pasta e a ciapare i bìgoli quando che i vien fóra da la piastra sbusolà.

“Nono Toni, che deventa anca mi brava come me bisnona Antonia?”

’Desso la pasta la vien bela zala, ma ’na ’olta la vegnéa biancheta parché se presènpio le done le voléa inpastare la misura de siè uvi de lasagnone (la quantità de pasta che ocoréa par el magnare la se misurava a uvi), co’ chei ciari de luna che ghe jera le ghe metéa tri uvi veri e el corispetivo de tri uvi de aqua. Co i tri uvi sparagnà i naséa dal casolin a baratarli co’ zùcaro o ojo... “Siora, la me daga tri uvi de ojo...” e la casolina, dopo ’ver pesà la tara de la botilieta, che i la tegnéa sarà co’ un strùpolo fato co’ un mosegoto de polenta, la toléa co’ un mescoleto l’ojo da un bidonzin e la ghin dava la so giusta dose.
A casa mia mi e me mojere ogni tanto femo lasagnone e tajadele, ma doparemo la machineta, chela che se gira a man la manovela par tirare la pasta e par tajarla. Tegnendo i sfoji un pochetin grosseti de spessore e passàndoli par i ruli de le tajadele a vien fóra anca de i bei bìgoli quadrati, che dopo i deventa tondi sugàndose. Anca se doparemo la machineta par tirare e tajare, a vien fora roba bona parché a domemo tanto la pasta finamentreché la vien dura che de pi no se póle.
’Desso ghe xe i robot che te ghe buti drento tuti i ingredienti, te struchi el boton e vien fora da lori soli bìgoli e lasagnone... ma ghe manca el piassé... ghe manca el calor de le man che a l’è l’ingrediente miracoloso par darghe chel non sò ché che quando te ghin meti in boca ’na bela spironà a te disi: “Senti che bone, le xe proprio fate in casa!”

[torna sopra]