|
Da San Bonifacio (VR)
Laudato si’, per sor’aqua...
 |
| Có l’aqua no l’è mia amiga de l’omo. (da Primo Giornale del 9 Novenbre 2010) |
Laudato si’, mi’ Signore, per sor’aqua… ga scrito te ’l Cantico de Frate Sole (o de le Creature) San Francesco. Ma basta far un gireto par Soave e par Monteforte d’Alpone, sti giorni chì, par sentir da la boca de i aluvionà quanto la sia benedeta “sor’aqua” e quanto la sia “umile, preziosa et casta”. In sti tenpi moderni, da noantri, se ga verificà ogni tanto calche problema de alagamenti, ma chelo de sta olta l’à causà un disastro difiçile da descrìvar…
Mi vorìa tornar un bel tòco indrìo co i tenpi par far ’na pìcola storia de la situazion idrografica de le nostre parte. El 17 otobre 589, ronpendo a la Cucca (Veronella), l’Adese el ghi n’à fato straje e disemo che de piene se ne ga verificà tante assè te ’l corso de i tenpi. Pare adiritura che te l’antichità sto fiume el gabia provocà aluvion ogni du ani. La Zerpa, località te i pressi del torente Alpon, la ga senpre visto alagare le so canpagne, fin a èssare po’ ridota stabilmente a palude. Te i secoli XVI, XVII e XVIII l’Adese e l’Alpon i ga seità a rónpar e a alagare teritori, ruinando le coltivazion e rendendo malsani i loghi. Te ’l 1757 ’n’altra grande piena de l’Adese la ga roto tra Bionde e la Zerpa, alagando tuta la pianura, tanto che se vedéa afiorar solo le ponte de i selgari. Te ’l 1776, eco da novo ’n’aluvion provocà insieme da l’Adese e da l’Alpon, con le risare somerse par 45 giorni… Dopo, ghè stà ’n’antra diesina e più de aluvion fin a chela del 1882 che ga messo in zenocio Verona e la provincia.
Tonbazosana e la Zerpa i è stà le località che ga ’vù pi dani da parte de l’Adese, tanto che se ga formà ’na palude che l’è stà anca teatro de la famosa batalia del ponte de Arcole, tra i Austriaci e le trupe de Napoleone (15, 16, 17 Novenbre 1796).
Dopo ogni aluvion l’aqua la stagnava te i loghi anca par ani; te ’l 1719 la se ga ritirà adiritura dopo trent’ani, lassando paltan dapartuto. La zente, alora, la çercava protezion da ste calamità invocando i Santi e dedicàndoghe procession, orazion e fasendo voti. Ma anca lori, i Santi, gnente i podéa contro la furia de le aque. In Zerpa, la palude l’è resistìa fin ai primi del ’900, quando è stà deciso de bonificar el teritorio. I laóri, scominçiài a causa de la guera te ’l 1919, i è finìi dopo la metà de i ani ’20, rendendo i tereni ancora coltivabili e soratuto contribuendo a vinçar la malaria che, nel 1916, nel Basso Veronese, la ga visto 5.615 casi de Terzana, 998 de Quartana, più 185 de istà e autuno. Prima e dopo la bonifica era stà racomandà ai agricoltori de tegner neti i fossi, ma insieme bisognava provédar a sistemar canài e torenti, anca lori responsabili de i alagamenti.
Dovì saver che un tenpo, te le canpagne, esistéa diversi canài indò circolava barconi par el trasporto de merce de ogni gènare. Me nono “Cilo”, par esenpio, el gavéa el mulin a Vilabela de San Bonifacio e da lu rivava barconi carghi de riso da pilar da diverse risàre de la Bassa. Ben!... Chei canài a i è sparìi quasi del tuto.
Quando che i ga bonificà la Zerpa, è stà messa in ato ’na rete de fossi e de canài par eliminar l’aqua stagnante, cossì che se anca gavesse piovù de bruto o gavesse roto l’Adese (o l’Alpon), difiçilmente se sarìa verificà alagamenti de ’na çerta inportanza. Cossa sta sucedendo ancò te le canpagne? Uno a la olta i fossi i vegne strupà par guadagnar un metro de teren da coltivar e de canài, come za dito, non se ghe ne vede quasi pi. Fiumi e torenti i è pieni de àlbari e de erbazzi che ghe cresse rento e i fossi i è intasài de erbe, cane e sporcizia. Disìme vualtri come la fa l’aqua a scórar se la cata tuto ocupà el spazio che ghe ocor par ela!? El clima l’è cossì canbià, par colpa de l’omo, che cissà cossa ne tocarà in sorte, nando vanti col tenpo.
Sto novenbre, quando che son riussìo a rivar a casa de ’na me fiola, che la sta a Monteforte, me s’à indrizzà i cavéi a védar come l’era ridoto el so quartier. Tuti i era desparà e i coréa de qua e de là… Gh’era ci gavéa le so màchine soto aqua rento i garage, ci le taverne… L’aqua la rivava fin al pian rialzà de le case. Mancava la luce e alora se vedéa de i tratori che ponpava l’aqua par butarla in strada rento ai tonbini. Le scorte de magnar ben ordinà su le ménsole de le cantine o de i garage? Tute da trar via! A l’aqua piovana e a de i torenti, indò ghera smissià sporcizia de fogne e gasolio, se ga unìo parfin chela che ga somerso el cimitero. Robe de casa o de butini portà te i locài de soto par utilizarle pi vanti? Anca lore tute da trar ia. Mobili, saloti, frighi, congelatori, scansìe, careghe, libri, materassi, vestiti, cuerte… tuto era mucià su i marciapiè, pronti par èssar portà te le discariche o cissà indòe. Senza contar le auto piene de fango fin dessora al teto e da butar ia.
Ghera vigili del fogo e soldà, tuti inpegnà a dar ’na man a zente che pianzéa o che çigava aiuto. Quan’ ch’è rivà, a piati ormai lavà, le autorità, se ga sentìo dir che era tuto a posto e che no ghera pi aqua te le case. “E brai sti Veneti che i se fa su le màneghe e i laora cofà i mussi! - chesto l’è stà dito, co altre parole, da zente che sta in alto! Ma chela l’era solo la faciata del disastro. Le macerie le era za stà portà ia e le strade le era sgonbre, ma bisognava védar dentro le case cossa gavéa fato l’aqua, fin dove l’era rivà e cossa l’avéa lassà a so ricordo.
Intanto calche comerciante el ga anunçià che no ’l sa se ’l continuarà la so atività, parché o no ’l ga pi i mezi par rimétarse in piè o parché no ’l ga pi interesse a nar vanti.
A Soave altro disastro come a Monteforte e no parlemo de chel ch’è sucesso in tuta Italia. Forsi l’è ormai tardi par salvarse da tute ste calamità, ma se l’omo gavesse un fià pi de rispeto par l’anbiente, çerti fenomeni no i se verificarìa mia in maniera cossì violenta e disastrosa. Qua bison che ci de dover el se daga da fare par studiare e atuar ’na rete idrica che possa crearghe un suporto ai grandi fiumi, ai torenti, magari ridàndoghe vita a chei canài che i è sparìi col tenpo. E non desmenteghémose i fossi tra le do file de àlbari, parché anca lori i pol inpedir che i tereni i diventa palude. Semo dacordo che el progresso e le comodità i ga da pagar dazio, ma chì se trata che la natura no la ghi ’n pol romai pi de malagrazie te i so confronti e, se la se rabia, la ne fa nar tuti… in barca!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
8 marzo: Festa de la dona?
Come ricorenza storica, par ricordare le 129 operaie, morte parché le se ga ris-cià protestare, la podarìa anca starghe, ma come festa par le conquiste sociali realizà da la dona, ghe xe poco da festejare
de Mario Klein
Sgiansi de sagessa antica
Costumaje d’un vìvare vilan
’Delia e Vana, do comare in confidensa tra de lore, rovijando tra rogne de fameja, invia un filò in pescarìa, fregàndosene de st’altri che scoltava
de Dinerio
|
