|
”La Sguaratà” – Ciàcole adriote
La Pina “Donata”
 |
| La so cesa gera quela de S. Nicola, Monumento ai Caduti, in Adria. |
Na bela statura, alta e longilinea, co i cavéi petenà a l’antica, tirà sù in parte a destra e a sinistra, stile inpero, quasi a sotolineare le so origini nobili. La Pina ”Donata”, in realtà Giuseppina Donà, la gera, infati, “nobildonna” e del titolo N.D. la se fregiava con orgolio, essendo proveniente da l’antico casato ”Donà Dalle Rose”. La stava in Adria, piassetta Cavalieri, nubile, e la viveva sola, avéndoghe un fradelo, Vincenzo, abitante a Bottrighe, stimata persona e valido pitore.
La portava, co tanta dignità, la so condission, non serto de richessa, e la se inpegnava a fare punture, per canpare, ai vicini e ai bisognosi, in cità. Có ghe gera necessità, pronti a ciamare la Pina “Donata” cla se presentava col so necessario: vascheta co siringhe grosse e aghi da far bùiere ogni volta, su un pegnatin, prima de l’uso. Alora no ghe gera ”usa e getta” come ancuò e i strumenti gera pressiosi e da tegnere co atension perché i costava schei.
Quando che i fiòi pìcoli vedeva entrare la Pina i gera sighi ancora prima de la funsion, anca se ela, bona, la li quietava co qualche caressa, bone parole e un soriso ca precedeva la sbusà del bati fin che le mame tegneva duro el fiolo, perché ne se spachesse l’ago in tel duro del muscolo. Prima, na bela massagià de spirito e una, dopo la funsion. El male passava. E quando i fiòi faseva marachele, le mame de via De’ Ronconi e de via Burbera, in particolare, le li minaciava: “Varda ca vago a ciamare la Pina ‘Donata’ che la vien co la siringa da cavalo!” I deventava quieti subito tanto che gera preocupante la minacia.
La so man sercava senpre de èssere delicata durante la sbusadura. La soportava sighi e pianti, ma mai parolasse. Ciamà de urgensa da Siso, un fachin che el gheva l’influensa e al quale el dotore aveva prescrito na puntura, la Pina gera corsa. Al momento fatidico Siso l’avéa tirà un ”porco” e la Pina gaveva dito “Questa l’é la prima e l’ultima volta ca vegno, perché Nostro Signore no se ofende!” E cussì gera stà.
La gheva na bela figura drita e alta e la gera senpre vestì de nero, co un paltò lungo d’inverno, ca rivava quasi fin ai pié. Tuto sotolineava la so origine nobile. Poche parole in giro e gnente petegolessi pur abitando na zona dove le ciàcole, anca bechenti, le piaseva. Casa, cesa e interventi de… sanità che, qualche volta, da la puntura se azardava a qualcossa de più, come a s-ciopare un brusco, a cavare un spin da na man, a aplicare qualche malteca per i dolori. Na volta la gera stà insanamente acusà de na pratica de… salvessa a na putela restà in stato. Scàndalo, ciàcole, parolasse fin a investigassion giudissiarie che le aveva messo in luce la conpleta inocensa de la Pina “Donata” tornà a èssere ossequià anca da le malelingue.
Da resto, dize un proverbio che “le maledission le vien, le va, le va in sesto… a chi le dà” e, questo, gera stà el ritorno de giustissia per la nobil dona che l’aveva trovà conforto portàndoghe in cesa, al Signore, le so soferense.
La so cesa gera quela de S. Nicola1, Monumento ai Caduti. Parentela poca, come dito, so fradelo Vincenzo stava a Bottrighe e el gera un pitore veramente bravo anca se no l’é facile, sensa sàntoli, spicare el volo in te l’arte. El tenpo, peraltro, l’é galantomo e, ancuò, se pol dire fortunà chi ga un quadro de Vincenzo Donà Dalle Rose.
La Pina, da ani gode el Celo per la so vita onesta e dignitosa e anca per le so sbusà de… misericordia. Tanti fiòi che à subì i so interventi per far sparire la freva e la bua, ancuò i é òmeni cressù, co le so fameie e, in bona parte, in pension. Forse, ridendo de chele lontane làgreme e paure i pensarà a la man santa de la Pina “Donata” che, alora, l’é stà el salvagente de salvessa che à fato superare le tenpeste momentanee, faséndoli guarire co le punture, ma anca col profumo de bontà e de amore de la Nobil Donna Pina Donà Dalle Rose.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
8 marzo: Festa de la dona?
Come ricorenza storica, par ricordare le 129 operaie, morte parché le se ga ris-cià protestare, la podarìa anca starghe, ma come festa par le conquiste sociali realizà da la dona, ghe xe poco da festejare
de Mario Klein
Sgiansi de sagessa antica
Costumaje d’un vìvare vilan
’Delia e Vana, do comare in confidensa tra de lore, rovijando tra rogne de fameja, invia un filò in pescarìa, fregàndosene de st’altri che scoltava
de Dinerio
|
