|
Editoriale
8 marzo: Festa de la dona?
Come ricorenza storica, par ricordare le 129 operaie, morte parché le se ga ris-cià protestare, la podarìa anca starghe, ma come festa par le conquiste sociali realizà da la dona, ghe xe poco da festejare
 |
| Xe ora che in casa a se demo na man, caro mio! |
El nostro pensiero, su sta giornata internazionale dedicà a la dona, lo gavemo za espresso e scrito tante volte. Sicome repetita juvant (le robe ripetù le giova), insistemo nel dire che dubitemo che la Festa de l’8 de marzo la possa ’ndare oltre el significato storico, parché par la dona ghe vole ben altro che na sola giornata incolorìa de zalo.
Xe anca vero che pitosto de gnente, xe mèjo pitosto, ma xe ora che la dona la ghe mola de farse bindolare da chel furbon de l’omo. La tentazion xe forte, el profumo de la mimosa el ghe inturbia la mente, l’idea de na serata in lìbera ussita, senza zena da preparare, senza piati da lavare o putèi da métare in leto, la telefonada de le amighe, la publicità par na “pizza con spogliarello maschile integrale”: tute robe che ghe fa sbisigolare pensieri desmentegà e sbarlucare i oci, magari a l’idea de inpetolarse in calche bàgolo foresto.
Pora dona: tuto qua? Xela questa l’emancipazion, la lota da portare avanti par far rispetare i so diriti e poder sventolare la bandiera de la parità?
No se pol negare che… in te on sècolo de vita la dona, la dona italiana ga fato de le pìcole conquiste: ne la primavera del 1946 ghe xe stà permesso el voto; nel 1960 xe stà decisa la parità salariale; dal 1970 la pole esercitare el dirito de divorziare; nel 1971 ghe xe stà riconossù el dirito de èssare lavoratrice-madre e de no pèrdare el posto de lavoro quando la ga da ’vere fiòi; dal 1975 anca la mama ga la “potestà sui figli”; con la lege 194 del 1978 la pole interónpare la gravidanza; nel 1991 vien aprovà na lege de ugualianza tra omo e dona nel lavoro (lege mai messa in pràtica!); nel 1996 vien fora la lege che punisse la violenza sessuale su la dona (ma xe come se no la ghe fusse!); la lege 53 del 2000 la stabilisse che anca el pare ga l’òbligo da curare la formazion e l’educazion de i fiòi (se’l gavarà tenpo!)…
A me vien da pensare che, tra me mama che a l’inizio del sècolo passà no la naséa in fàbrica e gnanca in uficio, ma la curava la casa e la ne tirava sù noantri fiòi, godendo del massimo rispeto de so marìo e de le so creature, e na mama de i giorni nostri, no ghe vedo tuta sta difarenza, a pro de la dona.
Par questo digo che tuto sto delirio coletivo che taca a metà genaro e va avanti fin a la metà de marzo, passando traverso i dolzeti a cuore de San Valentin, xe fadiga che ’l porta miliorìe a le pìcole conquiste sociali, polìtiche e econòmiche, sbandierà da le Organizassion Internazionali, reclamizà co tanti proponimenti, parole, progeti e promesse.
La dona la ga da èssare ela convinta che la vale tanto, ma tanto de pi de quelo che la vien valutà da la socetà del consumismo, la stessa socetà che continua a prepararghe la Festa par l’8 de Marzo, la stessa che ghe organiza ruoli da velina, sogiorni a l’Isola dei Famosi, passejate noturne… su i marciapiè in zerca de clienti.
La dona ga da èssare più protagonista de se stessa. E anca l’omo xe ora che ’l se conporta da omo e no da bestia, ne i confronti de la dona! E non solo par on giorno, ma par 365 giorni l’ano!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
8 marzo: Festa de la dona?
Come ricorenza storica, par ricordare le 129 operaie, morte parché le se ga ris-cià protestare, la podarìa anca starghe, ma come festa par le conquiste sociali realizà da la dona, ghe xe poco da festejare
de Mario Klein
Sgiansi de sagessa antica
Costumaje d’un vìvare vilan
’Delia e Vana, do comare in confidensa tra de lore, rovijando tra rogne de fameja, invia un filò in pescarìa, fregàndosene de st’altri che scoltava
de Dinerio
|
