|
Sgiansi de sagessa antica
Costumaje d’un vìvare vilan
’Delia e Vana, do comare in confidensa tra de lore, rovijando tra rogne de fameja, invia un filò in pescarìa, fregàndosene de st’altri che scoltava
 |
| Ste do comare le ga invià un filò in pescarìa, che no ’l finìa pi. |
“No steghe tegnere el muso a vostra nora, ’Delia, tanto se l’à deciso de ’narse smandolare a Venessia da barabeche in màscara, co ’l so panson al nono mese, la ghe ’ndarà instesso, anca se vu seitè a rognare. Anca la mia, savìo, la ga na testa a spìgoli; co la s’inàlbora la xe tachente ’fà na cagna in calore, ma mi pa ’l chieto vìvare, ghe dago un dessora fin che la se fa jeja. Fè cossì anca vu, scolteme mi. Dovarìa ciapare pa’ i corni el toro, ansi la sorana, el bajanoto de vostro fiolo ma no ’l ga nervo par domare na pischerla batolona come so mojere, senpre piena de morbin da vanso. Dopo tanti ani de tiramola, sto ravo naon, el garìa dovù capire che ’l se menava casa na avocata rebechina.”
“Alora, Vana, goi senpre da socónbare mi, ca go trent’ani e supia pi de éla?”
“Vense, gnanca se pianzì in greco quela bega-begheta-begosa no ghe molarà un ponto.”
“Ben, che la vaga pure a sfondrarse tapà da babào. Però né ela né chel sarafo de so marìo ca ghe fa da palo de protession, no i staga vegnere in serca de mi, gnanca se la dovesse rónpare le aque là par volta. Chissà che la partorissa in piassa San Marco! Questo vol dire ca me rassegnarò de ’vere mucià un neodo serenissimo, propio mi ca la go sù co’i venessiani che, in fabrica a Marghera, i ga fato morire velenà, da un càncaro ai polmuni, el me pòro Carlo ca lo pianzo ogni dì come ca fusse sucesso ieri.”
“D’acordo par la desgrassia de vostro marìo, ma pa ’l resto no steve far sentire gnanca par scherso! Credime a mi, comare, le trabuchele barufose in fameja, prima o dopo, lassa el segno. Tegnì conto che i ani passa e capitarà el momento che garì bisogno de na man propio da ela, dato che vostra fiola xe ’nà farse la ponga in Canadà co ’l so foreston spuacela. Vedarì che, có nassarà chela creaturina, sarà da bon sto piavoleto sgnaolon el vostro godiolo ca ve desfantarà i fumi de la bila. Donca, fèvela passare ca ve convien! La ghe xe passà anca a Sgnàfari ch’i ga sconto el bosson del vin. ’Desso ve lasso, cade ca vaga casa a infarinare e frìzare ste schile ’vanti ca me riva casa l’omo. Molando dal turno de note, el càpita co’ na gran pionba ’dosso che se no ’l cata pronto el fa l’inferno. Perdoneme sta tamisada de rogne al salto, ve saludo, continuaremo doman el nostro filò.”
– Gheto sentìo, barba? Na carga de sincero altruismo go ravisà te sto dialogo che t’ò ’pena riportà, naturalmente assieme a sti moscardini che te m’à pregà de conprarte. Sta fortunosa e senpre più rara racolta lessicale la go tirà sù in pescarìa da Sante pessaro. Dal frutarolo de fianco t’ò tolto anche do limoni che te servirà de sicuro da schiciare su i folpeti caldi, prima de gustàrteli. I màgnito ancò a ora de disnare?
– Serto, neodo, spetavo propio ca te rivassi co ’l scartosso par métarli in pegnata. No te vedi ca go za l’aqua de bojo?
– Vedo, vedo, ma intanto che te sbròdeghi in seciaro per snetarli, garìa caro, se te ghe n’à voja, che te me spendissi do parole svelte su sto filò. L’argomento m’incuriosisse ’véndone più volte sentìo parlare ma in proposito go idee ancora bastansa confuse.
– Urca, Lalo, propio ’desso!? El filò par mi, siben ca me ga senpre piasso tèndare i fati mii de mi, xe on tema marubio e sponciarolo, grando senpre, ca me vorìa na stimana par spiegàrtelo a ciare létare, ma sercarò de contentarte mèjo ca posso.
Intanto, stando a la tamisada fra le do comare, cade ca te diga che “massa confidensa fa pèrdare la riverensa.”. Questo pa no butar zo da i scagni i conseji, a fin de ben s’intende, spesi da una a pro de st’altra, ma par ricordarte che “i conseji de dona o i brusa o i bastona.” Ma verzendo el sipario in prima sèna d’on filò de na volta, se catemo in àndio o in grupia de na stala. Par inpossessarse mèjo de l’anbiente, l’ùgnolo tevieto a l’epoca, cadarìa butare calche ocià su la reale situassion d’oncò de la nostra lengua-mare parlà dal popolin nostran de ieri e sfojare calche notissia storica so ’l menajo de canbiamento espressivo maurà ne i ani, visto come modo de paciolare par capirse mèjo fra zente de i canpi. Dito questo, par tajar curto, passemo ai raduni ca se faséa, fin tuta la prima metà del secolo passà, ne le nostre stale d’inverno, gnonde par prima roba se staséa na s-ciantinela al caldo, e in seconda batùa se staséa volentiera in conbrìcola par scoltare fòle, tiritere, cante e conte de storie vere o inventà, par scanbiarse notissie su i fati del giorno o par spetegolare e tajar tabari ’dosso a calchedun de la borgada. In altre parole gera el logo de passajo del saere da na melona a ’naltra, ossia l’ocasion pi adata par istruirse, amesso ca possa doprare na parola cussì grossa. Le fémane pi ansianote se portava drio el guciarolo e i feri da calse o el tanburelo da ricamare. Invesse ai òmani, se no i gavéa calche atresseto da rangiare o far sù i stropèi par ligare le vegne, co na tola da lavare roversà su i zanoci, batéa la carta a Scoa e Tonbolon, cagnàndose par vìnsare e magari tore in berta la cubia ca perdéa. Par la zoventù el filò gera anca n’ocasion par contentare l’ocio. Defati pi de calche smorosamento nasséa propio fra spasemanti butà sora on brassà de paja fin ca fenìa el petrolio tel canfin. Mi stesso go tacà boton propio a filò co’ to amia Jole, poarina. Pase a l’ànema sua.
Donca el filò gera el consiero de la ’micissia, el logo ideale par ciapare confidensa e fare comunela fra vissini de corte, sensa però pèrdarse mai i rispeti l’uno co’ l’altro. Soto le Feste de Nadale e drio la Stimana Santa, se Pasqua cascava bassa, a filò vegnéa anca ressità calche rosario. Ciò la siviltà contadina gavéa na fede crestiana ben inraisà. Me fermo qua, sinò no meto pi sù i moscardini.
– Grassie, barba, ’desso s’a entro in discorso co’ i me conpagni, me la cavo mèjo de prima.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
8 marzo: Festa de la dona?
Come ricorenza storica, par ricordare le 129 operaie, morte parché le se ga ris-cià protestare, la podarìa anca starghe, ma come festa par le conquiste sociali realizà da la dona, ghe xe poco da festejare
de Mario Klein
Sgiansi de sagessa antica
Costumaje d’un vìvare vilan
’Delia e Vana, do comare in confidensa tra de lore, rovijando tra rogne de fameja, invia un filò in pescarìa, fregàndosene de st’altri che scoltava
de Dinerio
|
