|
Editoriale
Cara Italia, te scrivo…
Létara lanpra al me Paese che me ga visto nàssare e vìvare in pace la pi parte de la me vita, e contento de i italiani che ’l m’à fato incontrare
Anca se go metà ani de i tui, te dago del ti, cara la me Italia, parché te si la me seconda mama. Te confido che tel farte i auguri pa ’l to 150° conpleano, a me sento on ruzamento de rece, on graelare ’torno come de ave invià a becarme la lengoa par paura che te diga massa de ben. Ma a mi no le me fa paura, te digo quelo che penso e te parlo col core in man.
Bon conpleano, Italia! A ti e ai to fiòi italiani. Na volta tanto, démoghe on calmante al bastian contrario de turno e lassemo che ’l dorma tel leto de le so idée malcunze, soto coerte inpegolà de pessimismo. In 149 ani che te si nata, medigo che xe la prima volta che festejemo el to conpleano e che se se sentimo de vardare… el goto mezo pien, anziché mezo gudo.
Lassa che te diga che te li porti ben i to ani, cara “bella Signora”, e che te ne fè sentire ’nncora orgoliosi de ti, de come che te te tien sù e te si in grìngola, anca se qualche cavejo te scapa via quando scravaza. I xe vegnù fora da la to carne ’ncora salvega… i Dante Alighieri, i Petrarca, i Giotto, i Galileo Galilei, i Leonardo da Vinci, i Manzoni, i Leopardi, e có te sì deventà òtima, anca i D’Annunzio, i Garibaldi, i Mazzini, i Cavour, i Marconi, i Giuseppe Verdi, i Pirandello, i Papa Roncalli, i Ferrari, i Fellini, i Agnelli, i De Gasperi, i Napolitano… Sì, anca i Napolitano, parché el nostro Presidente el xe drio insegnarne che xe rivà el momento de sentirse pi italiani e soratuto italiani atenti, sveji, senza paraoci, ’ncora boni distìnguare la nostra identità, le raise e la storia del nostro popolo.
No semo i primi in tuto, ma in tante gare e non solo sportive… no ne bate nissun.
Bon conpleano, Italia! Le bandiere che svèntola in sti giorni, anca se manco de quele de i mondiali de calcio vinti tel 2006, e le copie de la Costituzion che ne regala parfin i supermercati, el xe el nostro modo de dimostrarte che te volemo ben.
Questa la xe l’ocasion giusta parché da tanti oci ghe casca le sgarbele e i veda la to arte, la to cultura, la to splendida natura, anca se te si in cura par guarire da i to dolori reumàtici, da le stralossade, da i to mal de testa e le to svernie. Se tuti ghe metaremo un poco de amor propio e te daremo na man, staremo tuti on poco mèjo.
Xe solo con l’inpegno de tuti che podemo farghe fronte a la catastrofe mondiale che xe drio vegner ’vanti: prima co la crisi economica, dopo co le aluvion, ’desso col petrolio e el teremoto. Se ghemo la pazienza de stare insieme, co manco cativeria, manco ingordisia de potere, co bona volontà e sforzo par far vìnzare el diàlogo anziché smoltonarse, ricordàndose na s-cianta có gavévino na màchina de manco, on celulare de manco, na vacanza su l’àrzare del Brenta o del Bachilion, al posto de quela a Sharm El Sheik, e parlàvino solo dialeto e nasévino in cesa, ma jèrino manco cativi, manco egoisti, e co manco morbin.
I nostri veci gavéa tuta naltra cultura, i savéa èssare “solidali” e co un goto de vin bon e na streta de man, i conbinava i afari e i vardava al futuro. Questo forse ghe ga servìo a sentirse italiani e basta, ma noantri a ghemo on inpegno ’ncora pi grando: dovemo sentirse italiani, europei e citadini del mondo. Eco, cara la me Italia, tacaremo col crédare ne i valori che conta e ’lora riussiremo a indrizarte le coste, senza odiare, ofèndare, bastonare o copare nissun. Te lo auguremo a ti e a noantri.
Bon conpleano, Italia!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara Italia, te scrivo…
Létara lanpra al me Paese che me ga visto nàssare e vìvare in pace la pi parte de la me vita, e contento de i italiani che ’l m’à fato incontrare
de Mario Klein
150° Anniversario Unità d’Italia
La nostra Festa tricolore
Eco come on paese de la Bassa Veronese à festegià la Giornata Nazionale de l’Unità d’Italia
de L.B.M.
|
