|
Raconto del mese (in visentin)
Checo Baila
 | | El gavéa anca l’anbission de coltivare un bel’orto che lo vangava tre volte l’ano… |
Checo Baila el jera pìcolo de statura e, par de pi, tanto calvo da non ’vere gnanca un cavejo in testa. El gavéa però du bei oci mori e la pèle lissia, ben tirà e sensa rughe, fursi par come el se riguardava nel magnare: carne solo na volta la setimana, che la jera un quarto de galina o na parte de conejo, galine che le raspava tuta la corte. El gavéa anca l’anbission de coltivare un bel’orto che lo vangava tre volte l’ano e co la sapa el cavava ogni filo de erba foresta che voléa métare raisa. El gavéa tanta varietà de verdura che, col so bon core, rento un sestelo, ogni altro dì el ghe ne portava a na pora védova lì vissin, che la tribolava par mantegnere tre boce che i faséa le ’lementari. El se misurava anca el vin, ’pena un goto al pasto, da quatro visele che, quando la ua jera maura, el se la pestava so na mastela de legno.
Però el jera senpre ciapà da un magon che lo conpagnava: na malformassion e proprio in testa; na melona la sua, lissia e pelada, ma con do nate, ben lustre e grosse fa na nosa. No ghe servìa nessuna bareta, anca pi larga de la so testa. Tuto jera inutile. Le so patate so la melona le jera cussì mal disposte che jera inutile sercare de quèrserle co un qualsiasi capelo. Le do nate infati le se catava una da na parte de la testa e chealtra da la parte oposta e, ancora pèso, una vissin la recia sinistra e chealtra quasi insima la testa.
La so malformassion lo gavéa fato diventare un solitario, che non se fermava a ciacolare con nissun, a tirare senpre drito par la so strada e par conto suo. El vardava inmusonà anca i boce che lo incontrava perché el se gavéa inacorto che i ghe ridéa drio. Tanta jera la so vergogna che mai el se gavéa ris-cià de fare i scalini e nare rento in cesa. Come podévelo fare lu, che i òmini in cesa i tien la testa discuerta! Mai el jera nà rento anca a na ostarìa, anca se ’l gavéa voja de sgarbarse la boca co na onbreta de nostran o far na partìa de brìscola o de foracio in conpagnìa. El se sentìa proprio un disgrassià anca se ’l jera senpre stà de òtima salute e solo da bocia el gavéa vudo el mal del molton.
Drio casa el gavéa tri canpi che el li laorava solo e senpre a man, con pico, sapa e baile e na vecia cariola che la nava ’vanti sigando. La so casa jera misurà a le so fòrse; davanti na corte dove spuntava tanti sgiavaroti, la cusina co un bel fogolaro, la cantina e la staleta dove rumegava na vacheta e na cavra. Al pian de sora la càmara con de fianco el granareto. I cupi i jera a vista che te podivi controlare se con la piova assava passare na gossa de aqua. In quel caso, jera senpre pronto on vecio pitaro.
Tanto el jera senpre solo e inmusonà che i lo pensava sensa lengoa. No ’l gavéa gnanca mai inparà a fumare. Dal casolin el conprava solo l’ojo, el sale e ogni tanto un scopeton. Mesodì e sera senpre pastasuta e erbe cote. El jera senpre solo parché convinto de èssere tanto disgrassià, che nessuna dona, anca na maràntega, podesse copiarse con lu. El nava via de anda, sguelto, co i oci partera par non saludar nessun.
Però el gavéa na qualità tuta sua: muto con tuti, el rajonava so posta. Con na vosseta in falseto el se faséa i discorsi come el parlasse con uno de fronte. El se ordenava: “Fa’ questo o quelo, disbriga chel canton, miti via che l’arnese”; el se diséea parfin: “Mòvete, sito nato co la brosa so la schena, feto fadiga a piegarte? Svéjete, bauco!” parole che le dovéa anca umiliarlo, tanto le jera stranbe.
Poro Checo! Mai el gavar^a inmaginà che na fémena, sensa pretese, volesse convivere con elo. Ma el destin ga vossudo proprio quelo che mai el se gavarìa inmaginà. La Doralice, na trocagnota col culo basso, ma con parole dolse e parfin con qualche caressa, lo ga fato suo. Checo Baila ga tocà el cielo co un déo, l’è diventà parfin alegro e tra luri du i se tegnéa senpre par man, disesse quelo che voléa le malelingue che no le manca mai.
Xe rivà anca un fiolo, la pì bela creatura del paese. Checo Baila el ga fato parfin i scalini de la cesa par batesarlo e ’l prevosto ghe ga sugerìo de ciamarlo “Deodato”. La xe stà na copia perfeta anca se fisicamente con tante magagne. Ma i ga vissudo anca luri felissi e contenti e la gente no ghe ridéa pi drio parché, d’altra parte, no la jera pi na novità.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara Italia, te scrivo…
Létara lanpra al me Paese che me ga visto nàssare e vìvare in pace la pi parte de la me vita, e contento de i italiani che ’l m’à fato incontrare
de Mario Klein
150° Anniversario Unità d’Italia
La nostra Festa tricolore
Eco come on paese de la Bassa Veronese à festegià la Giornata Nazionale de l’Unità d’Italia
de L.B.M.
|
