|
Da Adria (RO)
“Scuola e tigli”
 | | “Che la vègna alta o che la vègna bassa, Pasqua vien co la frasca”… e le piante le se mete el so vestito novo. |
Ancora có fasevo la tersa media, inte ’l cortile de fianco al fabricato de le scuole – alora a gh’jera dentro: le Magistrali al primo piano, raquamte classe de Elementari a pianteren e na classe de Scuola Media, propio in fondo al coridojo de le Magistrali, quela mia, apunto – i ieva piantà tuto intorno de le piantine de “tiglio”.
Fin da la prima primavera i eva scuminsià a fiorire e, có s’à verto i viri par respirare la prima arieta tivia de la bona stajon, un profumo dolse, grasso e co un tantin d’indormia el te ciapava a tradimento par dirte che le scuole le jera ormai squasi a la fine e cussì te soportavi mèjo i ultimi sacrifissi prima de le vacanse.
Int’i ani ch’è vegnù dopo, dato che lì, più o meno, ò fato el resto de scuole, senpre i “tigli” i n’à dito có jera ora de lassare tacà a l’atacapani de casa la spolverina par tor sù el paltò: defati quando che le piante se despojava par nantri jera el tenpo de covèrserse.
È passà i ani, ò ciapà el me tòco de carta, qualche ano dopo ò vinto el concorso, a so’ ’ndà a insegnare. I primi ani a i ò fati inte ’l Cavarzeran, po’ in provincia de Rovigo e par finire a so’ rivà in Adria co la scuola propio a du passi da casa, indove ch’ò concluso la mi cariera.
Davanti al porton de la scuola se verzeva, e se vèrze ancora, na strada che có mi jero boceta no esisteva, contornà da na banda, indovinè da cossa? Proprio da na fila de “tigli”! Sì propio ancora luri! Sicome che quando ch’à so’ rivà mi i jera za de le bele piante, i jera luri che me segnava el lunario de la scuola, giusto come int’i ani de le Magistrali.
Primi giorni de ottobre: le piante le gheva foje verde incamesà co altre maronsine, o par èssere più precisi col contorno zalo-maronsin e el centro ancora verde. Nadale: pèrteghe e rami despojà gratava i cieli grisi, sbusando qualche nuvola che lassava cascare le prime falive de neve.
Da Pasqua, in riga col proverbio “che la vègna alta o che la vègna bassa, Pasqua vien co la frasca” le piante le se meteva el so vestito novo, qualche volta de un verde palideto, qualche altra de un colore più deciso. Utimi dì de scuola: el profumo dolse, grasso e co un tantin d’indòrmia el torava a inpenire l’aria con la so promessa rufiana e consolante d’i giorni sensa scuola.
Solo adesso, ch’a so in pension da ’n tòco, no gh’è più ’l profumo de i “tigli” che me segna la stajon, ma stago ben lo stesso.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara Italia, te scrivo…
Létara lanpra al me Paese che me ga visto nàssare e vìvare in pace la pi parte de la me vita, e contento de i italiani che ’l m’à fato incontrare
de Mario Klein
150° Anniversario Unità d’Italia
La nostra Festa tricolore
Eco come on paese de la Bassa Veronese à festegià la Giornata Nazionale de l’Unità d’Italia
de L.B.M.
|
