|
Robe de Ciósa
Garibaldi a Ciósa
 | | El dipinto del sipario che se trovava nel vècio teatro “Garibaldi”, demolìo ne i ani Vinti del XX secolo. |
De Garibaldi a Ciósa ghe n’avemo za parlà mondo de ani fà in sta rubrica. Adesso, in ocasion de i 150 ani de l’Unità d’Italia, serchemo de aprofondire l’avenimento.
Dunque, Garibaldi l’à inserìo Ciósa nel so giro eletorale, partendo da Firenze in treno fin a Venessia el 24 de febraro del 1867. A ze sbarcà al molo de Vigo da una bapore a sbàtole (= vapore a ruote). Apena arivà in piasseta, gera stà parecià ’na carossa a cavài per portarlo fin al munissipio. E invesse i ciosòti i à destacà i cavài e i à tirà la carossa a brassi per tuto el Corso che alora se chiamava Corso Vitorio Emanuele. Aclamà da la zente, l’à dovesto afaciarse a un balcon del munissipio e improvisare un breve discorso. A la zente che ghe fazèva festa sigando, l’à finìo el so dire co ste parole: “In mezzo a voi parmi d’essere in mezzo alla mia famiglia.”
La giunta comunale, guidà dal prosindaco, s’aveva portà a Venessia per scortarlo fin a Ciósa col bapore “Padova”. Quelo che l’à colpìo de pi xe stà per Garibaldi l’entusiasmo de la zente, de tanta pòvara zente, che se ga sentìo fortunà perché l’à podesto tocare un personagio famoso e amà da tuto el popolo.
À scrito un testimonio del sèguito: “Si sentì rinascere a Chioggia, dov’era atteso dai barcaioli e dai pescatori.” E co lori a s’à fermà a parlare, in ispèssie co uno de lori, Sante Penzo deto Róncola. El motivo de sto parlare gera dovùo al fato che sto pescaore gera stà acusà de avere robà da ’na casseta a Garibaldi de i ogeti pressiosi, quando che, insieme a altri bragossi, a l’à imbarcà a Cesenatico e a l’à portà fin a Magnvaca (atuale Porto Garibaldi in Romagna) perché l’eroe gera deciso de andare in agiuto de Venessia che ancora resisteva a l’assedio de i Austriaci (semo nel 1849). Garibaldi a l’à ascoltà e po’ a ga dito al Penzo: “No starte a preocupare. Ti no ti m’à robà gnente. Le ze tute calunie! E mi su qua per ringrassiarte per averme imbarcà insieme co i to òmeni ris-ciando anche la pèle.” E a lo à abrassà e basà in fronte. “E anca se ghe fusse stà ’na casseta in bragosso ghe l’avessemo portà e no i diga che nu gavemo rancurào la casseta e s’avémo fati richi” à dito el pescaore.
La visita de Garibaldi a Ciósa ze stà imortalà (se fa per dire) co un dipinto de un serto Achille Brusomini-Naccari (che dopo sarìa deventà anche sindaco per poco tempo de Ciósa), piturà sul sipario del vècio teatro intitolà proprio a Garibaldi, demolìo ne i ani Vinti del secolo passà.
Per l’ocasion a Garibaldi ze stà conferìa la citadinansa onoraria de Ciósa e al so nome ze stà intitolà la Tore de Santa Maria, che se trova apena che se entra in sità vissin al Dòmo. A Ciósa no s’aveva mai visto tanta zente e ’na festa cossì granda: el Corso tuto imbandierà co i balconi indamascà e a la sera iluminà co ’na iluminassion straordinaria.
A ricordo de la venuta de Garibaldi a Ciósa ze stà fata scolpìa ’na lapide che se trova tacà su la faciata del munissipio. Questa ze la iscrission completa: “… In mezzo a voi parmi d’essere in mezzo alla mia famiglia” / Da questo balcone / al popolo / che lo acclamò cittadino / Giuseppe Garibaldi / il 27 febbraio 1867.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara Italia, te scrivo…
Létara lanpra al me Paese che me ga visto nàssare e vìvare in pace la pi parte de la me vita, e contento de i italiani che ’l m’à fato incontrare
de Mario Klein
150° Anniversario Unità d’Italia
La nostra Festa tricolore
Eco come on paese de la Bassa Veronese à festegià la Giornata Nazionale de l’Unità d’Italia
de L.B.M.
|
